5

1 Tumaniye ngoku mibhili yaatu eni eghi eli nga kajalajala ekuhuw'o tukakukuwa, Luhanga akutuha mubhili mpyaka ya bhilon'ebhilo eghi eli nga numba mweghulu eghi bhantu bhatakwenye, noo naye enini. 2 N'endindi tukwete kwehumiya ntwekumbula kubha na mibhili mpyaka y'omu eghulu. 3 Ntwabhaye na mibhili yatu mpyaka, tukubha nga bhatu abhabhagha mihina toli bhalwete. 4 Kandi tunali na mibhili yatu eni tukwethumiyagha na kutu ntula. Taghali majima ngu tubaliye kukuwa noo tukubalagha Luhanga kutuha mibhili mpyaka f'omweghulu, nikuwo mibhili eghi ekuhuw'o aghihindulemu eghi etakuhuw'o. 5 Luhanga enini niye akatuhanga ali na kighendeleluwa kyakutuha mibhili mpyaka, kandi atuha moyo ahikilije nga musimbo kutugumiya. 6 Nabhweki kuhikilija owatu kukukalagha kunagumiye kandi tumaniye ngoku tunali mu mibhili ya munsi, tatukahikiye eka ewaatu hambali mukama waatu akukalagha. 7 Eki nikiyo kikulekagha tuukala tunahikilije nankabatuta mubhone. 8 Tungumiye, kandi tukwekumbula tukuwa tulugha mu mibhili eni tughenda muka yaatu mu eghulu kuukala hamui na mukama waatu. 9 Nabhweki kighendeleluwa kyatu nkukola ebhimudhedhiye nankabatubha tali bhomili kedha baa. 10 Nanga etuwe bhona tukulaghiluwagha kwemilila mu maso gha Kilisito kutwiluwa musango, toli bhuli omui alitunga eki abonganuwe habhwa bhintu bhilungi kedha bhibihiye ebhi akoliye anakaye. 11 Tumaniye ngu bhantu bhabonganuwe kuhutiya mukama, nikiyo kikulikagha tubhekambisiya kuhikiliya mukama, Luhanga atumaniye ngoku tuli kandi nimaniye naanu mukimaniye dhee. 12 Tanibhuwo twaleng'o kwebhugh'o kusemeye, noo ndutwabhaha haa kutandikila kwesinda haabhwatu nikuwo mugube kukukamu abhakwesindagha habhwo bhkoluwa bhyabho, mu kikalo kya kwesinda abhwa mitima yabho kusemela ewaa Luhanga. 13 Ntwabhaye tutabukiye banji ngoku bhakwete kughila, ni habhwa kukola ebhi Luhanga abaliye, ntwabhaye ntubhugha ebhitekane ni abhwakubhaghasila enuwe. 14 Tukukilagha bhwona abhwa kukunda kwa Kilisito atughiliye, nanga tumaniye ngoku atukukwiliye etuwe bhalikilija bhona, bhwonuli bhwa bhantu bhambele bhukakuwa. 15 Akakwila bhahikilija bhona nikuwo etuwe tutakoloo abhwkutakola ebhitudhedhiye, bhantu tukole ebhidhedhiye Kilisito oghu akakuwa kandi atodha amuhumbula. 16 Kutandikala endindi tatukyelilikanoo ngoku bhantu bhali ngoku abhatalibhahikilija bhakubhelilikanagh'o. Nankaba twelilikanagho nga muntu kwonkaa, endindi tatukamwelilikanoo tutiyo bhaa. 17 Nabhweki muntu wena nabhaye ali mukilisito, akubhagha kihaanganuhuwa kihiyaka; mwomili bhuwe bhwambele bhukubhagha bhuhoyoo atandikiye bhunzi bhuhiyaka. 18 Bhwomili bhuhiyaka bhukulughagha ewa Luhanga oghu akatwekukilija enini abhweki Kilisito atukaleye toli etuwe akatuha mulimo ghwa kulanilila bhantu ngoku bhangukukanamu naye. 19 Nanga Luhanga akali alimu Kilisito takutodhagha abhona abhali na bhibi mu maasao ghe toli etuwe atuhaaye mulimo ghwa kulonilila bhutumuwa bhuwe bhwa kukukanganamu na bhantu. 20 Tuli bhakwenda bha Kilisito, kandi Luhanga akututumagha kubhaghambila ngoku akwete kubhesengeleliya kutegheleliya bhutumuwa obhu. Nibhuwo twabhesengeleliya ngoku Kilisito enini angubhesengeleliya: mukukanganemu na Luhanga. 21 Akamugola muntu ogu atakoliye kibi kyona kubha kihonguwa kyabhibi bhyatu, nikuwo abhwa kuhikilija Kilisito tubhe abhahikiliye ewa Luhanga.