¹ .Polo la Timote baombo bana Yesu Masiya,eneyali,banoeka bahatu banayali eneyali Masiya Masiya Yesu ena Filipoi l'eneyali bingambi ko la ba on'akono: ² Isei eneyal'ino la mwi eneyali Yakomba bafango'oniso la Nkolo Yesu masiya. ³ Lakanga Yakomba enami lokango biina liina ekokanely'emi. ⁴ Bisike bihitu,en'oondemi loondo lonakoondelemi inaatu loonda nko l'enyanga. ⁵ Latsin'oka ino baambambamaki l'emi ena nsekolya ena bosimo bon'olotsi eniina bonoso yengo nko esike ene. ⁶ Emi mpaate yoi line ntaango,emite,ende onomatsaki ekambwa enolotsi eneyali ino ango kolany'eho nko nkolana yengo nko bin'oho bona Yesu Masiya. ⁷ Ko akoli eneyali emi nkanelye yokoho latsina enin'atu;latsin'oka ino boyali ena lokanyi l'on'otema bonami:kang'enonyolo bonami, kang'en'oloko bona lokol'emi latsina ena bosimo bonolotsi ko lekikelyo ena boho,inaatu boyala laondo l'emi en'isei. ⁸ Yakomba ayali temo enami ena bokotwa bona kook'em'inatu mposa la tosei tona yesu Masiya tona toleki. ⁹ Kolonda Yakomba yokosamb'one emite nganji enino ena lolango efulake la mpula eneleki ena nonganya l'ena mpokola ehantu. ¹⁰ Latsin'eho bofokola baoyi banaseke bolotsi;latsina boyalame bato bana soto bafana ekumbelo yengo nko biin'oho bona Masiya. ¹¹ Ko bololyama la bemamo bena mbongi benatama la Yesu Masiya ,latsin'ena bokonde ko la lokumo lona Yakomba. ¹² Koko lakina bifili lalanga latsina beey'oka baoyi banilamaki eneyali emi bamoyalama nk'en'ekikelyo enekambwa en'osimo bonolotsi. ¹³ Ko yokoho benyoolo benami latsinena Masiya bemenya fololo eneyali boloi bohotu bona basoola ko l'eneyali bato bamonyi bahaatu. ¹⁴ Ko biike bonoleki bona bifili biniyali eneyali Nkolo bamokika lotsili latsin'ena benyoolo benami,ko bamoyala la nkaso mene eneleki latsin'eho batenda yoi lina Yakoma enofolu. ¹⁵ Sosolo bat'oamoi baosekolya yoi lina Masiya l'okotwa bon'ekuku,loona ntaango;ko bakina baomokumya la ndanga enolotsi. ¹⁶ Bane baomokumya langanji ena lolango,latsin'iyo bamey'oka emi milama latsin'eho ndokole beloko latsina en'osimo bonolotsi. ¹⁷ Koko banyi baosekolya yoi lina Masiya la ntaango efa lootema bonakolana,latsina eniyo banakanely'oka bambotela emi biino binileki ena bonyoolo bonami. ¹⁸ Iya nai?nko la bekotwa behetu kanga la mpotsi kanga la sosolo,Masiya aosekolyama;ko emi la nyangela yoi liho,ko nongo nyangela liho. ¹⁹ Latsin'emi ley'oka yoi line lingo mbotela emi etungwelo latsin'ena beondo benino ko l'ekikyelo ena bolimobona Yesu Masiya, ²⁰ Yoka bosambo bonoyali lolengelyo lonami lona lengelyemi la mposa ko la ndjimelya enami, emite mpokaki nsonyi ena yoi limoko tu,ohonde yok'onokiso ena bisike bihitu enesik'ene nkoho,kanga lambika kanga la mbwaka. ²¹ Latsin'oka eneyali emi mbika eyali nko Masiya ko mbwaka eyali nko nkita. ²² Koko yombo mbika ena yonge-yombo ekikyelo eho eyali nko bemamo benosala bonami,mpeye yoi lina linda m'osala. ²³ Koko la kandakanda eneteny'aoyi bahafe looka mposa mene latsin'eho,ko njale la Masiya:yoi liho lileki bolotsi nko ndeka mene. ²⁴ Koko lakina,yoi lina lileki bolotsi mekino nko latsina eho nkuse liyala ena yonge. ²⁵ Emi molaata njimelya ene,ko l'ey'oka nongoyala ko nongokusa liyala l'inoatu,latsina ena efuelo enino ko l'ekiko enono enimelyo iho; ²⁶ Latsin'eho lokumo lonakumy'ino lofule eneyali Masiya Yesu latsin'enami,latsina enengemi oyala lino lakina. ²⁷ Koko ekoli latsina bikambwa binakambino bikolane lokotwa bon'osimo bonolotsi;latsin'eho,kanga loya oyoken'ino,kang'emi mpayi,njoke baoyi banino mbo ino bemali lalotsili ena bolimo bomoko,ko botsua eniita la lokanyi lomoko latsina en'iimelyo ina bosimo bonolotsi; ²⁸ Ko bofoke basimbi banino losomo tu bokotw'oho boonde ndembi ena fololo enehelyo eneyali'iyo,ohonde ndembi ena liiko eneli ino ko ndembi eho eoya nk'eneyali Yakomba; ²⁹ Latsin'oka etelo emofama eneyalino latsin'ena Masiya efa latsinena baimely'ende kei,ohonde latsina banole banayali lende l'ino nkoho. ³⁰ Ko ino boyali ena biino bin'ekend'enaka eneyal'emi ko binokino isanga biho biyali eneyali emi.