¹ ಲಾಸ್ಟ್ ಲಿ ವಥೆ ಶಥ್ಕತ್ಹೋ, ಭೈಯೇ, ಹಮರಟೆಕೆ ಪ್ರಥನೆಕರೋ. ದೇವೂನಿ ವಾಕ್ಯಂ ತುಮರಮ ಪೈಲಯೋಥೇ ತಿಮ್ಮಸ್ ಯೋ ಕಿಜ್ಗಕಿಜ್ಗಬಿ ಇಗ್ಹಿಸ್ ಪೈಲಾಇನ್ ಮಹಿಮಾ ಹೊಂದೀನ್ ಮಲಮಹುವಾದ. ² ದೇವೂ ಹಮನ ಮೂರ್ಖಹುಇರುಥೆ ಗಲಿಜದ್ಮಿನ ಹತ್ಮತು ಬಚವುಷೆತೆತಿಂ ಪ್ರಥನೆಕರೋ; ಕ್ರಿಸ್ತುನಿ ನಬಕಂ ಕ್ಹಾರಮ ರೈಕೊನಿ. ³ ಕತ್ಹೋ ದೇವೂ ನಬಕಂವಲೋ; ಯೋ ತುಮನ ಗಟ್ಕರಿನ್ ತುಮೆ ಪಿದಹುಯನ ಹಾತ್ಮಮಲ್ನುನಥೆತಿಮ್ ಬಚಡ್ಶೇ. ⁴ ಹಮೆ ಖಮ್ಜಯೆಸ್ಥೆ ಇಮ್ಮಸ್ ತುಮೆ ಕರ್ಶುಕರಿನ್ ಅಗಡಿಬಿ ಕರ್ಶುಕರಿನ್, ತುಮರವಿಶಯಮ್ಮ ದೆವುನಿ ಬರೆಮಬಿ ಹಮುನ ಅಕ್ಹಚಾ. ⁵ ತುಮೆ ದೇವೂ ಪ್ರಿತಿಮಬಿ ಕ್ರಿಸ್ತುನ ಥಲ್ಮೆಮಬಿ ಮಲ್ನುಕರಿನ್ ದೆವುಸ್ ತುಮನ ಚಳವಧ.ಕ್ರಿಸ್ತುವಳ ಬರಬರ್ತಿ ಚಲಿನ್ ಜುನುಕರಿನ್ ಜೀವನ ಕರಿಲೆನುಕರಿನ್ ವಥೆ. ⁶ ಭೈಯೇ, ತುಮರಥಿ ಪೊಂದಿಯಥೆ ವಥೆನ ಪಾಲ್ಲಿನ್ ಚಾಲ್ಯಕೊಇನ್ಥೆ ತಿಮ್ ಶೋಮ್ಬೇರಿನಿಗೊನಿ ಚಲಸ್ಥೆ ಅಕ್ಹಾಸ್ ಭೈಯೇನ ತುಮೆ ಧುರ್ರನುಕರಿನ್ ಹಮರೋ ದೇವೂ ಹುಇರೋಸ್ಥೆ ಯೇಸು ಕ್ರಿಸ್ತುನ ನಂತಿ ತುಮನ ಮಲಮ್ಕರಯೇಸ್. ⁷ ತುಮೆ ಹಮುನ ಹಮರಕೆದೇ ಅವುನುಕರಿನ್ ಕಿಮ್ ಚಲ್ನುಕರಿನ್ ತುಮೆಸ್ ದೇಖಿಯ; ಹಮೆ ತುಮರಮ ಮಲಮ್ಕೊಇನಿಥೆ ಚಲಿಯಕೊಇನಿಥೆ; ⁸ ಹಮೆ ಪೈಶದಿಯೆಕೊಇನಿಥೆ ಕಿನಕನಬಿ ಖಾನು ಖಾಧಕೊಇನಿ; ತುಮರಮ ಕಿನಬಿ ಬೋಜೋನಹುನುಕರಿನ್ ಧಾನ್ ರತ್ಹಬಿ ಬದಥಿ ಕಷ್ಟ ಮತಿ ವೆವಸಯಂ ಕರಿನ್ ಜೀವನಂ ಕರಿಯ. ⁹ ತುಮರತಿ ಆರೋಗ್ಯಂ ಪೊಂದ್ನುಕರಿನ್ ಹಮುನ ಹಕ್ಕೂಕೊಇನಿಕರಿನ್ ಅಮ್ಕರಿಯಕೊಇನಿ, ತುಮೆ ಹಮುನ ಜೋಡ್ಡ್ ಹೋಂನುಕರಿನ್ ತುಮನ ಬರೋಬಾರ್ ರನುಕರಿನ್ ಇಮ್ ಕರಿಯಾ. ¹⁰ ಅಮ್ಕಯೇಥೆ ಹಮೆ ತುಮನ ಜೋಡ್ಮ ರಾಯಥೆ-<<ಜುನು ಕರಿಯೊಕೊಇನಿಥೆ ಯೋ ಖಾನು ನಕ್ಹಾನುಕರಿನ್>>ತುಮನ ಹಖೂದಿದ್ಥ ಯೆಥ್ರೆಸ್. ¹¹ ಕತ್ಹೋ ತುಮರಾಮಬಿ ತೋಡ ಅದ್ಮ್ಬಿ ಕೆಹೋ ಜುನುಬಿ ಕರಿಯುಕೊಇನಿಥೆ ಅಳದವುನಿ ವಿಷಯಂಮ ಮತ್ಹೃಮಾಸ್ ಮುಡುಕ್ಯೂ ಗಲಿನ್ ಬರಬರ್ತಿ ಚಲಿಯಕೊಇನಿಕರಿನ್ ವಥೆನ ಕ್ಹಂಜಿಯ. ¹² ಅಮ್ ರವಲೋ. ಇವನಿ ಜುನುಖಾರೋ ದೆಕಿನ್ ಇವುನೆಸ್ ಖಾನುಖರಿನ್ ದೇವೂ ಹುಯುಥೇ ಯೇಸು ಕ್ರಿಸ್ಥುಮ ಹಮೆ ಅಜ್ಞೆಪಿಸ್ಸೈನ್ ಬುದ್ದಿ ಬೋಲಿಯೇಸ್. ¹³ ಬ್ಹಾಯೇ, ತುಮೆತೋಬಿ ಅಚುಉವುಸ್ ಕಂಮ್ ಕರಮ ಬೇಜರ್ಣಪಡ್ನು. ¹⁴ ಅ ಪಥ್ರಮ್ನಿ ಮುಖಂತ್ರಂ ಬೋಲಿಯೋಥೆ ಹಮಾರಿ ವಥೆನ ಕೊಂತ್ಹೊಬಿ ಮೈ ಶೆರಿಯುನತ್ಹೋ ಇನ ಕ್ಹಾನದ್ದರಿನ್ ಇವನ ಶರಮ್ಹುನುಕರಿನ್ ಇವನ ಜೋಡ್ಮ ಶೆರ್ನುನ. ¹⁵ ಕತ್ಹೊಬಿ ಇವನ ದುಶ್ಮನ್ಕರಿ ನದೆಕ್ನುಥೆ ಬ್ಹಾಯೇ ಕರಿನ್ ಚುಣಿನ್ ಬುದ್ದಿಬೋಲೋ. ಹುಇಗುಥೇ ವಕ್ಯಕ್ಹರು ¹⁶ ಶಂಥವಲೋ ದೇವೂ ಯೋಸ್ ಲಾಸ್ಟ್ನು ಝಾಗ್ತೋಡಿ ಕ್ಹಾರಿವಿಷಯಮ ತುಮನ ಶಾಂತಿನ ದೇವಧ ದೇವೂ ತ್ಹುಮರಖಾರವ್ನರವಾದ. ¹⁷ ಪೌಲನುಕರಿನ್ ಮೇ ಸ್ವಾಂತ ಹತೆಕ್ಹೂ ಖ್ಹಲಂ ಲಿಕ್ಯೋ ಆಕ್ಹೀ ಪಥ್ರಮ್ನಿ ಅಸ್ ಮರು ಖ್ಹನದ್; ಇಮ್ಮಸ್ ಮಾರೋ ಹಾತ್ ಲಿಕ್ಯೋ. ¹⁸ ಆಪ್ನೂ ದೇವ್ ಹುಇರೋಯ್ಹೆ ಯೇಸು ಕ್ರಿಸ್ತುನಿ ಕ್ರುಪಮ್ ತುಮರಖ್ಹರಾವುನಿ ಜೋಡ್ಮರವಾದ.