¹ Kǝ nigrah nǝbbǝ tung jɨni a chǝriya Niyajiyuwi a suwe go, "Yai jini yaiyǝ yǝmbǝ nyam ga?" ² Kǝn Istifanus a ngatǝn go, "Chǝtǝtta miyu na tǝbǝbbamiyǝm, tǝ kausu, Niyajiyu wun rǝ gratǝ ka betǝne wa tennǝnu Ibrahimi a fulla ka Mesofotamiyai, a nya dubǝ Haran; ³ Ka sotǝn go du tǝmba mum na dugurtǝtta mu, na diya tǝmbǝ bǝn nungngǝnǝm. ⁴ A gaiyǝng ka du tǝmba Kaldiyawamǝm a yǝga ciya Haranǝng; a gaiyǝng, bukkǝ niya buwi a bwiyang, kǝ Niyajiyu a bu hangu yǝgira tǝmbambǝ tǝ ci wa kuwum. ⁵ Mǝni Niyajiyu a nebǝ tǝmba kulam fu, mewu bani wun hangu ba fau nawi. Mǝni ka tǝggotǝn yǝm, nǝn kwini a lambǝ bǝrǝ bwe-wu ba ne kulla tǝmhǝmmi, gǝtǝng sudagǝn, a bukkang gǝng. ⁶ Niyajiyu wa sotǝn yǝma hanguwi nyenke, go sudagǝn ba nǝngnga futa bagi tǝmbǝ menǝn bǝgiyǝmǝm, nǝbba tǝmhǝmǝm bo ba ne kunang hanjim a dǝga kewetǝ yǝgira jittǝ betǝ tǝ gwar. ⁷ Mǝni bǝn nǝngngatǝn duuta bam tǝm ba dǝgga kewetǝm; Niyajiyuwa suwe go; Bukka nyangngǝng ba jǝrmǝna bam tǝm a nǝngngaimǝn keweta gaiwe; ⁸ Niyajiyu ka nǝngngatǝn yǝm bʊrǝm ba mwetang ka biyang ka jwinǝng a Ibrahimi, kǝn Ibrahimma bu Ishakuwung ka mwetǝn biyangka jwinǝng a ko wun naruwiyǝng; Isahku ka bu Yakubu, Yakubu bo ka bu tabǝbba Israilam kwau ajir bǝsu. ⁹ Chǝtǝttan Yusufuwi ka nui nugun da ciyan jiyuwun ka mii hangu a diya Masar a kewetǝng. Mǝnni Niyajiy katǝn hangu. ¹⁰ Ka jǝg hangu a mura bwiya chǝtǝ na kǝmmatǝni, Niyajiyu ka nǝngatǝn nyaguwi ri yǝmtang a kakkang Fir'aunang, niduwa Masari. Fir'auna dǝg hangu a dutetta tǝmba Masarǝmmi warigu na bo rǝ jǝni karǝgi warigu. ¹¹ Kǝn nǝngnga juun dǝni a tǝmba Masarǝm na tǝn Kan'ana nǝbba nǝnnǝm ka no kunong bǝri bunai ya jini jauriyu. ¹² Mǝni fulla Yakubu a nwi mo ka jini jauri a tǝmba Masarǝmǝng, ka tǝm tǝbǝba nǝnǝm a jii wurǝ jiguwiyǝng. ¹³ A yǝgitang kǝn suwungngǝng, kǝn Yusufu a nung dudangǝn chǝtǝtanguwung. A wai fullawe gun Fir'auna a yǝm chǝtǝtta Yusufuwi rǝgi. ¹⁴ Yusufu ka tǝm chǝtǝttagu go be nǝn ten jiyu Yakubu rǝ jǝnan jiyu rǝ wutǝmbajiyǝm yǝggira Masar, wariguwa jiyu nǝb fur nyibi a ajir bǝ nu. ¹⁵ Yakubu ka di a ciya Masar gǝ tǝn te bǝbba nǝnnǝm yǝgira bwiyatanjiyu. ¹⁶ Kǝn dǝb hanjim di rega Shekem yagi digga suwun Ibrahim a sutta rǝ chǝmmǝr da wetǝtta kweyǝlgai a kangka bǝtǝbba Hamorǝm a Shekǝm. ¹⁷ A jii wu yǝm bʊrǝm a diye rǝ doi, yǝm bʊrǝm bǝ Niyajiyu a sotǝn na Ibrahimiyǝmǝm, nǝb ka yǝgtǝn bwi a bu-buwong deni a Masar, ¹⁸ Kǝn nǝngnga gu nidʊ a Masar wa yǝmbǝ Yusufuwi, ¹⁹ Wai nidʊ we ka julla nǝbba nǝnnǝm a nǝngngatǝn yari dǝni a te bǝbba nǝnnǝm, a dǝg hanjim durǝ bǝtǝbbǝ kǝtǝl-kǝtǝlǝm a mura kunong go na ba karba nǝngnga yuum. ²⁰ A wai fulla kǝn bu Musa, a tamǝn