¹ Waktu Apolos lagek di Korintus, Paulus ngelolok bebeRapai daeRah dah nyak datankg ke Efesus, inya bedapat dongan bebeRapai uRankg mured e didietn, ² Paulus betanyak ke sida'k, "Apaikah iketn udah nerima Roh Kudus waktu iketn pecaya'k?" Sida'k pe nyawab,"Abon , kami pan kalak ninga tontangk Roh Kudus," ³ Paulus pe betanyak, "Lalu, dongan apai ikau udah dibaptis?" Sida'k nyawab," Kami udah dibaptes laga Yohanes Pembaptis." ⁴ Paulus bingan, "Yohanes pembaptes maptes dongan petobatan. Inya ngaom mensia banyak sak sida'k haRos pecaya'k ke siko'k mensia nyang akan datakng seudah nya, yaitu,Yesus." ⁵ Waktu mensia banyak ninga tontankg nyak, sida'k pe nyoRahkan deRe'k e untok dibaptis didalapm nama Tuhatn Yesus. ⁶ Dah nyak pas Paulus menumpankgkan jaRi e, Roh Kudus tuRotn untok sida'k dah nyak sida'k bejantoh dalapm bahasa-bahasa laetn tang nyak benubuat. ⁷ Jumlah sida'k ada sekitar dua bolas iko'k ketnlaki. ⁸ Paulus angkat ke sinagoge dah nyak bejantoh dongan beRani pelamat e 3 bulatn, modah dongan ngeyakenkan sida'k tontankg keRajaan Allah. ⁹ Tapi ada bebeRapai sida'k Yahudi nyang koRas ati ngan ongai nunak nyang dipodahnya, sida'k pe mulai nyobot pekota pekota jahat tontankg Kristus dipeRodap mensia banyak. Badi beak Paulus nudi sida'k ngan menyooh sida'k diantara sida'k , ngajar dongan sida'k tiap aRi dioRong kuliah Tiranus. ¹⁰ Tok belangsokng selama dua tahotn, maka e banyak mensia nyang diapm di Asia ninga ingan Tuhatn, baek sida'k Yunani ataupon sida'k Yahudi. ¹¹ Allah mulah banyak perbuatatn nyang bakah ngelolok jaRi Paulus, ¹² Dan lage'k mensia nyang podeh disomoh e, roh jahat kluar daRi sida'k, pas sida'k makai lap jaRi dongan kaetn umpok Paulus. ¹³ Tapi diantaRa sida'k ada bebeRapai mensia Yahudi, nyang medoRi setatn makai nama Yesus untok kepentekngan dere'k e nyang ngelolok jalatn nyak. Dah nyak sida'k bejantoh ke mensia-mensia nyang konak rasok roh jahat, "Demi Yesus nyang dipodah oleh Paulus, aku meRintahkan ikau untok keluar." ¹⁴ Imam kepala Yahudi, nyang nama e Skefa, ada tujoh putra nyang ngelakukatn itok. ¹⁵ Dah nyak Roh jahat nyak nyingol sida'k, "Yesus aku panai, macapm nyak gam dongan paulus; tapi sapaikah ikau?" ¹⁶ Roh jahat nyang ada dialapm tuboh nyak namong ke arah sida'k, nyakal dongan modeh sida'k sampai sida'k pon daRi aRi langkau nyak dalapm keadaatn telanyakng dongan lukak. ¹⁷ Itok tejadi dan nyebar diantaRa uRankg-uRankg Yahudi ngan Yunani nyang diapm di Efesus. Sida'k jadi melangaR golak, sampai nama Tuhatn Yesus pon dipuji Rangi. ¹⁸ Dongan banyak mensia nyang pecaya'k datakng dah nyak ngako'k nyang jahat jahat nyang udah sida'k pulah. ¹⁹ Banyak mensia nyang kala'k mulah sgala siheR pe datakng mae'k kitab-kitab e dah nyak nunu e di peRodap semua uRankg. ²⁰ Firman Tuhatn pe menyebaR bakah dongan ponoh kuasa. ²¹ Seudah Paulus nyelesaikan pelayan e di Efesus, dongan kengonak Roh Kudus inya mileh untok ngelolok Makedonia ngan Akhaya waktu dipejalatn e ke Yerusalem; kata e, "Seudah aku ke koetn, aku pe aros ke oRong kota Roma." ²² Dah nyak Paulus ngutos kedua mured