¹ Bulus, ni təmri-me mən ni təmri ya gwa nǝbbi me tǝmrangnga gwa nǝbbe, mənni agwa Yesu Kristi na Niyajiyu tei, wa guge hangu a bwiyati- ² na chətəttə nən ka kini warigu, yəgira Ekklisiya ka Galatiyai. ³ Nətǝttən dabi yǝgira jɨnni rǝ chimbǝ lǝmangngǝm agwa Niyajiyuwi Te nǝnnuwi na Nigra Yesʊ kristi, ⁴ wa nǝbǝn durdangǝn bǝrarǝ jɨnni bwirai ya nǝnnuwi go na ngǝ jǝg bǝnna wai fula wu bwira mǝ ka muriyuwe, a mura kəmmarang ka Niyajiyu Tenənnuwʊng. ⁵ Grata chi bwi ya gwan hanguwi kʊrəkwang-kʊrəkwang. Achi nyang. ⁶ Kǝ mǝn mǝna buni kǝ tǝ wulgamǝn bwi rǝ kwa a hanguwi wa baggǝnei agwa nǝtǝtta Kristiyu. Kǝttǝ wulgatǝn bwi a bagi yǝmbǝ dang. ⁷ Kangke me mǝn sʊwere mo ka bagi yǝmbə ləmangngəm we, mənni ka bagi nəbba lʊgro fʊrna jʊnuwʊng na farə go tə wulga yǝmbə ləmangngəm ba Kristiyǝm. ⁸ Mǝnni ka chi nǝ nǝn ki, kǝn we tǝmri a jirre wa jiyu rǝ kaggi kagi finang ka yǝmbǝ ki, a dimǝn na a bǝnǝn sʊggǝmmǝnǝm, a chi wʊn nǝngatǝn nyiyu. ⁹ Nyǝnkǝ sʊwe rǝngǝng rǝ jiguwʊ kǝmǝ yigtǝne mə sʊwerə mo, "Kǝgu ba si finang ka bagi yəmbǝ lǝmangngǝmi a dimǝna kǝtə yuwʊng ki, a chi wʊn nəngnga tən nyiyu." ¹⁰ Mǝnni me kʊ mən fau ngatang ka nəbbən a diməna ka Niyajiyuwʊng ga? Mən fau mo nəbba nwi ləmmang nən məga? Lawerə kʊ mǝn fau mo nǝbba nwi lǝmmang ka miyǝki, me mǝn bwira Kristiyu. ¹¹ Bəraki mə fau mo tə yəm, chite, mo yəmbə ləmangngəm bə nəngnga finang kang gəngngiyǝn me yǝmbǝ lǝmmangǝm ba nəbbam. ¹² Yuwe ba gwa gu niyu, me rǝ wa məsai mənni, a jiya nyangngi, wa gwa churon ka Yesu Kristi bera mi. ¹³ Kətə nwi a jiya yobi fʊni ya miyu wʊn jiregra a mura fungtang ka Yahudawang, nyǝngkəng ne kʊnnang kʊlən da Niyajiyuwʊnəng rə ngəng a suməna bungotang na bo mǝn fare mu mǝn lukte. ¹⁴ Kǝn nǝngnga wululo a mura fungtang ka Yahudawang kən lii tungre ta miyu a gwa mura nǝbba miyǝm. Kən nəngnga kweltə rə kwani a yobi ya fungtang ka tebəba miyəmməmi. ¹⁵ Mənni a fulla Niyajiyuwi a saiməne a jiwu mən ka fʊrda ne miyuwʊni. Ka biye agwa nətəttanguwʊng ¹⁶ ka nǝngnga bwilǝmri rə nungtang Yəlliyangu a mura mi, na nya nəngnga finang ka ngəng a mura nəbbə me Yahudawam, nǝngnga bǝ kutǝkuttǝ mo gul bwi tǝn dʊgʊm. ¹⁷ N'diba Urshalima agwa nəb təmrəm ba chi nǝb tǝmrǝm a kag ka miyənəng. A nyangngi kən di ya Arabiyang kən kawe bwiya Damaskase. ¹⁸ A buk ka jətə tə bwanbiyəng kən gwiya Urshalimang na yigi yǝm Kefas, kənəng chi kin ka kotə kwau a jər tənuwung. ¹⁹ Mənni chubə bagi nəb tǝmrǝm a di mǝnna Yakubuwi, chi ya Nigrai. ²⁰ A mura ji mulagǝmmǝni kǝn sʊgǝmǝn bǝ nyam a kak ka Niyajiyuwʊng, me nyar a muri. ²¹ A gayǝng kən diya təm ba Suriyam tən Kilikiyang. ²² A jǝhi waiwe kʊlən də ka Yahudiyan ba mura Kristiyǝm na nya yǝmmi be. ²³ Hanjim bə nwi mǝn sʊwe sʊwe, ni nanu wungla bəni ka chi ni warə yǝmbə nǝbbǝtangnga yǝmbǝ nyammi bǝna nu hangu lugtǝrəm." ²⁴ Hanjim ka ne gratə Niyajiyu bǝra nə me.