1 Ijesu mẹ karẹyi ẹnẹni ta da, dọ kaa yi eziafụ aani ka, 2 "Waa yẹ ki inaama ẹkụshi ẹẹvạ, upe ọpiparafụ aa vẹ, ẹ vaa si Ozi Ọza chire wa ụvọ, doti a kani ọ za ọchi avashi." 3 Di ọdọvidi arụfa nini ọnri azẹkụ nini, pere ẹngwụ gụ ini ivishẹ oshirẹsụ arụfa anaa shi Ikayafasi. 4 Dẹ shọma ẹ mẹ vaa si apẹ za Ijesu doti ẹnẹ wu ̣ọ. 5 Fụvọki ẹ kaa ka, "Ọzi vi a maa rupe aani, doti asi efura na yinaani ini akaakana aza. 6 Ụmọni Ijesu yi Ibẹtani, ineeshi Isaimọni ọna vi ọnikụ ọbani, 7 ọ mẹ yatụ, dọọ risari, di ọnyẹnẹ ọnyi ana za ipanava eturari ọkatarishi ve tu Ijesu, dọ va a shi o irẹsụ. 8 Ama eziafụ aani me re, dẹ mọikụ, dẹ ka, "Sẹnẹvẹ da maan za isa, dee mioishi kẹ?" 9 A yaan zụ na, de re ẹkẹshi ebebani finaani, daa si ọ yi onriwa nini." 10 Ama Ijesu, ọ yẹ inẹ aanini, dọ kaa yụ wa ka, "Ọmẹzi dụ wa kụọkata ọnyẹnẹ ọnọni ẹngwụ nin kẹ? Isa ozoza ọnọ mẹ yi mi. 11 Ẹfi bo ọni onriwa nini si yape wu nini, ama aivi ẹfi bo ọnim va sii yaa pe wu nini. 12 Fụvọki ọ mẹ va eturari ọnọ shi mi ẹngwụ, ọ mẹẹ yi onine mi. 13 Ini irẹiza, ma kaa yụ wụ nini, irasha tụrirasha ana ra yaa karẹyi irenube ọiza ini ẹshẹ keekere, isẹni ọnyẹnẹ ọnọni mẹaani, vana vas ii karẹyi, daa siọ tamayi aani. 14 Ụmavọ di ọnya ini ẹnẹwụrẹva, ọnaa shi Ijụdasi Isikariọti, ne tu oshirẹsụ arụfa nini. 15 Dọ ka,"Sụ vaa si yi mi nini, di ma si ọ chire wu nin ụvọ?" Dẹ mọ ẹkẹshi isiriva ofurẹẹwụ yọ. 16 Fụrụmavọ, doo si oze ọ mẹ vaa si Ijesu chire wa ụvọ. 17 Umonotu, ini ọkụshi ipaapa upe ivụrẹdi one reme wu, di eziafụ Ijesu ve tu o, dẹ fọ ọ ka, "Izẹnụ we si ki ye teni tẹtẹ ọnụ va yaa ri iṣari upe ọpiparafu kẹ." 18 Dọ ka, "Waa nọ ini iboro ne tu ọnọrụ ọnyi, dụ wa kaa yọ ka, 'Ọzụọzisa ka, "Ẹfi ami ọ si kavape, ini ireshi awụ ọni ẹmi ri eziafụ ami va yaa ri Upe Ọpiparafu.'" 19 Di eziafụ Ijesu na mẹ isẹnọ ka yụ wa, dẹ na mẹ isari Upe Ọpiparafu. 20 Oruva me tu, di Ijesu ọnri eziafụ aani ẹwụrẹva yatụ, ẹnẹẹ vaa risa. 21 Ẹ maa risa, dọ ka, "Irẹiza ma kaa yụ wụ nini, ozenya ini awụ nin vaa si mi zụ." 22 Di ẹnbo karẹsụshi, di ọzọnyọnya aanini vẹrẹ aa fọ ọ, ka, "Ananyimi, inirẹiza, ọzi vi ẹmi, navẹki ẹmi yọ?" 23 Do voshi ka, "Ẹzẹni ẹmi riọ gẹ aa jụvọ ngwụ ọnyọnya ọnọ vaa si mi zụ. 24 Ozi Ọza vaa na, vene amẹ chẹrẹ inọpati aani. Ama oodụkụ ọzọnọ ana va zirẹngwụ aani si Ozi Ọza zụ! Ọ yaan dashi fu ki azẹzi ma ọzọnọ." 25 Di Ijudasi, ạna vaa siọ zụ, fọ ọ ka, "Ẹmi wa yọ Ọzụọzisa?" Dọ kaa yọ ka, "Waa si irenụ awụ kaa da." 26 Ẹ maa risa, di Ijesu si ivụrẹdi, do tụozụrenụ ẹdabẹrẹ tụọ, dọ da a, Dọ siọ yi eziafụ aani, dọ ka, "Dọ, ri ọ nini. Ọnọni ọnọ vi ẹngwụ ami. 27 Dọ si ipa, dọ mẹ avọkụ, dọ siọ yụ wa, dọ ka, "Fuo nin, ẹwụ nin bo. 28 Fụvọki anya irẹzẹ ami yi, ana va shẹtẹ yi azẹrụrụ, ana va sii si aichama vaya aza. 29 Ama ma kaa yụ wụ nini, me zi kue fu ini ẹtụtụ eche ̣iwaini ọnọni netu ọkụshi ọnọ, ọni ẹmi rẹwụ nini ve gee fuo ini ọwọọwa, ini ijọva Adami." 