e ke Makedonia, dua iko'k nyak nyalah Timotius dongan Erastus, nyang udah banyak nolonkg inya. Tapi nya diapm di Asia untok sekenyap waktu. ²³ Bon lamah udah nyak, timol sute'k masalah nyang nyuRoh kalot mensia di Efesus. ²⁴ Siko'k mensia tukakng perak nyang nama e Demetrius, pemahat temado'k perak dewi Artemis, nyang udah mantok sida'k penganyam napatkan segala kereja, ²⁵ Inya ngumpolkan semua penganyam inyak ngan modah ke sida'k, "Kan Kabatn jerahatn, iketn pe panai bahwa keReja ito'k banyak mae'k untokng untok kita. ²⁶ Bitok iketn udah ninga dongan mantau ukatn ongkah di Efesus , tapi ada diseluRoh Asia, bahwa Paulus udah nyesatkan dongan memula'k kebonyak mensia. Inya modah kalau bon sek ilah-ilah dipulah dongan jaRi mensia. ²⁷ Ngan ukatn kita gona nyang losi sgala keReja, ngan lage'k Kuil bagak umpo'k Dewi Artemis akatn diangap bon beguna. Laga nyak nama bae'k inya pon losi di seluRoh Asia dongan Dunia nyang muja nya. ²⁸ Pas sida'k ninga bRita nyak, sida'k pon luat dan ngora-ngora, "Bakahlah Artemis dewi sida'k Efesus." ²⁹ SluRoh kota jadi kacau, ngan semua mensia bedoRi ngan tama'k ke dalapm gedokng kesenian. Dah nyak sidakk nangkap jeRahatn Paulus, Gayus dan Aristarkhus, nyang datakng daRi Makedonia. ³⁰ Paulus bemaksod tama'k ke dalapm gedong nyak, tapi mured-mured e ngidah nya. ³¹ Juga, bebeRapai mensia nyang tingek di Asia ngan kabatn daRi Paulus, ngirepmkan posan ke inya nyang minta'k inya untok bon tama'k kealapm gedong kesenian nyak. ³² BebeRapai mensia ngora ngan mensia nyang de dia'k temponga. Banyak daRi antara sida'k dongan lage'k sida'k bon ngeReti untok apai sida'k berugo'k ditempat nyak. ³³ ORankg-oRankg Yahudi mae'k Aleksander ke adap uRankg banyak, Aleksander more'k tana tana pakai jaRi e untok modah ke mensia banyak. ³⁴ Tapi pas katn mensia banyak panai kalau inya adalah uRankg Yahudi, sida'k ngora bakah bakah sekiRa plamat e dua jam, "Bakah am Artemis Dewi uRankg Efesus." ³⁵ Pas paniteRa kota udah modah ngan nonangkan hati sida'k nyang beRiyoh-Riyoh nyak, inya bingan, "Iketn uRankg-uRankg Efesus ada pe mensia didito'k nyang bon panai ke bahwa kota Efesus nyalah penyaga kuil dewi Artemis ngan lage'k nyak maba'k beRona nyang mirep ngan turon daRi langet? ³⁶ Smua uRankg panai dongan ito'k, ngan bon se'k siko'k pon nyang panai modah kalau ito'k bon kona'k. Ken smua aRos diapm. Onang mulah keReja nyang bogo-bogo. ³⁷ DaRi nyak lah ken seaRos e mae'k kedua mensia tok ke koto'k, sida'k abotn ngolet dongan nyela dewi kita. ³⁸ Dan lage'k, tek Demetrius dongan kan anak buah e ngeRasa bahwa sida'k ada masalah dongan uRankhg-uRankg tok, ada bae'k e kalau sida'k mae'k pekaRa ito'k ke Gubernur. Sak sida'k sama-sama nyolah pangan. ³⁹ Tapi kalau sida'k ada bebeRapai masalah nyang peRolu ditanyak , pekaRa nyak aRos dibae'k ke nyang rong bedapat biasa. ⁴⁰ KaRena sesunggoh e, kita smua lage'k keboRah dalapm bahaya atas penyongkak tontankg nyang kalot aRi tok. Bon jelas apai maksod e daRi bekalot tok ngan kita akan bon panai untok ngesah e." ⁴¹ Dah abes nyak , inya nyuRoh sak bubaR.