Kishakwa 3

1 Ukekengeza baandu kuke boterera imbere lya bagweete buhashe ni misii nukuke bakeenga kuguma nyu kwi yengerekeza ku kazi mikolwa miija. 2 Batake duuka ulumba muundu, batabe nya malongwe, baabe nyi mitima miija nyu kukekweresa kuboterera siriri kwa kazi yeeshi ulumba muundu. 3 Kulya butazi neetu geeke twaali bahwiija, kaandi bateengu abali mwi tebo, lyo twalike twalwa nyi nyifiijo izi belelukene zi biindu, twali lamire mu kati lyu bushasha nya mahubi, twalike kuniiza n`uku shombana. 4 Ti lero lyo bwiija bwage Mukuluzi weetu Muungu n`ukutusiiima kwaage twe beenebaandu lyo bikiji wikulwa, anya tukulula. 5 Atali mbu weenge hali ngolezi nyiija tuka kola twe bayuuno, tianali hanyanya li mboonga zaage, mukushukwa nyu mukubutwa kwa kabiri lyo tugirwa buhyahya ny`uMutima mweeru; 6 ye twaali bulagirwa siriri nyaliye mukulengera mukati ka Yeesu mukuluzi weetu; 7 lyo tuzigi buziwa ko tumenene kushimbana ny`imbooga zaage lyo leero neetu twiiji kwiimira kalamu ki miaka ni miakula, kona kalangalizi keetu. 8 Bino bili by`ukwemerwa, nya kaandi nzimire ukanie kukebigokomeza kubiwirana ko beemezi ba Muungu ba`lame mu kukeeba nyi ngolezi nyiija. Yuko kuli kwiija nya kaandi kugwete buunguke imwa benebaandu. 9 Ti koke wiyeeke i binwa ibitagweti buunguke, nyageke miazi yi milala, nya malongwe nyi mbaka izilozire migako. Kulya yibyo bitikala nyubuunguke nya kaandi bitagweeti simiko. 10 Wamanyi shungula katazi nya kabiri kooshi , ukejaanda muundu wukuke deeta ibitumeneni; 1 kuly`umanye ko muundu ukola yuuko miira ahabuka, nya kaandi akola mu mahubi, kulya yenene ye iyaaza kw`ali muhubi. 2 Hano nyatuma Aritema imwaabe kaandiri Tikiko, wikanie wij`ino ndi i Inekopoli; kulya nyifijire kubera yo mwi bishazi bi mbeeho. 13 Ukatabale Zena, uye mutwi wimaaja kuguma nya Apolo mu kubalama kwaabo, maashi batanguhirwe nya kaandu kiri. 14 Benewetu nyabo geeke biyiigize kulama mu kukekola ngolezi nyiija, nyukuke kolesa biindu mu kumenene, lyo batagosheke ko mahuu. 15 Baandu booshi abali kuguma nanie bakulamusa. Utulamukize balya abatusimire mu kati ku bwemere. Lukogo luberage kuguma nya mweshi