Imatiu 25

1 Ụmavọ, ijọva ineeku vee vene ezi anyẹnẹ ẹẹwụ ana razi yi yẹ ọnọrụ ana si irakọpa aanini, de ne tu ọmụsha ana shẹshẹ aa nyọnẹẹ. 2 Ẹnẹẹshi vi ọnụra, di ẹnẹẹshi vi ọnụvira. 3 Ẹnẹna vi ọnụra mẹ si irakọpa aanini, ẹ zi za angwẹ chaụvọ. 4 Ama ẹnẹna vira mẹ si irakọpa aanini, ẹẹ za angwẹ tụni isa chaụvọ. 5 Ẹfi ọni ọza ọna vaa nyọnẹẹ razi vi vẹ, di ẹnbo aa sụara. 6 ‘Ama inajirafụ, de showu ka, ọza ana vaa si ọnẹẹ ọ vẹ, jinẹ vẹ, vee ne tu o nini.’ 7 Inaani, di ezi anyẹnẹẹ ẹnẹ, ana razi yi yẹ ọnọrụ kwẹẹte, de teni owu rakọpa aanini. 8 Di ẹnẹ na vi ọnụra dipẹ yi ẹnẹna vi ọnụvira ka, ‘Daka si angwẹ yi yi, fụvọki ọpa ayi ee mii na." 9 Ama di ẹnẹna vira tụoshi ka, ‘Ọmẹ vi ki ọ zaa fụ ẹyi ri ẹwụ nini, na we ne tu ẹnẹna na angwẹ, doti wa shi yi ẹngwụ awụ nini.’ 10 Ẹ mẹ jinẹ na shi angwẹ, di ọmụsha ana nyi ọnẹẹ vẹ, di ẹnẹne teni ẹngwụ aanini tẹtẹ, vatụra a na ngwụ izẹnẹ yaa rupe, de guoze. 11 Inaama aani, ẹnẹnavọ mẹ varama vẹ, dẹ ka, ‘Ọga ayi, ọga ayi, na oze yi yi.’ 12 Ama, dọ tụoshi ka, ‘Irẹiza maa aka yụ wụ nin, ma zi yẹ wụ nini.’ 13 Fụvavọ, sieyi petẹ nini, fụvọki wa zi yẹ ọkụshi navẹki wakati ọnọ. 14 O vene ụmọni ọnọrụ ọnyi a vaa jinẹ nọ irẹkụravabẹ ọsa, dọ shi ezida aani, dọ ga ogu yụ wa. 15 Dọ si ampo ẹẹshi yi ọza ipaapa, dọ si ampo ẹẹva yi ọzọfụụva, dọ va si ampo ọnya yi ọzọfụụta. Di ọzọọza dọ ọpa ẹkẹshi ọna mọrọ ọyiyẹmẹ aani, di ọnọrụ ọnọ zi naasha. 16 Ọna dọ ampo ẹẹshi, ọ si ayaani sofu, dọ riọgụ ampo ẹshi tụra a. 17 Avọ ọni ana dọ ampo ẹẹva mẹ zẹ si ayaani sofu, dọ riọgụ ampo ẹẹva tụra a. 18 Ama, di ozida ana dọ ampo ọnya na chi ụsi, dọ si ẹkẹshi ọga aani tụọ. 19 Ọ me si ku kokoro ọni ọga aanini naasha, dọ varama vẹ, dọ ka, ezida ẹnẹ ẹ va m ẹ ishuro ẹkẹshi ọnọ si yụ wa kẹ si sofu. 20 Ozida ana si ampo ẹẹshi yi, ọ si ampo ẹẹshi ọsa tụra vẹ, dọ ka, ‘Ọga ami, wa si ampo ẹẹshi yi mi, re, ma riọgụ ampo ẹẹshi tụra a.’ 21 Di ọga aani ka, ‘Nyarụkọrọ, ozida ọiza ana dọrenu! Wa siọ zụ ki a va zụụ dọ wụ renu ini isa che. Mva si isa ọrụrụ chire ụvọ. Ngwụ ireshi vẹ, we ve pe mi jụjẹ.’ 22 Di ozida ana dọ ampo ẹẹva vẹ, dọ ka, ‘Ọga ami, wa si ampo ẹẹva yi mi, re ki ma riọgụ ampo ẹẹva ọsa tụra a.’ 23 Di ọga aani ka, ‘Nyarụkọrọ, ozida ọiza ana dọrenu!" Wa si ọ zụ ki a va zụụ dọ wụ renu ini isa che. "Mva si isa ọrụrụ chire ụvọ. Ngwụ ireshi vẹ, we ve pe mi jụjẹ.’ 24 Inaani, di ozida ana dọ ampo ọnya vẹ, dọ ka, "Ọga, ma yẹ wụ ki ọza anaa teyẹtẹ ọnụ vi, izẹnụ rezi chire tụ, ọnụ yaa fa, du wee pere izẹnụ rezi ye che ẹtụtụ gara. 25 Angwa ono shimi, ọnọ mẹ ki ma na chi ụsi, dim si ẹkẹshi awụ tẹ tụọ. Dọ mi isa ana vi ayawu. 26 Ama di ọga aani tụoshi, dọ ka, ‘Ozida ọkụmi ọshimi, wa yẹ ki izim rezi chire tụ ọnim yaa fa, ọnri ki izim rezi che gara tụ, ọnim yee pere.’ 27 Fụvavọ, ụ yaan si ẹkẹshi ami na tụneeshi ẹkẹshi; mmẹ vẹ aani, dim yaan dọ ẹkẹshi ami varama ọnri ọtụụrẹsụ aani. 28 Fụvavọ, dọ ampo ọnya ọnọ fiinụvọ aani, dụ wa siọ yi ozida ana nyi ampo ẹẹwụ. 29 Fụvọki ẹzẹna nyi vana vaa nyi tụọ, dọọ nyi tụọ kokoro. Ama ẹzẹna razi nyi isọnsọnyi, isa che ọnọ nyi vana va dọ fụrẹ ụvọ. 30 ‘Ne ozida ana razi zarẹsu ọnọ ngwụni oozi ẹshẹẹshẹ, izọni orere ọnri anyi ọriri vaa ya.’ 31 Ụmọni Ozi Ọza ọnri angẹni aani vaa vẹ ini ụga, ụmọnọ dọ yatụ tụni ogede ụga aani. 32 Anẹshẹ bo keekere vee peregụ tụni ọvidi aani, dọ vẹrẹ, dọọ tụ aza fiini aza venebiri ọkụatẹmẹ ri, mẹ tụ atẹmẹ nin fiini akaakana ẹvụ. 33 Ọ vaa kụ atẹmẹ tụni akụvọọri, ama dọ kụ ẹvụ tụni akụvọọfa. 34 Ụmavọ di Oshinọyi kaa yi ẹnẹna yini akụvọri aani ka, "Waa vẹ nin, ẹwụ ọni Adami si ẹdabẹrẹ yi, va ngwụni kụ ijọva awụ ogu; ijọva ene teni tẹtẹ yụ wụ fiini ẹfi ana fụrẹ si ẹshẹ kẹtẹ. 35 Fụvọki ẹfi ọni ụngwẹ ma kụ mi, wa si isari yi mi; onyi maa kụ mi, wa ka enyi yi mi fu; ẹfi ọnim vi ọzọga, wa dọ mi tụneeshi. 36 Mmẹ tụafụafụ, dụ va ita ku mi ẹngwu; ẹngwụ maa zi mi, dụu si mi kụ; mmẹ yini ijaaru, du si mi vẹ." 37 Ụmavọ ẹnẹna mẹ anasẹrẹ, dẹẹ tụoshi, dẹẹ ka, ‘Ananyiyi, yere ụmọnim si re ki ụngwẹ a kụ wụ, dim si isari yụ wụ kẹ? Navẹki ọnyi ma kụ wụ dim ka enyi yụ wụ fu kẹ? 38 Yere ẹfi ọnim si re kụ wa vi ọzọga, dim dọ wụ ngwụreshi kẹ? Navẹki wa tụafụafụ dim va ita ku wu kẹ? 39 Yerẹ ẹfi ọnim si re ki ẹngwu a zụ wụ, navẹki ụ yini ijaaru, dim si wu vẹ kẹ? 40 Ụmavọ di Oshinọyi tụoshi, dọ kaa yụ wa ka, "Inirẹiza, ma ka yụ wụ nin, isẹnụ ra mẹ yi ọza ene weyi fu, ini ẹnyara ami, ẹmi ọnụụ mẹ ẹ yi. 41 Ụmavọ dọ kaa yi ẹnẹna yi akụvọọfa aani ka, "Tụ fụrẹmeyi nin, ẹwụ nin ene cheku, nangwụ ineeku ira poro pooro, ene teni tẹtẹ yi eshụ ọnri angẹni aani. 42 Fụvọki ụngwẹ maa kụ mi, wa zi si isari yi mi, onyi maa kụ mi, wa ka enyi yi mi fu. 43 Mmẹ vị ọzọga, wa zi dọ mi ngwụ ireshi; ma tụafụafụ, wa zi va ita ku mi, ẹngwu maa zi mi ọnri ka mmẹ yini ijaaru, wa zi va zama mi." 44 Ụmavọ, ẹnbo vaa voshi, dẹẹ ka, "Ạnanyiyi, yere ẹfi ọnii si re ki ụngwẹ navẹki onyi aa kụ wụ, navẹki wa vi ọzọga, navẹki wa tụafụafụ, navẹki ẹngwụ maa zi wụ, navẹki ụ mẹ yini ijaaru, dii razi fẹkẹ wụ kẹ"? 45 Ụmavọ, dọọ voshi ka, "Irẹiza, maa kaa yụ wụ, isa ọnụ razi mẹ yi ẹzẹne weyi fu ini azẹnẹni, ẹmi ọnụ razi mẹ ẹ yi. 46 Ẹnẹni vana vaa ngwụni ụyọọri poro pooro, ama ẹnẹna mẹ isa anasẹrẹ, vana vaa yi inẹshẹ poro pooro.