30 Ẹmẹ jashẹ ụga da, dẹ jinẹ tụra nọ ini rẹsụfa Onivi. 31 Ụmavọ di Ijesu kaa yụ wa ka, "Ẹwụ nin bo vaa va fụrẹ mi irama irafụ irajini, fụvọki a chẹrẹ ẹ ka, 'Ụvọ vaa za ọkụatẹmẹri, di atẹmẹ aani bo si garashi,' 32 Ama ẹfi ana ra sha mi kwẹẹtẹ, mvaa dọvidi awụ nini nangwụ Iganini." 33 Ama di Ipita kaa yọ ka, "Aza bo ra va fụrẹ wụ rama, ma zaa vaa fụrẹwụ rama vụụvụrụ." 34 Di Ijesu kaa yọ ka, "Inirẹiza, ma kaa yụ wu ka, irafụ rajini, doti ụkọkọrọ ọ va tangwa nowu, u vee yi mi tẹtẹ gụ ụpẹẹta." 35 Di Ipita kaa yọ ka, "Shi mee deke vee su fụvọ awụ, me zee yu wu tẹtẹ. Dosivi ki, irẹyi ọnyọnya ọni ẹnbo ka. 36 Ụmavọ, di Ijesu ọnri eziafụ aani nọ irasha anaa shi Igẹtsimani, dọ kaa yi eziafụ aani ka,"Yatụ tụzọni nin, doti ma nọ akajinẹ na tụozurenu." 37 Dọ si Ipita ọnri ezi Izebede ẹviva bẹrẹ ẹngwụ, di inẹ aani si du, di ẹngwụ aani si vashi. 38 Ụmavọ dọ kaa yụ wa ka, "Inẹ ami o du kokoro netu ki mee vee su. "Dinẹ tụzọni, we pe mi sieyipetẹ nin." 39 Dọ kavanọvidi che, dọ veyi kụẹtẹ, dọọ tụozurenu. Dọ ka, “Adami, aaviki ọ va vii mẹ, navọ di ipa ọnọni ọ paramifu. Ọzi vi mme sio, ama u me sio.” 40 Do ve tu eziafụ aani ki ẹẹ sụara, dọ kaa yi Ipita ka, "Ọmẹzi du wei zu pe mi sieyipetẹ tu iwakati ọnya kẹ? 41 Sieyipetẹ, dụ waa tụozurenu, doti asụụ na ngwụni azamare. Ini irẹiza, ifẹ ee si, ama ẹchiẹngwụ ọzi zẹẹ.” 42 Ọ varama na ụpọfụụva, na tụozurenu, dọ ka, "Adami, aạviki ọnọni ọi zụa paramifu, ọchishi kim fuo, osisi awụ ọ vi ọmimẹ.” 43 Ọ me varama vẹ, do ve tu wa ki ẹẹ sụara, fụvọki ara ya wa eyi. 44 Dọ zẹ fụrẹ wa ụvọ, dọ na tụozurenu ụpọfụụta, dọviki irẹyi ọnyọnya ̣ọnọ ka. 45 Umonotu di Ijesu ve tu eziafụ aani, dọ kaa yụ wa ka,"Ụ wa sii sụara, du wee shifẹ nini?" Re, iwakati ọnọ o si tu, ana va si Ozi Ọza chire anaichama nin ụvọ. 46 Kwẹẹtẹ nin, di yaa na. Re, ọzẹna vaa si mi zụ, ọ si gụrẹ yi." 47 Ọ ma kii karẹyi, di Ijudasi, ọnya ini eziafụ aani ẹnẹwụrẹva vẹ. Di azọkọni vaku o fiidi oshirẹsụ arụfa nin ọnri azẹkụ nin. Dẹ kụ orobo ọnri itakovi chaụvọ. 48 Inaani, di ẹzẹna vaa si Ijesu zụ kaa yụ wa ami ọnọ vaa mẹ, dọ ka, "Ọza ọnim ra sirenu kurenu aani, ọni yọ, dụ wa za a nin." 49 Ụmụmọ do ve tu Ijesu, dọ ka, "Maa kụ wụ, Ọzụọzisa," dọ sirenu ku o irenu. 50 Di Ijesu kaa yọ ka, "Ọtami, mẹ isa ọnuụ fụvọ aani vẹ." Inaani, dẹ vẹ, dẹ va za Ijesu. 