¹ Kangke gə churang ka Yesʊ Kristiyəng kə Niyajiyʊ a ne hangʊwʊng go na nʊng bwiranəm ba gəm jiwa tau kwak ba nəngnga bwi me rə langtangngi. A nʊngbən nyang a gwa təmetang a we təmran gʊ wa gwa bwirangʊ Yohanai. ² Yohana bʊ bukka bwamər da Niyajiyʊwʊn a jiya bʊtangnga buk kən nəbən na Yesʊ Kristiyʊ, warigʊ jiya chuwei. ³ Ni dəgtən kangngi gəwʊ kerə kʊmniyʊ, tən wa kautən su wa bwamər da yəm yʊwerəmi, na niwa fʊng jiwʊ mʊla mʊriyʊwi, bəraki fʊlla ka diye rə do. ⁴ Nə mə Yohana, yɨgira gwa Ekklisiatəttə nyibi yə ka Asiyai: Masi na nəttəttən dautən bə wi a chi nən jɨn tən chəmbə ləmmangngəm a jɨre wa hangʊ wʊ kawi, tə wʊ nanʊ wi, na wʊ ba bei, na gwa weni yʊlgoi nyibiyʊ yə ka kak ka dəntələn da gratən da gəni, ⁵ na gwa Yesʊ Kristiyʊ, gə wʊ bʊ bukkə rə yəm bə nyam, bwe kaggi a mʊra ba bɨtɨrom, nidʊ wa dʊʊbəbba gusətəmi. Yɨgira wa yobəmən dai na jəgbəne wa mʊra jɨni bwiraiyʊ a gwa dʊgəm ba gəmi- ⁶ ka nəbbən dʊʊtəng, nə chi nəb bə tung jɨni a chəriya Niyajiyʊ na Te gʊwʊm-grate na kumni a chi nən təgi jʊtəkwang me jitang we. Amin. ⁷ Chu, hangʊ kə bera mʊra korte; wʊnə kəmi ki ba chu hangʊ, warigʊ tən nəb ba kʊr hangʊwʊm. Warigʊ langtətta gusəti ba nəngnga bʊmte bəra nən hangʊ. O, Amin. ⁸ "Məmmə wʊrə jigʊwi na wʊ balri," ji Nigra Niyajiyʊ a sʊwei, "wʊ kawi, wʊ nanʊ wi, na wʊ ba bei, gərə gratə warigʊ." ⁹ Me, Yohana-chiyan jɨnnʊ wʊtə no kʊnang kini na tʊwʊ kin a dʊʊti na mitang ka dang ka mʊra Yesʊwʊng-nʊwa fʊn də bərə mo Batmosən bɨ’ərarə bwamər da Niyajiyʊwʊn na rə bʊtangnga buk a jiya Yesʊwi. ¹⁰ Mʊwa mʊra We kalʊriyʊ a ko Nigrai. Kən nwi dagi jiir də rə kʊmniyən a bukka miyəng nyəra rwisi kʊntang. ¹¹ A sʊwe go, "Mʊla jɨn chuwi ya wang, na tʊngtən na Ekklisiyatə nyibiyʊye-yɨgira Afisa, Səmirna, Birgamas, Tayatira, Sardisu, Filadalfiya, na Laudikiya." ¹² Kən wʊlga bwi mo na chu wʊ jir dan gən swiməne yəmi, wʊlga bwiyəng kən chu gani chirona gʊngortətta kərangngi ta wetəttə kəlchəkəlchi nyibi. ¹³ A jʊgər da gungortihiyən ka gʊ niwe nyəra rə yəlla niyʊ wa mai dʊk kʊntangngəng larə nana təmiyangʊwi, na bʊ bwi rə dagla werdə rə kəlchəkəlchən a tʊwe fʊra gʊ rəgəng. ¹⁴ Dʊr da gən tən yir da dʊrən da gən nə kwau nyəra landir-kwau nyəra sʊri ta wer da hiyəni, kəmtangʊ nyəra rə langngər da kərangngən. ¹⁵ Nana hangʊwi nyəra nəbri bʊlgəri, nyəra nəbri kabi fuwa kərangngi, jir da hangʊwʊn nyəra jir da bənori rə kʊmniyʊ. ¹⁶ Hangʊ ka rə betə swangngi nyibi a kang kə nyang ka gəng, na rə dampo rə nyini təssʊ jarə nyagʊwi jɨrera nyiyangʊ. Kak ka hangʊwʊng a yən nyərarə yəntang ka ko si rə jʊgəri. ¹⁷ Chu hangʊwʊng, kə yartəna nana gʊwʊng nyəra niya bwiya-bwiyaiyʊ. Ka timən kang kə nyang ka gəngngəng ka sʊwe go, "Kari nwi tate. Məmmə wʊrə jigʊwi na mwatənti, na wʊrə yuumumi. ¹⁸ Kəmana bwiya, mənni jəga, ka mənə yuumum kʊrəkwang! Ka mənnə bani ya bwiyyati na wa kʊnangngi. ¹⁹ Bərarə nyang mʊla jɨn chuwi, Ji kawʊ kʊwi, na ji wʊ ba nəngnga bwi a bukka waiwʊngngi. ²⁰ Jəgga tang a yəmba kəllʊ-kəllʊwi bwiyəng ba betə swangngi nyibi chuwa kang kə nyang ka miyəngngi, na rə gani chirona gʊngortətta kərangngi: Betə swangngi nyibiyʊ ye weni təmri ya Ekklisiyatə nyibiyʊ, gani chirona gʊngortə nyibiyʊ ye Ekklisiyatə nyibi."