¹ Mənni mwe, sʊwe jiya dautəna yəmba sori ngagərei. ² A chi kwak tabə bə gram a chi rə tautangnga dʊr, bə ne grate bwitan jiyʊwʊm, bərə kəmmarang kə nyang, ba chi rə kalʊri a nəbbəntangnga yəm bə nyami, rə yodai, narə tautangnga fʊri. ³ Nyang bo wʊtəm bə gram tau dʊtətan jiyʊ rə grate, me bə nən harnang. Kari ba yʊllo keweta notangnga hiya inabiyʊ rə kwani. Mənni a chi rə məssatang a ji nya. ⁴ Na nya masətəna wʊtəm bə kətəlem a chi rə kəmmarang ka yodai a jiya nəbbə barəm ba jiyəm rə bətəm ba jiyəm. ⁵ A məssatəna hanjimi a chi rə kəmmarang kə nyang, rə fʊri kalʊri, rə yobi nya a tautangnga kaiyʊ, na bə ne grate nəbbə barəm ba jiyəmməm. A nəngnga yai jɨni yaiye kari bwanda Niyajiyʊwʊng ba yʊllo jiya kabbari. ⁶ A wai jʊwi nyang bo, yɨgtən kumni a bwelem a chirə kəmmarang kə nyang. ⁷ Jʊtəkwang a dʊ yobiyamʊ a chi jiya a nəb; a fʊlla mən nəngnga məsarengngi, nʊng yobi nya, rə grate. ⁸ Sʊ we Təmrang ka mʊng rə kalʊri mere jiya kəbari, nyəngkə nəbbə nəngnga kak rə yəm ba Niyajiyʊwʊm ba nwi bujiiri gərəng, bəraki meba nya gʊji bwira ba sʊwa a jiya nənniyən. ⁹ Kewete tə ne grate bəgsərtətta jɨnʊ a jɨni warigʊ. Tə dəg hanjim a nəngnga fur də kwauwʊn, kari ba nəngnga buri tən hanjim. ¹⁰ Kari ba nəngnga kʊte. A jiya nyangngi, tə nʊng nəbbəntangnga yəm bə nyam, na nya nəngngatəng məssarang ka nənnʊ a jiya Niyajiyʊ Ni jəgri ya nənnʊ jɨni yəlli a wʊni ji. ¹¹ Bəraki nəttəta Niyayiyʊwi jɨrtənne wa nəb warigʊ. ¹² Ka məssa bə mən nyəngkə bətənə kwila jɨni bwirai tən jəllən da gʊsətən. Bə məssabəbən nyəngkə bətənən chi rə bərsan gərəng, rə nyagʊwi, a mʊriya yobi a tata Niyajiyʊwi a dan tangngər dan de. ¹³ A fʊlla wə tənən kwi kəmtə jəgga kakgi na yərə dəgtangnga a kang ka titanganga daa nənnʊwʊng, gən betang ka gratəng ka Nigra nənnʊ Niyajiyʊ tən Ni Jəgri Yesʊ Kristiyəng. ¹⁴ Yesʊ ka nəbbən dʊr da gən go na gə yiyabən a mʊriya bʊnaiya fʊngtangnga soriyʊ na tibən tənə yʊllo rə kalʊri, a gwa giyʊ kətənə yʊllo nəbbərə yəlləntəm bə farə nəngngatangnga jɨni nyaiyəm. ¹⁵ Sʊwe yəm na kaubwi yɨgtən kumni a yai jɨni yaiye. Nəngnga yəngnatang rə kumni warigʊ. Kari bən ngatəna gʊ a manən dəlli.