1 Cikone wehe, oyigirize ebishimbulire enyigirizo zishinganine. 2 Obwire abashosi baba balugero, babukenge, na kugerêreza bwinja, bantu bqazibuhire omu bwemere, babe n'obuzigire n'obushibirizi. 3 Kwo n'okwo, obwire abagikulu babe ba borhere bwinja bw'abantu bimana. Barhagwasirwe babe ba kalimi erhi kukanywa amavu bwenene. Bagwasirwe okukayigiriza ebiri binja, 4 lyo abahya bayigirizibwa okuzigira b'îba n'abana babo, 5 n'okuba n'engererezo nyinja erhi zinacîre, n'okuba bakukombera enhumpa zabo, na bantu ba mirhima minja, balya b'okukenga b'îba, lyo harhag'iba omuntu w'okuderhera akanwa ka Nnâmahanga kubi. 6 Ohanule emisole nayo babe bîrhonzi muli boshi. 7 Nawe wene obe lwiganyo omu bijiro binja, enyigirizo zawe zirhahushikanaga, banakâzikenga. 8 Okolese ebinwa bishinganine birya barhankaganya, lyo enshonyi zibumba abashombanyi bawe, bulya barhâbone okubi bakuderhera. 9 Kukwanine abashizi bakenge banahamwabo n'okukabasîmîsa omu ngawi kantu. Barhagwasiri okûkabajisa kadali. 10 Barhagwasirwi babazimbe akantu, ci oku biri, bagwasirwe bagandekerere okucîyerekana oku bali bantu ba mirhima minja banali bikubagirwa, lyo ngasi nyigirizo ziyerekire Nnâmahanga Muciza wirhu zikengwa. 11 Bulya Nnâmahanga ayerikine olukogo lwage, lyo iriba ly'obuyokoke bw'abantu boshi, acîyerekine. 12 Lunarhuyigirize okujacika obubi n'amagene g'eby'enigulu, lyo rhuba n'olugero lw'okuleka byoshi, obushinganyanya n'obukombedu omu bya Nyamuzinda muli aga mango rhuciri en'igulu 13 oku rhudwirhe rhwalinga okubona lirya iragi rhulangalire n'okuciyerekana kw'irenge lya Kristu Yezu na Mu iza wirhu. 14 Yezu acihanyire yene erhi rhwe rhurhuma, mpu lyo arhuciza kwo ngasi bubi, abulig'inarhujira lubaga lushukule, lulya lukola lwage yene, lunali lushibirize, lyo lujira emikolo minja. 15 Yunvagya ebi ogwasirwe oyigirize omu kukolesa obuhashe bwawe woshi. okâbukolesa omu kushibiriza abantu bwosshi bali bakuyunvirhiza nisi erhi omu kubakalihira. Omanye orhalekaga muguma muli bo akugayaguza.