bwe dǝni a kak ka Niyajiyuwun kǝn norang songǝr tǝ bwanbi a kaita tei. ²¹ A jii wun ti hangu a tariyu, kǝ yuwiya Fir'aunai a dǝb a noro chi nyira bwe guwung. ²² Kǝn nǝngngatǝn mǝsarang a Musai rǝ yǝmtang nyǝra ka Masarang warigu, mǝni ka dǝltǝna yǝngtangnga yǝm bo rǝ swiyerdangǝn. ²³ Mǝni fulla lau nyǝra jǝttǝ furtǝ gwari, ka nǝngnga kǝmarang ka chutangnga chǝtǝttangu Isra'ilang. ²⁴ Kǝ churǝ gu dǝgtǝn nu a niya Isra'ilai, kǝn Musa tuga wun dǝgtǝn nuwi, a surmǝn kwira bwe Masariyǝng: ²⁵ Musa kǝmarǝ go chǝtǝttan gu ba fum go tugarang ka Niyajiyuwung a bǝgimine, meni alǝgi! A jǝggabǝ. ²⁶ Tǝma silang kǝ churǝ bagi ba Isra'ilam bwigare; nǝngngarǝ go nagǝ wutugong; ka sotǝn go, ban chi, tǝn chǝttǝ wulaiya ma kǝtǝ bwigara bwita junnuwung? ²⁷ Mǝni wun nwitǝna chiyu ka nyǝng Musa rǝ kǝngngǝn, sotǝnǝ go, 'Wunǝ ga nǝn grate na duuti dura nǝnni? ²⁸ Fau mo juwi ga, nyǝnkǝ ju wa Masari rǝgǝ dariyǝng ga?' ²⁹ Musa nwirǝ nyangngǝng ka mwa, yǝgira tǝmba Midiyanǝm, nyǝra ni mwa sǝg-lengngi. Ka bu bǝtǝm barǝm bǝsu a gai. ³⁰ A bukkǝ jutǝ furtǝ gwar a suwung, kǝ we tǝmri ya bǝtǝnǝ wa hanguwi a mura siya Bang ka Sinayǝng, a mura sǝlǝn da kǝrangngǝn a sii. ³¹ Musa chu mugongngǝng, ka nwi mǝnatangnga buni; ka kwartǝn rǝ do go nagǝ yǝgtǝn jǝgatang, kǝ jir da Ta jiyuwun suwerǝ go, ³² 'Mǝn Niyajiyu wa tǝbǝbamummi, Niyajiyu wa Ibrahimi, tǝn Ishaku, na bo Yakubuwi.' Tatǝ ka ma Musa dǝmǝn ba jǝga. ³³ Kǝ Niyajiyuwa sotǝn go; jǝgamǝn lǝbǝrtamu bǝrkǝ gun siwi we gu yulgoi. ³⁴ Me buriwe kǝn chu kunang kǝ nǝbbamiyǝm nora Masarǝng; mǝni kǝn nui hegetang ka jiyǝng, bǝrirǝ nyang be mo na jǝg hanjim, be ku nyǝngke na tǝmǝn yǝgira Masar!' ³⁵ Musa wung hanjima kwilai, a sotǝn go; wunǝ ga sanǝn yulo nigrah tǝ nǝngnga duuti a nǝna jiyu? Nǝn gǝ bo gu Niyajiyu a tǝme ba yulotǝn nigrah tǝn ni jǝgriyu. Niyajiyu a tǝme hangu a kangka we tǝmri wu hanguwa chuwa siyu. ³⁶ A bukka nungtangnga jǝna mǝnatang a buniyu dǝndangngi a Masar na bo wimang kə kwiwurig; Musa ka jǝrmǝne nǝn hanjima Masar tǝn siya muri bo, a fulla wun bana hanjima yoyom jǝtǝ furtǝ gwari. ³⁷ Nǝn Musa hi gwa sotǝna Isra'ila go; 'Niyajiyu ba guggǝmǝn gu ni yuwe yǝm nyǝra nǝ mii a mura chǝtattan junu!' ³⁸ Wai niwe ka mura kurgarang ka nǝbǝng a si tǝ we tǝmri wa suga yǝm kin a Bangka Sinaiyǝngngi. Ni waiwe wu ka tǝn tǝbǝbba nǝnnǝmi, wai niwe ga yuwe yǝmba yumǝm ba nǝbǝnǝm. ³⁹ Nihi gǝ wa te bǝbba nǝnnǝm a kwila nwitǝn bǝ yǝmmi; hanjim ka jǝngmana sǝtǝnitan jiyu, ka dǝgga furna jiyu go tǝ kabiya Masarǝng. ⁴⁰ A wai fulla gun hanjima sotǝna Harunai go, 'Nǝngngai gimǝn weni yǝ ba sigǝmmǝn kakgi. Bǝrki Musa waiwe jǝre nǝ nǝn a tǝmba