¹ ಮರ ಚಿಯ್ಯ, ತು ಕ್ರಿಸ್ತು ಯೇಸುಮಚಾಥೆ ಕ್ರುಪಮ್ತಿ ಥಖಥ್ಖುರ. ² ತು ಕ್ಹಾರಿ ಸಾಕ್ಷಿಮ ಅಗಡಿ ಮರೆತಿ ಖಾಮ್ಜೋತೆ ಬೋಲಿಯೋಥೆ ವತ್ಹೇನ ಅಳದವುನ ಬೋಲಿವತ್ಹಲ್ ಶಕ್ತ್ಹಿವಳ ನಮ್ಮಿರವಳನ ಅದ್ಮಿನ ಯೋ ಓಪ್ಸವು. ³ ಕ್ರಿಸ್ತು ಯೇಸುಮ ಅಚ್ಹೋ ಅದ್ಮಿನಿಗೋಣಿ ಮಾರತಿ ಕಸ್ಟಮ್ ಅನುಬೊಗಿನ್ಚ್. ⁴ ಯುದ್ದಮ್ನ ಜಸ್ತೆ ಆದ್ಮಿ ಲೋಕಂನಿಬರೆಮ ಬರವಕೊಇನಿಥೆ ಇನುಯೋಸ್ ಅದ್ಮಿವುಮ ಮಲೈಲಿದುಥೆ ಪಶನ್ಕರಿನ್ಬೋಳವನ ಪ್ರಯಸಂಪಡುಕರಸ್ಥೆ ಕಾಯೇನ. ⁵ ಅಮ್ಕಯೇಥೆ ಕೊಂತ್ಹೊಬಿ ಇನುಯೋಸ್ ಕ್ಹಾಮೇತಿ ಮಿಳವನಿಟೆಂಪರ್ ನಿಯಮನಿ ಗೋಣಿ ನಾ ಮಿಲೈತ್ಹೋ ಇವಣ ಜಯಂನೋ ಮಲೋ ಮಲಸೇಕೋಇನಿ. ⁶ ಕಂಕರವಳ ಕ್ಹೇಥಾರ್ಮ್ಮ ಅಗಡಿಲು ಬ್ಹಾಗ್ ಕಷ್ಟಮ್ಪಡಿಯುಥೆ ಕಮ್ಕರವಲನ ಮಲಷೆ. ⁷ ಮೇ ಬೋಳುಸ್ಥೆ ಸೋಸ್. ದೇವೂ ಕ್ಹಾರಮ ತುನಾ ಆಲೋಚನೆ ದೆವಲೊಹುಇರಶೆ. ⁸ ಮರಿಯಮಾತು ಹುಟಿರಯುಥೆ ದಾವಿದನ ವಂಶಮ್ವಾಲೋ ಹುಇರೋತೆ ಯೇಸು ಕ್ರಿಸ್ತುನ ಕ್ಹಾಯಲ್ಕರ್ಲಾ; ಅಸ್ ಮೇ ಬೋಲುಸ್ಥೆ ಅಚ್ಚೀವತೆ. ⁹ ಅನಾಮ ಮೇ ಕಷ್ಟಪಡಿನ್ ಕರಬದ್ಮಿನಿಗೋಣಿ ಮರೈನ್ ಭಾಂದೈಗಯೋ; ಕತ್ಹೋ ದೇವುನಿ ವತೆ ಭಂದೈರವನುಕೊಇನಿ. ¹⁰ ಅಜ್ಹುಕತ್ಹೋ ದೇವೂ ಚುನಿರಕಿಯೋತೆ ಇಉನಬಿ ಕ್ರಿಸ್ತು ಯೇಸುಮಚ್ಚಥೆ ರಕ್ಷಣೆನ ನಿತಿನು ಮಹಿಮಾ ಇನೆಖ್ಹುಬಿ ಪೊಂದಿಲೆನುಕರಿನ್ ಮೇ ಇಉನಕಜ್ಜೆ ಕ್ಹಾರಮ ಶಪೋರೈಜ್ಹುಸ್. ¹¹ ಅ ವತೆ ನಮ್ಬನುಹುಇರುಸ್,- ಶಥ್ಕತೋ ಹಮೇ ಇನಿಜ್ಹೊಡ್ಮಾ ಮರಿಯತ್ಹೋ ಇನಿಜ್ಹೊಡ್ಮಾ ಜಿವುಶು; ¹² ಸಹಿಸಿ ರವಳರಯತ್ಹೋ ಇನಿಜ್ಹೊಡ್ಮಾ ಕಮ್ಕರ್ಶು; ಹಮೆ ಯೇಸುವಳಕಯೇಕರಿನ್ ಬೋಲಿಯತ್ಹೋ ಯೋ ಅಪನಾ ಮರವಳುಕಯೇಕರಿನ್ ಬೋಲ್ಷೆ. ¹³ ಅಪಾಣೆ ನಮ್ಬಕಂವಳನರಯತೋಬಿ ಯೋ ನಮ್ಬವಲೋ ಹುಇರಶೆ; ಯೋ ಇನಿ ಬುದ್ದಿನ ದಕೆಲನ ಉಶೆಕೊಇನಿ. ಗಲಿಜ್ಹ್ ಕಾಮ್ ಗಲಿಜ್ಹ್ ವಥೆ ಪೈಲೈಗಯುತೋಬಿ ತಿಮೊಥಿನ ಗ್ಹನು ಡರ್ಕ್ಹುರಾನುಕರಿನ್ ಬೋಲಿಯೇಸ್. ¹⁴ ಅ ವತ್ಹೇನ ಸಬೇವಳನ ಖ್ಹಯಲಮ್ಮ ಲ್ಯವುನು. ಕ್ಹಾಮಜಃವಲನ ತೊಂದರೆ ನಾ ಲ್ಯವುನುವುಥೆ ಕೆವಿ ಪ್ರಯೋಜನಂ ಅವಕೊಇನಿಥೆ ಕ್ಹಾರಬ್ ಕಾಮ್ ನಾಕರ್ನುಕರಿನ್ ಇವುಣ ದೆವುನಿ ಜ್ಹಾಗೋಮ ಕ್ಹಾಚಾಬೋಲ್. ¹⁵ ತುಮೆ ದೆವುನ ಪಶಾಂತ್ರ ದೆಖಾವುನಿಕಾರಿ ಪ್ರಯಸಂಪಡ್. ಅವಮನಂನ ಗುರಿಹುಯುಥೆ ಜುಣನ ಸತ್ಯವಕ್ಯಮ್ನ ಬರೋಬಾರ್ ಬೋಳವಲೋ ಹುಇರಾ. ¹⁶ ಲೋಕಂನಿ ವ್ಯರ್ಥ ಹರಟೆ ವಥೆಖೂ ದುರ್ರಹೋ; ಯೋಕ್ಹಾರಪರ್ ಮನಸುಮೆಳವಳು ಗಣುಗನು ಬಲಹಿನಥೆಹುಇಜಸೆ. ¹⁷ ಇವಣಿ ವಥೆ ಪೋಡನಿಗೊನಿ ಬರೈಜಷೆ. ಇವುನಾಮ ಹುಮೆನಯನು ಪಿಲೆಥನು ರಾಶೆ. ¹⁸ ಇವನೇ ಜಿವಿನ್ ಅವನು ಹುಇಗಯುಕರಿನ್ ಬೊಲಿನ್ ಕ್ಹಾಚ ಕರಬ್ಕರಿನ್ ಕ್ಹಾರಾದ್ಮಿನ ನಂಬಕಂನ ಖಾರಬ್ಕರಿಯು. ¹⁹ ಕತ್ಹೊಭಿ ದೆವುನೋ ಗಾತ್ಹುಇರುಥೆ ಗುಣಥಿ ಉಬ್ಹುರಷೆ. ಥದೆಬ್ಹಿ ಇನುಪ್ಪರ್ <<ಇನವಳು ಕೊನ್ಕರಿನ್ ದೇವೂ ಮಲಮ್ಕರಿಯೋಕರಿನ್ ದೆವುನ ನಮ್ನ ಬೋಳವಳುಖಾರು ದುರ್ಮರ್ಗಮ್ನ ಮೆಂಧೆನುಕರಿನ್>> ಲಿಕ್ಕೈರುಥೆಕಯೇನ. ²⁰ ಮೋಟ ಘರ್ಮ ರುಪನು ಗ್ಹೆನನು ಹಂಡಕ ಕಯೇಥೆ ಝಾಡನ ಕಟೋರ ಮಟಿನು ಕಟೋರ ಹಂಡಕ ಚ್ಹ; ಇನಾಮ ತೋಡಮ ಅಚೂಚಥೆ ಕಮ್ಕರಣ ತೋಡನ ಕಂಚಾಥೆ ಕಾಮ್ನ ಕಂಕರ್ಷೆ. ²¹ ಅಮರೈತ್ಹೋ ಏಕ್ಜನುಬಿ ಕಮ್ರವಳನಿ ಸವಸಂಮನ ಮೆನ್ದೀನ್ ಇನು ಯೋಸ್ ಪಶಂಪಡಿಗುತ್ಹೋ ಯೋ ಪಷನ್ಚಥೆ ಕಾಮ್ನ ಯೋಗ್ಯಹುಇರಷೆ ; ಯೋ ದೆವುನ ಸೆವೆನ ಪ್ರಥಿಷ್ಟಕ್ಹುಬಿ ಮೋಟಅಡ್ಮಿನ ಉಪಯೋಗ್ಯಂ ಕರಿನ್ ಅಕ್ಕಕಂನ ಕರನಾ ರಾಡಿಕ್ಹು ರಾಶೆ. ²² ತು ಕವರನಿ ಅಕ್ಹ್ನದುರ್ರಾಜೋ; ನೀತಿ, ನಂಬಕಂ, ಪ್ರೀತಿ ಬುಜೋ ಸಮದನಮ್ನ ಕಮೈಲವನ ಪಶನ್ನುದಿಲ್ಕ್ಹು ದೆವುನ ಮನ್ಗಿಲೆವಲನ ಜೋಡ್ಮಸಮದನಂಕ್ಹು ರಾನುಕರಿನ್ ಪ್ರಯಸಂಪಡ್. ²³ ಕರಬ್ವಳನಿ ಬುದ್ದಿಕೊಇನಿಥೆ ವತ್ಹೇಖಾರು ಲಡಇಕರು ಕರಣಂ ಉಷೆಕರಿನ್ ಮಲಮ್ಕರಿನ್ ಯೋಕ್ಹಾರನಿ ಲಡೈನ ನಕೋಜ್ಹ. ²⁴ ದೆವುನೋ ಸೇವಕ ಲಡೈಕರಡಕೊಇನಿ ಅಕ್ಕ್ಹನಿ ವಿಷಯಮ್ಮ ಸದುವು ಬೋಳವಳಮ ಬುದ್ದಿವಂತ ಥಲ್ಮೆಕ್ಹುರವಳು , ²⁵ ಗುರ್ಕವಲನ ಹಳೆಕ್ಹು ಬರೋಬರ್ಕರವಳು ಹುಇರನು. ಏಕ್ ಹಲ್ಲಾ ದೇವೂ ಯೋ ಗುರ್ಕವಲನ ಮನಸುನ ಇನಮಣಿ ಪರೈನ್ ಸತ್ಯಮ್ನಿ ಕ್ಹಯಲ್ನ ಇವನ ದಿದ್ಹೋ. ²⁶ ಸೈತಾನ್ನ ಮೈಟಮ ಪಡಿರಹಿಥೆ ಅವನೇ ಏಕ ಹಲ್ಲಾ ಚುಗಿಜೈನ್ ದೆವುನಿ ಚಿಥಾಮ್ನ ಮಲಿಜವನ ಶಕ್ಥಿವಳಹುಯ.