Pasal 2

1 Naan erang kaulun laki neke suku Lewi sa pa, adu pahengau wawei sa neke suku Lewi lei. 2 Wawei hio sawuntung erang kaulun nakia laki. Awuk wawi hio ngini kakaeh nakia hio, aye nina-e sampe telu walan. 3 Awuk aye bakoi kaiyuh nina nakia hio, aye ngalap isa karanyang balalu namae-e pahengau tes mat aye kaiyuh gamompong. Udi hio aye balalu ngasuk nakia hio, ga huang karayang bulu nganak ta iring hungei ta helang-helang pulau nkut sa entu. 4 Pulak sanai wawei du-au hio mindri bakoi lawit neke hio aye kakan karasa inon sa jari di duan hio. 5 Koi lawah udi hio, anak wawei Firaun tulak ga hungei Nil mat mandrus udi hio aye pahengau panggapit-panggapit hio balalu takia ta iring hungei, aye ngini karanyang ta penah-penah rikut sa entu aye nunyu isa lain panggapit mat nyalap karanyang hio. 6 Anak wawei Firaun nguka karanyang buku ngini isa kaurum dua-u laki hio. Dua-u hio nangis. Anak wawei Firaun nginam ka'ahi ngini bulu ngeau, ina pasti dua-u ulun Ibrani. 7 Pulak sanai duan hio lagi sampadina. Udi hio, aye mindri udi hio aye ngau iti anak wawei raja inon hanyu kakakn aku ngalupui erang ka ulun wawei Ibrani sa tau nampono duau hio bulu mahhara aye. 8 Anak wawei Firaun ngean, oi lupu bo udi hio nakia wawei hio tulak balalu ngaun ine duau hio raerai. 9 Nakia wawei Firaun ngean ga ine duau, hio a'un du'au ina balalu malihara-e ga aku. Aku mat bayar upanu sa haot malihara aye wawei hio balalu ngalap du'an hio mat na palihara-e. 10 Udi hio du'au magin ba hante, wawei hio ngulah aranga anak wawei Firaun. Anak wawei Firaun narime nakia hio kara erai aye ngami aran ganakia hio Musa, sa artie na, alap nekeranu. 11 Musa haot hante balalu matueh. Isa andrau, aye ngano bangsa-e raerai, ulun-ulun Ibrani, na paksa bagawi hampe weat. Aye ngani erang kaulun Mesir mangkung erang kaulu Ibrani. 12 Musa ngulik ga kaliling-e balalu koi naan ulun sa na ini esa mamparhati-e, bulu Musa munu urun Mesir hio balalu ngogang ga kuan karasik. 13 Andrau katuni-e Musa ngini suer kau ulun Ibrani palakat eau-e ga ulun sa balalu ta huang eakat hio, ''Wuah inon hanyu ngakasah sameh kaon ulun Ibrani?" 14 Ulun hio, "hie sa nunyu hanyu jari penguasa di nakunga kami? Inon kah hanyu mat munu aku dameh sa hanyu munu ulun Mesir hio?" Udi hio Musa koehei tu uaye ngakira masalah ina haot na karasa ulah kaluhan ulun". 15 Awuk hio Firaun ngarengei kabar sa haot di ulah Musa. Aye ngalupai Musa mat nawunu-e. Musa tulak malalu teke Firaun bulu tupak ga negeri Midian. 16 Taaro, naan erang ka ulun imam sa ampun pitu nakia wawei. Wawei-wawei iti tulak ga sumur mat ngalap rani ga domba amah-e. Here kan ngalap ranu ta uneng hio. 17 Tapi, ta aro a'an papire gembala sa nungu here tupak balalu ngalap ranu. Udi hio Musa, ngawak here bulu ngami ranu ga pamelum lero. 18 Udi hio, here waleng ga amah here, Rehual. Rehual nyantane here, "wuah mon kaon mudi laju andrau iti?" 19 Tuang here, "Gembala-gembala bausara nulak kami, tapi naan erang ka ulun sa ngawat kami." 20 Rehuel ngantuh ga nakia-nakia-e ta awe ulun hio? Wuah inon kaon nanan aye? tulak, wara aye mat aye kuman pahen gau takam. 21 Musa sanang muneng pahengau ulun hio, Rehual karewabo musa paadu pahengau Zipora, anak-e. 22 Zipora sawuntung buku ba anak laki. Musa ngami ara-e Gersom ulah Musa ulun sa Lawi bio ta tane sa bakoi mire. 23 Udi hio bakoi lawah, raja Mesir matei. Tapi bangsa Israel tatap na paksa bagawi. Here nerau lako awat balalu Allah Tala ngarengeii here. 24 Allah Tala ngarengei lengan here sa lako awat bulu pakingat tu huang perjanjian sa na ulah aye pahengau Abraham, Ishak, balalu Yakub. 25 Allah Tala ngini kasusar bangsa Israel bulu aye paduli di here.