Masarǝmǝngi, nǝ yǝmbǝ jiya nya hanguwi. ⁴¹ Kǝn hanjim a sum betǝnggang ka be nǝngngatǝn yobiya tuntangnga yoniyǝng. Hanjim ka nwi bwilǝmmri rǝ ji kanajiyu wa nǝngngai. ⁴² Niyajiyu ka ne yǝlli a du hanjim fung betǝsongngi ya jiyu, nyǝngkǝ mula rǝga wangka nǝbǝ yuwe yǝmǝm, “Tǝ tungngimǝn yon da jɨni rǝ yumiyǝn a jǝtǝttǝ furtǝ gwar tǝ nǝngngai ga jin Isra'ila? ⁴³ Kǝtǝ nga rǝ gwa ruwaninyin a Molekgi tǝn be songngi ya kojiyu wa Rafemi, na bo jǝni tǝ nǝngnga rǝ kana jɨnuwi tǝ ne grate Bǝrarǝ nyang bǝn di nǝn jɨn a keweta sumǝna Babila. ⁴⁴ Tebǝbba nǝnnǝm karǝ kungngoi ta netang a grati bǝrarǝ ruwatang a nyini a si muri, nyǝra kǝ Niyajiyu a nǝ sori rǝgǝ Musang, go a nǝngnga nyǝngkǝ nung mo nǝngnga rǝgǝng. ⁴⁵ Kungngor dǝ ruwa nyiniyən dǝ tebǝbba nǝnnǝm a be gǝrǝn gǝn de a fulla Joshuwai. Jǝnihi a nǝngnga fulla wu hanjima tau ban tǝmba nǝba kumǝm na Niyajiyu a ka hanjim a kakka te-bǝbba nǝnǝmǝng. Kungngoihi nǝn nyang yǝgira tangnger da Daudan, ⁴⁶ Ka nya yutang a gwa Niyajiyuwi, ka nǝngnga chǝlan ki gǝbǝ nya gu chiri bǝri nǝn Niyajiyu wa Yakubuwiki. ⁴⁷ Mǝni Sulaimanu ga mu kai bǝra nǝn Niyajiyuwi. ⁴⁸ Mǝni wa li grati mebǝ cira kaitǝn mu rǝ kaniyu, nyǝnkǝ ni yuweri a suwe rǝgǝng, ⁴⁹ 'Ji gu chira miyu, gusǝtǝ bo gu mǝn nyab nanamiyuwi. Mǝni tǝnǝ kai gǝtǝ bǝtǝ mwimǝnni? Ta jiyu ga suwe: Mǝni bo bǝn gǝrmǝna le? ⁵⁰ Me mǝmǝn nǝngnga jini yaiye rǝ kana miyu ga? ⁵¹ Jǝn nǝbbǝrǝ dutǝttǝ nǝgǝniyǝm bǝn mwetǝn bǝ bitətta kwalti a mura furni na suniyǝm, kǝtǝ kwila We Yulgoi jǝtǝkwang; tǝ nǝngnga jiwu tǝbǝbba jǝnnǝm a nǝngngai. ⁵² Wunǝ ni yuweri yəmi gu tǝbǝbbǝ gram ba jǝnəm a gugtǝn bǝ duri? Ka juwo nǝb yuwǝrǝm ba luwe wu Rǝ Yǝmbǝ-nyami, bo kǝtǝ yulo ba nebbǝn hangu na ba juwum, ⁵³ Jǝn tǝ nǝbba yu duutǝttǝ nǝbǝ tǝmrǝma nǝbǝnni mǝmi tǝ nǝngnga bǝ soriyan gu." ⁵⁴ Nǝbbǝ gram a nwi nyang nyǝngkǝng, furna jiyu ka kiya deni kǝrsǝ nungtǝ bǝri nǝn Istifanus. ⁵⁵ Mǝnǝ hangu, a ri rǝ We Yulgoi, ka gug kǝmta jiyǝng, ka chu gratǝtta Niyajiuwi; kǝ churǝ Yesu a siya kangkǝ nyang ka Niyajiyuwung. ⁵⁶ Istifanus a suwe go, "Chuwe, kamən churǝ jii a wumǝn bwi, Yǝla Niyu gwa siya kangkǝ nyang ka Niyajiyuwʊng." ⁵⁷ Mǝnni nǝbbǝ gramhǝm ka gug jir rǝ kumni, a mau wuri, ka mǝra suna jiyuwung, wariguwa jiyu ka guntǝn na hanguwi, ⁵⁸ Ka jǝr rǝga bukka bǝrǝngngǝng, ka mǝngngo rǝ wete, ba bʊ bugǝm, ka jǝgamǝn neta dutǝttanjiyuwi, ka tiya kakka gu bweli rǝ kumniyu bǝrǝ mo Shawuluwi. ⁵⁹ Fullawun hanjim ka mǝngngorǝ Istifanusi, ka ci bǝrǝ Ta jiyu suwe rǝ go, "Ta jiyu Yesu, yu we miyu." ⁶⁰ Ka ru a gug jir rǝ kumniyǝng, go, "Ta-jiyu, kari bǝn tau yai jǝni bwirai yaiye a dudan Jiyǝn" A suwe nyang nyǝngkǝng ka da dum.