¹ Kəmmatəna hanjimi a chi nəbbə ne grate dʊʊbe na dʊʊte, a nwitən yəm a hanjimi, a kʊrra bwi a nəngngatangnga swiyer də nyan. ² Kəmmatən kari ba kəba gʊni, a mwammən na buri, a dʊ nəb a fʊng jʊwiya jiyʊ, a chi nəbbərə səgtangnga dʊrrəm a gwa nəbbi warigʊ. ³ Bəraki na nən nʊ nəbbə merə kəmmarangngəm, me bə nwiyəmməm, bə jʊla nəbbəm. Kənən lemən a jʊwi, kə nən chi kewete a jəllən da jɨna gʊssəti na nwitangnga ləmmang. Kə nən chi a mʊriya yobi bwira na nʊggən. Na nʊ nən kʊrsən, kwila bwite. ⁴ Mənni bʊmta Niyajiyʊ Nijəgriya nənnʊ rə yodaiya gʊ a nəbba gʊsətəm ka jɨre, ⁵ Me bəra dagi swiyer də nyan dənən nəngngan, mənni bərarə bʊmtangʊ gwa jəgbənei. A jəgbənə bəra tʊməntang ka buwʊng kə fiyəng, tʊməntang ka We Yʊlgoiyəng. ⁶ Niyajiyʊ ka nəbbəne We Yʊlgoi a rii a gwa Yesʊ Kristi Ni jəgriya nənnʊwi. ⁷ A nəngnga nyang bəraki bukkə nən nya jɨrtangngngəng a gwa nəttəta gʊwʊng, bənən yʊllo nəbba kʊlam dʊra sissi bərarə mʊra titangnga fʊriya yuumum bə kʊrərkwangəmi. ⁸ Yəm bambe gən yəm bə ngagərem. Kə mən fa rə mo sʊ yəm dʊr a sissi a jiya jɨni yaiye, nyəngkə ba nga rə Niyajiyʊ ba nəngnga fʊri a nəngnga swiyetəttə nyai tə Niyajiyʊwa ne hanjimi, yaiye yə nyai na jɨrtang a nəb warigʊ. ⁹ Mənni mwammən səkga buriya mɨti na gʊllatang a fautangnga dɨl, na yəmni kətəl kətəlli, wʊgatang a yəmni a jiya sori. Jɨni yaiye merə fini, merə jɨrtang. ¹⁰ Kwila wʊnə berə wʊlgatangnga a jʊgər da jɨnən ni, bukə wʊtən swʊng kali kin na kali təssʊwʊng. ¹¹ Yəm mo ni waiwe ka diməna yəm bə nyam, bə nəngnga jɨni bwirai, mənni bo bə nəngnga jɨni bwirai nəngngatən dʊtətta dʊr da gən. ¹² A jii təm Artimas tən Tikikʊsəng yɨgira a gwa mwiyʊ, nəngnga wʊlak nyaiya Nikobolise, a gai gʊn bʊbwi bən chiwi a fʊlla mʊwi. ¹³ Nəngnga wʊlak təmme Zinas wʊrə dəməntang nyagʊwi a dʊuti, na Afolos, nyəngkə hanjim me ba bʊna wʊnə ji gərəng. ¹⁴ A chin kwag nəbba nənnəm a dəg dʊr a məssa nyəng kə ba nəngnga swetəttə nyai gərəng, na nyəngkə ba dəmən a mər bʊnnən də gʊnnerə kʊtəkʊten kara chirorə rə kʊn me jɨrtang wʊn. ¹⁵ Warigʊ bənən ka kinəm kə səgəne. Sʊ ba yobəmən daam a mʊriya nəbbəntangnga yəm bə nyaməm. Nəttətən dautən bə wi a chi nən jɨn warigʊ.