¹ Bulus ni təmriya Kristi Yesʊwi a gwa kəmmarang ka Niyajiyʊwʊng na Timoti chiya nənnʊ, ² yɨgira bə yʊlgoiyəm na ba nəbbən yəmbə nyaməm bən ngagərəm chətte a mʊra Kristi bə ka Kolosiyəm. Masi nəttətən dautənbəwi na chim bə ləmangngəm bən jɨrera a gwa Niyajiyʊwi Te nənnʊ. ³ Kənən nəngnga wʊnan a gwa Te nən nʊ Nigra Yesʊ Kristiyʊ mənni bo kənən nəngnga nyini rʊwani bəra nən jɨn jʊtəkwang. ⁴ Kə nən nwi nəbbəntangnga yəmbə nyam ba jɨnəm a mʊra Ni jɨgri Yesʊwi na rə yodai wʊtə karəgi warigʊ a bə Niyajyʊ a samənəm. ⁵ Katə nən wai yodai dʊra sim bərarə titangnga fʊri wʊ nya a jɨni tigəmən a jiyʊ. Kə tə nwi a jiya yəmbə nyam rə titang ka fʊriyəng dʊra sim rə yəmbə nyam rə chimbə ləmmangngəm, ⁶ ba be gəmənəm. Bam yəm bə ləmmangəm be ka turre bətə ka bəre mənni gəra mʊra gʊsəte warigʊ. Bə nəngnga nyang a mʊra jɨni, na ko tə nwiyʊ. Natə məssa nəttətta nən dabi ta Niyajiyʊwi a mʊra yəmbə nyami. ⁷ Bambe gə yəm bə nyam bətə məssa a gwan Abafarasi chʊgo swiyeriya a yodai ya nənnʊ. Wʊ nga gəri a nəngnga swiyer da Kristi a nyiya nənnʊwi. ⁸ Abafarasse ka jəgga bəbən yodaiya jɨnnʊ a We. ⁹ Bəra rə wai yodai, dəbera ko nən nwiyʊ nən dʊbe nəngngatangnga nyini rʊwani bera nən jɨn. Nən nəngnga chəllan tə ri rə yəmtang ka kəmmarang kaggəngəng a mʊra bərsan warigʊ tə yəmtang a yobiya Wei. ¹⁰ Ka nən nəngnga nyini rʊwani na ba ta yoyom ba dautənwʊm mʊra Nigrai nyəngkə ba nwi fur də kwauwʊn a mʊriya juwan gʊ. Ka nən nəngnga nyini rʊwani nyəngkə jɨn bətə yoyom gərəng natə yɨgtən-bətəbi a mʊra swiyer də nyan də tə nəngngarən na bo tə gra mʊra yəmtangnga Niyajiyʊ. . ¹¹ Ka nən nəngnga nyini rʊwani tə yɨgtən kumni a mʊra dəməntang ka jɨnəng a mʊriya kumnita gratətta gʊwi a mʊra tautangnga furi tən mitang ka daang. ¹² Kanə rʊwa nyini bətə nəngnga wʊnnan rə fur də kwauwʊn a gwa Tei. Wa dəggən tə nya wʊngni sʊ a mʊra kʊla nəbba nəbbən yəmbə nyam a mʊra kwetərai yangʊ. ¹³ Ga jəgbəne wa dʊʊtətta kummi ka kaubwi nən nən na dʊʊtətta yodai ta Yəllangʊwi. ¹⁴ A gwa Yəllagʊwi gʊnə nya yiyatangngi na yənotangnga jɨni bwiraiyʊ. ¹⁵ Yəlli gən wʊllo Niyajiyʊwi me mən churri. Gərə jigʊ a mʊra jɨni nəngngai warigʊ. ¹⁶ A gwa giyʊ gʊn nəngnga jɨni warigʊwi, rə yə ka jiyʊ tən ya gʊsəti, tən yən churi, tən yə memən churi; kən dʊntəllən də kʊntan ki na dʊʊte na dʊʊbe, rə nʊngtangnga kwaggi, jɨni hi warigʊ ga nəngnga na bo bəra nən hangʊ. ¹⁷ Hangʊ ka chi rə jigʊ, kə məna dʊ jɨni warigʊwʊng, a mʊriyang gi jɨni warigʊ ka mʊrga bwi. ¹⁸ Bo gən dʊr da Ekklisiyan. Gərə jigʊ, gə bo gə bwe rə jigʊwi a mʊra ba bətərrom bərarə nyang karə sər də rə jigʊwʊn a mʊriya wʊni ji. ¹⁹ Bəraki Niyajiyʊ ka nəngnga jɨni warigʊ a rii bwi a gwa giyʊwʊng, ²⁰ Bo ka be rə nwigotang a wʊnə ji yɨgira gi a gwa Yəlliyʊ. Niyajiyʊ ka be rə chiyəm bə ləmangngəm a gwa dʊgʊm ba gəmmi a jiya riyang yʊwarangngi. Niyajiyʊ ka berə nigʊtangnga wʊnə ji a gwa giyʊ. Kən jɨniya gʊsəti ki, ki ya mʊra jiyʊ ki. ²¹ Bəraki a gʊ fʊlla tən fʊbe, a gwa Niyajiyʊwi tən nəbba kaggəm ba gəm a mʊriya furi na swiyetəttə bwirai. ²² Mənni kʊ ka berə nwigotang a gwa bwiyatagʊ ya bwiyai. A nəngnga nyang na ba tə chi rə kalʊri a gwa giyʊ, metənə bwiran, merə ji bən kəba gən gəri a kak ka gəng. ²³ Tə jau kak a mʊra nəbbəntang a yəmbə nyam ki, tə yɨgtən bwi tə si rə kumni, bə me bə dimən na titangnga furiyəm a yamtang a tʊməntangngəm bətə nwiyəm. Bambe gə yəmbə ləmmangəm bə sotənna wʊnə wʊ nəngnga a mʊra gʊsəte. Bambe gən yəmbə ləmmangəm bə me Bulus chi mən bwiran gʊwʊm. ²⁴ Kʊ mən nəngnga bwiləmri rə kʊnnang ka miyəng bəra nən jɨn. Kən rii a bwiya miyʊ jiwʊng bʊna mʊra kʊnnang ka Kristiyəng bərə bwiya gʊwi wʊ gən Ekklisiyai. ²⁵ Bərarə Ekklisiya ka yʊllo bwira, bərarə jiya chimən bwi Niyajiyʊwa ni bəra nən jɨni na rii yəm ba Niyajiyʊwʊm. ²⁶ Bambe gə yəmbə nyam ba kəllʊ-kəllʊ bwiyəm, na bara mʊra jɨte na tangngərte, mənni kʊ kən jɨgtənne wa ba nəbbən yəmbə nyam a giyəm. ²⁷ A gwan jiyʊ gʊn Niyajiyʊ a fau go gə nʊng nyatang ka gratəng ka kəllʊ-kəllʊwi bwiyəng ka yəmbə nyammən a mʊra nəbba Isra’ilam. Ka nʊngnge Kristi ka mʊriya jɨni, a jiya dʊra siyəm a mʊra gratəttə. ²⁸ Nən gən gʊ nən si finang ka gəngngi. Kən nən wʊtən suu a wʊnə ni, nən məssatəna wʊnə ni rə bərsan warigʊ, na ba nəbbən wʊnə ni wa ririyʊ a mʊra Kristiyʊ. ²⁹ Bərarə nyangnyəngki gʊ mən tərsatənna swiyər da gən rə kumnitang gʊ wʊ nəngnga swiyer a mi rə kumniyʊ