¹ Masi yodai ya chitti ya jaukak. ² Kari bǝtǝ tamǝn rǝ yutangnga fube, baggi ka yu weni tǝmri merǝ yǝmtang ka jiyǝng. ³ Tǝ kǝmma rǝ bǝ ka mʊra jarǝmmǝm, da tǝ ka kin a wai yobi we. Bo tǝ kǝmma rǝ bǝ no kunongngǝm da tǝ ka kin a wai yobi. ⁴ Masi wʊnǝ ki a ne gratǝ nate, na bo sweta nati a yullo rǝ yʊlgoi, Bǝrakǝ Niyajiyʊ ba nǝngngatǝn duta talbe tǝn bǝ dara rǝ wʊtǝm ba nǝbbǝmmǝm. ⁵ Masi yobiyan Jɨnu a jɨrmǝnna fautang ka chǝmmǝrǝng. Tǝ mʊtǝnji a ji tǝ ka rǝgi, Bǝrakǝ Niyajiyʊ rǝ bwigo ka suwe go, ''Me bǝn dugǝn, bo me bǝn kwigǝn sǝrre.'' ⁶ Masi tǝn chi rǝ mʊtən jii a ji nən karəgi naki nən nya yəgtangnga kumni nən suwe no, ''Nigra gǝ tugaire, me bǝn nwi tate. Wʊlai ji ni ba nǝngngai mǝnni?'' ⁷ Bo tǝ tuga bǝn nǝbbǝ gram ba Jɨnǝmmǝm, ba wʊgǝmǝn su a mʊra yǝmba Niyajiyʊwʊm, na bo tǝ kǝmma rǝ jangǝmmiya yobiyan jǝyuwi, na tǝ mǝssamǝnna nǝbǝntangka yǝmbǝ nyam ba jiyǝmmǝng. ⁸ Yesʊ Kristi gǝn kwan nən dari, tǝn kʊ na yɨgira mwatǝnte. ⁹ Kari bǝtǝ nyǝgle yɨgira mǝssartəttə fiyu dǝndang. Bǝrakǝ ka nyagʊ furi a mʊ bwi a gwa ji nya nǝn dabi wa Niyajiyʊwi, mǝnni me bǝri sori a gwa Jɨni jauriyu,wʊ me ba tuga bǝ ba nǝngnga soriyan guwʊm. ¹⁰ Nǝn ka nǝnnǝ chǝrri wʊ bǝ nǝngnga swiyer a mʊriya kungngoihiyǝm, me rǝ sər a jau jiyan gu. ¹¹ Ni tung Jɨniya chǝriya Niyajiyʊwi wʊ grai ka dǝgira gwa li yʊlgoiyʊ rǝ dugum ba ji wʊn bwangngi, tungtang ka Jɨni bwiraiyǝng, mǝni namtangu mǝn di rǝga siya mʊri ki kǝn tungnga gai. ¹² Bǝrarǝ nyang Yesʊ rǝ kǝgang ka no kunong a fugʊng ka bɨrrǝng, na ba gǝ tumǝn nǝb a gwa dugum ba gǝmmi. ¹³ Bǝrarǝ nyang masi nǝn diya gwan hangʊ kawi nǝn dǝb bujiiritangu. ¹⁴ Bǝrakǝ nǝn me nǝnni dagi bɨrdǝ kurəkwangngən a gwe. A jiya nyangngi nǝn fau bɨrdǝ berǝn. ¹⁵ A gwan giyʊ bo, masi nǝn nǝbǝn nǝtǝtta wertangngi a gwa Niyajiyʊwi, jətəkwang wertang bo gǝn bwantǝta nyina nǝnnuwi tǝ ne gratǝ dunda gǝnni. ¹⁶ Kari nǝn tammǝnǝ nǝngngatangnga jiya dautǝnwi na bo tugarang a bwite, Bǝrakǝ Niyajiyʊ ka nwi lǝmmang rǝ kwani rǝ kang nǝbǝntang ke. ¹⁷ Tǝ ne gratǝ rǝ nǝbbǝntangnga dur nǝbbǝ gram ba Jɨnǝm, Bǝrakǝ bǝ nǝngnga swiyer da yaartǝn a Jɨna ji bǝrarǝ chimba Jɨnǝm, nyǝra bǝ ba nǝbǝn ngarang a jiya nǝngnga bwiyʊwʊm. Tǝ ne grate na be a nǝngnga swiyer da jǝgatang ka Jɨnǝngngǝn a mʊra furdǝ kwauwʊn, me rǝ furdǝ yullʊwʊn, bǝrka nǝngnga rǝ furdǝ yullʊwʊn ki me ba nǝngnga gǝmǝn fini. ¹⁸ Tǝ ruwa bǝmǝn nyini, na ba nǝn chi rǝ kǝmmarang kǝ yʊlgoiyəng, bo nǝn ka nǝnnǝ kǝmmarang no nǝn chi chimba dautǝnwʊm a mʊra Jɨni warigʊ. ¹⁹ Bo kǝmǝn yǝggǝmǝn kumni warigʊ tǝ nǝngnga nyang, na ba nya kautangnga bwi a gwan Jɨniyu rǝ kwa. ²⁰ Masi Niyajiyʊwa chimbǝ lǝmmangngǝmmi, wa gug yari kunta mati a bwiyati, Nigra nǝnnu Yesʊ, a gwa tǝgtangka yǝmmǝng ka dugum bǝ kurəkwangngǝm, ²¹ a mwargǝmǝn Jɨni nyai warigʊ na ba tǝ nǝngnga ji kǝmmari. Masi a nǝngnga swiyerra nǝnna bwi dǝ ba nwi lǝmmang ka gǝng nyagʊwʊng. A gwan Yesʊ Kristiyu, masi grata chiya gwan giyʊ kurəkwang. A chi nyang. ²² Chǝtte, ku nyǝnke kǝmǝn yǝggǝmǝn kumni, na tǝ mitǝnda yǝmba nǝbbǝntangnga kumni mʊlla gǝmǝn baniyǝm. ²³ Mǝn fau mo tǝ yǝm to kǝn jamǝn chiya nǝnnu Timoti, bǝnǝn ya kin nǝn chugǝn a be wʊlakki. ²⁴ Tǝ su nǝbbǝ gram ba Jɨnǝm wargu rǝ ba nǝbbǝn yǝmbǝ nyamǝm. Chǝtǝtta nǝnnu a Italiya kǝ nǝngnga gǝmǝn surang. ²⁵ Masi nǝtǝttǝ nǝn dautənbuwi ta Niyajiyʊwi a chi nǝn Jɨn warigʊ.