51 Re, di ozenya ini ẹnẹna ya bẹrẹ Ijesu tụ itakovi, dọ ka ozida oshirẹsụ arụfa yọ, dọ daa ụtọ kụra. 52 Inaani, di Ijesu kaa yọ ka, "Ka itakovi awụ varama ngwụni ishi aani, fụvọki ẹnẹna si itakovi wụ ọza, itakovi ana va sii wụ wa. 53 Ụ wa kẹni ki mai zụa shi Adami, ki ọ tụ angẹni nin ene funa inijọni ẹwụrẹva vẹ ọmẹyani? 54 Ama isẹna chẹrẹ tẹtẹ ọzaa vara ọmimẹ, isẹnẹni razi mẹ?" 55 Ụmavọ di Ijesu kaa yi azọkọni ẹnẹ ka, "Fụvọ ami ọnụ waa si kụ itakovi ọnri orobo vẹ, kụ wa vaa za mi venebiri oyi nini? Ẹyinieyini ọnim sii yatụ tụni Itẹmpụrụ, di maa zụ ạza isa, ama wa zi vaa za mi nini. 56 Ama isẹnẹni bo vana mẹ doti isẹni ọkisẹ nini chẹrẹ tẹte,̣ ọ zụ gẹ." Inaani, di eziafụ aani bo fụrẹụvọ, dẹ kụafụ kụechi. 57 Di ẹnẹna za Ijesu va a tụọvidi nọ idi Ikayafasi oshirẹsụ arụfa, izọni ọyofi ọnri azẹkụ nini pere ẹngwụ gụ tụ. 58 Ama, di Ipita vatụra a fụri irasha ọgọdọ fiini ofenje oshirẹsụ arụfa. Ọ ngwụ ireshi, dọ yatụ pe oserẹtẹ nini, doti o re izẹnọ va nyi irẹsụụ tụ. 59 Ọmẹyani arụfa ọbani nin ọnri azẹbani nin bo venee si oze ana va sii divenu apinẹ ku Ijesu, doti e roze wụ ọ. 60 E zi ve re ivenu ọnyọnyi, shọmẹ daka vi ki onivenu anapinẹ ẹrụrụ ẹ jinẹ vẹ. Ama, umonotu di azẹnẹẹ̣va jinẹ vẹ, 61 dẹ ka, "Ọzọnọni ọ kaa ka, 'Mve zuu wu Itẹmpụrụ Oshomoshi, dim si ẹkụshi ẹẹta da a varama.'" 62 Di oshirẹsụ arụfa kwẹẹte, dọ fọ ọ ka, "Wa zi nyi oshi ọ nụ vaa tụụ?" Irẹka isenẹẹ kụụ ku wu aani kẹ? 63 Ama di Ijesu chiiji. Di oshirẹsụ arụfa kaa yọ ka, "Ma si ụmọ kaa yụ wụ ini irẹsha Oshomoshi ana nyi ifẹ, kaa yi yi, ẹwụ ọnọ wa vi Ikristi Ozi Oshomoshi?" 64 Di Ijesu voshi yọ ka, "Wa si irenu awụ kavọ da. Ama, ma kaa yụ wụ, fụrụmaani na, ụ ve re Ozi Ọza ka ọ yatụ tụni akụvọri ụkata, dọọ vẹ ini egushi ẹbẹẹba." 65 Ụmavọ di oshirẹsụ arufa na auru aani, dọ ka, "Ọ ka isaanyisi! Ọmẹzi dii kụe sii si onivenu nin kẹ? Re, ọmẹyani, wa wụ isaanyisi ọnọ ka da. 66 U me ro nin kẹ?" Dẹ tụoshi ka, "Ọ sẹrẹ ka o su." 67 Dẹ jatẹ kụo-eyi, de tuo, dẹ nya arifẹ, dẹ ka, 68 "Ẹwụ Ikristi, kisẹ yi yi. Ẹnẹ nya wụ isa kẹ?" 69 Efiavọ Ipita ọ yatụ tụni ofenje, di ozida ọnyẹnẹẹ ọnyi vetụ o, dọ ka, "Ẹwụ ọnọ zẹ yi yape Ijesu Iganini." 70 Ama do yi ineyi azabo, dọ ka, "Ma zi yẹ inọpati isẹnụ waa ka." 71 Umọnọ jinẹ nọ ini ọchọfọ, di ozida ọnyẹnẹ ọsa ze re, dọ kaa yi ẹnẹna yizọ ka, "Ọnọrụ ọnọni ọ zẹ yi yape Ijesu Inazarẹti." 72 Do yi, dọọ shiekụ, dọ ka. "Ma zi yẹ ọnọrụ ọnọ." 73 Ome ku che, di ẹnẹna dinẹ tụzọ vẹ, dẹ kaa yi Ipita ka, "Inirẹiza, ọnya inaanini ọnụụ vi, fụvọki ụ mẹmẹ aa karẹyi ọ sụ wụ tụẹshẹ." 74 Inaani dọ vẹrẹ e chieku, dọọ shieku, dọ ka, "Mazi yẹ ọnọrụ ọnọ," ụmụmọ di ụkọkọrọ nowụ. 75 Di Ipita tamayi irẹyi ọni Ijesu ka tụrama ka, "Doti ụkọkọrọ ọ tangwa ve nowu, u vee yi kụ wa zi yẹ mi gụ ụ̣pẹẹta." Inaanị, dọ jinẹ nọ ini ẹshẹshẹ, dọọ naa jiorere.