1 ቦኤዝ ናእሚር ግርወድ ወንዳ፡ ፈራዕ ኤሊሜሌክሩዅልድ፥ ታጅርዲ እከዅረዲ ሰጘኵ። 2 እን ሞኣብያንትሪ ሩት ይኸ ናእሚት “ኣጃያዅ ኪድን ኣደራ አረረን፡ ቀንበልያ ፈርያ” ይቲላ። ናእሚኻ “ፈሪ ይቊራ” ይቲላ። 3 ንሪኻ ፈርዶ ኪድጝሊ ቱቲ፥ እን እሽረውድ ጉርበትሊ ቅንብልቶ ተርስቲ። እና ኪድጝ ኒን ይኸ ቦኤዝር ወንዲዅ ኤሊሜሌክ ይስታዅዱዅ ሰጘኵ። 4 ንድንብኻ ቦኤዝ ቤትልሔምትልድ እንቶ፡ እን እሽረውሲ “ጃር እንተዲ ኣኽን” ይዅሎም። ናውኻ “ጃር ገውርንኵት” ይንዅሉ። 5 ቦኤዝኻ እና እሽረውድ ዳግ እርጋዅ መድዅሲ “እና ስርጒ እውቚ ግን” ይዅሎም። 6 እን እሽረውድ መዱዅ “ኒኒ ናእሚዲ ሞኣብሲ እንትረሪ፡ ሞኣብየትሪ ስርጒ ግን” ይዅሉ። 7 እሽረውድ ጉርበትሊ እንሸውሰውድ ነበክል፥ ቀንበልማ ይቲሉ። ናን ግን ሻሚል በላህሲቲ ግን ግራ፥ ጉራብድ ተርስረ ደው ይላ” ዮ ወንተስዅሉ። 8 ቦኤዝኻ ሩተት “ዋሲ ይቑራ! ቀንበልቶ ይሮ አሪ ኪድጝሊ ፈርግ፡ እና ይሻቃሎዲ ተለይ ግራ ናልድ ሺሪግ። 9 ኪድጝ ኣዊል እሽረነት ቆሊ እማ ናጉርበትሲ ተለዪ። ሻቃሎ ገለ ይግንንኪ ድወሎም ህምበኵን። ስቋንትረንኻ እን ሸቃሎ ኒልድ ጀኣናዅ ጀንልድ ፈርዶ ጅኢ” ይዅላ። 10 እንሲን ንሪ ብሪል ፍግም ይሮ ሰገድቲ፥ “ኣን ሸልድሪ ኣኲ፥ ይድ ሓሰርስቶ ገረስራዅ፡ ኩጃብል ሕሽም አርያ ኣዋኣኾ ኣዅንለ” ይቲሉ፧ 11 ቦኤዝኻ “ኩግራዋ ክሮሰና፥ ኩተንሽኒት እስረዅ፡ ኲኽርዲ ኲገነዲ እዅርስናዅ ብረስ ባርደት፡ ንድ ጃብ አርእግረው ከወል እንትረት ትክሲነ ድዊነለ ህምበነኵ። 12 ጃር እንቲ እስረዅ ወራትሰና፡ እውንኵት። ኩፍዳ ኒውክ እን ኒ ካንፍፍ ዓንቀይሊ ሻሚቶ ይሮ እንትሮ ህንብራዅ፥ እስራኤልድዅ ጃርሊድ ኣኽኒ ዮ ወንተስዅላ። 13 ንሪኻ “ይኣደራ፡ ላሪ እን ኩገንሺንልድ ድኳ ኣኽገኽር ኣኩ፡ ኩገንሺነት ጋብረ ምርወት/ደፍአት ኡርዅላ እማ፡ ንደንብኽር ኲጃብል ሕሽም አርያ ሳዳ ሻዅን ይሮ ውንስቲሉ። 14 ምድ ወክት ኣቊቶሰና፡ ቦኤዝ “ ነራ ስኵሪ እማ፡ ሳንሲዒልድ በንደ፡ እናሻቚሊ ጥብቁስሩ ቊ ይዅላ። ንሪኻ እን እሽረውድ ገቢል ከፍ ይቲ፥ ገው ሱር እውዅላ፥ ንሪኻ ቊቲ። ብትሮኻ ከብሲቲ። 15 ቅንብልቶ ጉሮሰና፡ ቦኤዝ እንሸቓሎት “እንሸውሶ ህንበው ነበክል ድኳ ቀንበልደን ስማስገላ፥ 16 እንሸውሶ ህንበውልድ ፍድኖ ቆልቶ በረላ ግራ ዋኽትገላ ዮ ኣደድዅሎም። 17 ኩንን ኣኽራሲኻ እን ኪድጝሊ ቅንብልቲ። እን ንሪ ቀንበልደውሲ ከትከትሎም እማ ሽካ ኪሎግራም ስክም ኣዅዅላ። 18 ምኹርዶኻ ታንተርወትል ዐርቲ፡ ንር ተንሺኒኻ እን ንሪ ቀንብልደውሲ ቋልቲ ፥ ሩትኻ ብትሮ ከብተውስ ፍድሮ ኡቲላ። 19 ንር ተንሽኒኻ “ንኪ አዊል ቅንብልድዅን፧ ኣዊልኻ ከደምርዅን፧ እን ኣስተብሃልዳዅኪ ገውርሳዅ ኣኽን” ይቲላ። ንርኻ “እን ንኪ ንዲ ከደማዅ ግርዋ ቦኤዝ ይስተኩ” ይሮ ኣውዲ ከደምረት ንረ ተንሽኒሲ ድዊትላ። 20 ናእሚ ንርዅረድቊት “እን ህንበውዲ ክረውዲት ኒብሕልተስ ባርጋዅ ቦኤዝቲ ገውሪኒት” ይቲ። ድምሮኻ “እና ግርዋ ኒን ይናወንደ ግን፥ ከበውልድናኽት ለወውልድናኽር ግን” ይቲላ። 21 ሩት እን ሞኣባያኒኻ “ ንታ ኒዊክ እሽርና ድጝስትራሲ ይሸቃሎዲ ጨግዕስቲ ይዅለ ይቲላ። 22 ናእሚ ይኸ ሩት ንርዅረድ ቚት “ይቊራ፡ ኣሪ ኪድጝሊ ኣዳም ዓመጭጊንኪ ፡ኒ ሸቃሎድ ሰገርና ትክያዅ ግን” ይቲላ። 23 ስክምዲ ስርናይዲር እሽርና ድጝስትራሲክ፡ ቦኤዝሪ ሸቃሎደ ኣኽሮ ከብሮ እርግቲ። ንር ተንሺኒድኻ መንደርትሩ ሰጘቲ።