¹ Awuk Rahel katena aye bakoi tau ba anak nakia ga Yakub. Aye bahari nuhi pulaksanai e, Lea. Rahel ngantuh ga Yakub, Ami ga aku anak, atawa aku matei! ² Yakub sangit nuhi Rahel balalu ngantuh, "inon aku ina Allah sa ngulah hanyu mandul?" ³ Rahel nuwing, "Ina Bilha, walahku. Mandre bo pahengau aye balalu aye mat baank anak ga aku. Ulah hio, aku tau jari ine nangkah aye." ⁴ Ulah hio, Rahel ngami Bilha ga Yakub jari harau e. Balalu, Yakub bahubungan tenga nuhi Bilha. ⁵ Aye sawuntung pahengau baanak isa kaulun nakia laki ga Yakub. ⁶ Rahel ngatuh, "Allah haot ngarengei doaku. Aye ngalap keputusan mat ngami isa kaulun anak ga aku." Jari, aye ngulah aran anak e hio Dan. ⁷ Bilha sawuntung waleng balalu ngami anak karuweh ga Yakub. ⁸ Rahel ngantuh, "Aku haot basaing nuhi tataku, balalu aku manang." Jari, aye ngulah aran e Naftali. ⁹ Lea katena aye bakoi tau waleng baanak. Jari, aye ngami walah e, Zilpa, ga Yakub mat harau e. ¹⁰ Udi hio, Zilpa baanak nakia laki. ¹¹ Lea ngantuh, "Aku bauntung," jari, aye ngulah aran anak e baaran Gad. ¹² Zilpa baanak anak sa llain. ¹³ Lea ngantuh, "Aku sanang tuu! wayah ina, wawei-wawei ngantuh aku sanang." Jari, aye ngulah aran anak e baaran Asyer. ¹⁴ Awuk hio musim masi gandum, Ruben tulak ga alah balalu kahaba pamute sa na antuh dudaim. Aye ngaun ga ine e, Lea. Tapi Rahel ngantuh ga Lea, "awat ami ga aku papire dudaim sa tuna anaknu." ¹⁵ Lea nuwing, "Hanyu haot ngalap waneku, bakoi sukupkah hio? Balalu, wayah ina hanyu mat bausaha ngalap dudaim anakku?" Tapi Rahel nuwing, "Amun hanyu ngami dudaim anaknu ga aku, hanyu tau mandre pahengau Yakub malem ina." ¹⁶ Awuk Yakub hawi neke alah malem hio. Lea balua mat nalu aye. Lea ngantuh, "hanyu harus mandre pahengau aku malem ina. Ulah, aku haot bayar nuhi dudaim anakku." Jari, Yakub mandre pahengau Lea malem hio. ¹⁷ Udi hio, Allah ngizin Lea baank waleng sa kadime. ¹⁸ Aye ngantuh, "Allah ami upa ga aku ulah aku haot ngami walahku ga waneku." Jari, aye ngami aran anak e Isakhar. ¹⁹ Lea sawuntung waleng pahengau baank anak kaenem. ²⁰ Aye ngantuh, "Allah haot ngami sa maeh ga aku. Wayah ina, Yakub pasti narime aku ulah aku haot ngami anak ka enem ga aye." Aye ngulah aran anak e hio Zebulon. ²¹ Udi hio, Lea baanak nakia wawei. Aye ngulah aran anak e baaran Dina. ²² Balalu, Allah kaitung Rahel. Aye karengei doa e balalu ngulah tau naan anak. ²³ Aye sawuntung balalu baanak isa kaulun nakia laki. Aye ngantuh, "Allah haot ngupe eha kamanganku." ²⁴ Rahel ngulah aran anak hio Yusuf, balalu ngantuh," kira e Allah tala ngami waleng anak laki sa lain. ²⁵ Udi Yusuf naanak, Yakub ngantuh ga Laban, "Wayah ina, elah e aku waleng ga tane ranuku. ²⁶ Ami bo harau-harau pahengau anak-anakku ga aku. Aku haot kaiyuh here pahengau bagawi nuhi hanyu. Hanyu karasa aku haot melayani hanyu maeh-maeh. ²⁷ Laban ngantuh ga aye, "Aman hanyu hakun, nunyu aku mat naan sa nawaraku. Aku karasa Allah tala haot memberkati aku ulah hanyu. ²⁸ Antuh bo ga aku inon sa harus na nawayatku ga hanyu pahengau aku mat ngami aga hanyu." ²⁹ Yakub nuwing, "hanyu karasa aku haot bahimat bagawi ga hanyu. Pulau pamelumnu haot baajoh maeh tuu awuk aku nyaga e. ³⁰ Awuk aku hawi, panatau nu ekat duting. Wayah ina, panataunu haot ba ajih tuu. Awuk aku ngagawi gawian ga hanyu, Allah Tala memberkati hanyu. Amun kalahio, awuk awe aku tau bahawi mat ga keluargaku raerai?" ³¹ Laban ngantane, "Jari, inon sa naomiku ga hanyu?" Tuwing Yakub, "hanyu koi usah ma, yat ga aku. ekat te, aku mat waleng ngambala kambing dombanu, asal hanyu nyatuju syarat ina. ³² Kalewani aku takia ta helang pulang pamelumnu andrau ina. Aku mat ngalap satiap domba sa babintik, bagaris, atawa sa bawarna maintem. Balalu satiap kambing sa bagaris atawa sababintik. Hiolah sa mat jari upaku. ³³ Uni, hanyu kaiyuh maraoh mambukti kajujuranku. Hanyu iyuh hawi pahengan katena pulau pamelumku. Amun aku naan kambing sa bakoi babintik atawa domba sa koi maintem, hanyu mat tau karasa aku sa ngalat e. ³⁴ Laban nuwing, "Aku satuju amun kalahio. Takam mat ngagawi sa na lakonu." ³⁵ Maka ulah hio andrau hio Laban mamisah kalaluhan kambing laki pahengau wawei sa babintik. Aye lei mamisah kaluhan domba sa bawarna maintem. Laban lako kawan anak e nyaga domba-domba ina. ³⁶ Ulah hio kawan anak e nuna kaluhan satuwa sa babintik ga uneng lain. Here takia hampe telu andrau. Yakub muneng balalu nyaga kaluhan satuwa sa natanan. ³⁷ Udi hio, Yakub netek paka sa karado neke kakau kayu kayawun dan badam. Aye ngelak papire raan balalu naan garis-garis mahilak ta upak raan kayu hio. ³⁸ Aye nganak raan hio ta pulau pamelum ta uneng sa baranu. Amun satuwa hio hawi mat ngo'ut, here lei ngawawe ta uneng hio. ³⁹ Udi hio, awuk kambing-kambing ngawawe ta hadapan raan hio, nganaklah sa babintik, bagaris, atawa maintem. ⁴⁰ Yakub mamisah satuwa sa babintik pahengau sa maintem neke satuwa sa lain ta pulau pamelum hio. Aye misah satuwa e neke na Laban. ⁴¹ Udi hio satuwa hio ngawawe rite raan-raan hio. ⁴² Awuk satuwa sa maleme ngawawe, Yakub bakoi nganak raan ta aro. Balalu, satuwa sa naanak neke inu sa maleme hiolah na Laban. Balalu, satuwa sa naanak neke inu sa kuat hio lah na Yakub. ⁴³ Nakai cara ina Yakub jari ulun tatau. Aye naan pulau pamelum sa ajoh tuu, walah sa ajoh, unta-unta, pahengau keledai-keledai.