¹ Chitte tǝn tebe, tǝ nwi jǝgtang ka durǝng ka miyǝng yigira jǝnni." ² Na kulǝn a nwi Bulus surǝ yǝm rǝ langngǝr da Ibraniyawamǝng ka marasi sau. ³ Mǝn ni Yahuda, buwang ka Tarwasa wa Kilikiyai, mǝnni nya mǝsarang a bǝrhǝn dan de a kang kan Gamaliyallǝng. Kǝn mǝssai mǝn nyagu a mura soriya tebǝgram ba nǝnnǝmmi. Ka mǝnǝ nugǝn da fungangna Niyajiyuwun nyǝra kǝtǝ waringǝm ba jinǝm ta karǝ gǝrǝ kuwun. ⁴ Kǝn ne kʊnnang wai Juwiwe yǝgira bwiyatǝ, kǝn buwa nǝbbǝ barǝm tǝn nyim dǝgga jarǝm, ⁵ Nǝn nyang bo nigra nǝbbǝ tung jǝni a chǝriya Niyajiyuwi tǝ nǝbǝ gram warigu ba bu bukan miyǝng to kǝn yu wani a gwan jiyu bǝrarǝ chittǝtta ka Dimaskai, na ba diya gai, na be nǝn ban hajim a buwawe yigira Urshalima nan ne kunang hanjim. ⁶ A jiwu mǝn ka mura yommǝng, na lauwe rǝ do Dimaskang,rǝjʊgʊr da kon nyǝlbatang ka jire wa ji tʊng kǝ grajiya kwetǝre a kauwuriyǝng. ⁷ Kǝn yarra tǝm kǝn nwi jir swimǝnǝ go, 'Shawulu, Shawulu, bǝrǝ wulai kǝmǝ ni kunanngǝng?' ⁸ Kǝn ngatǝn mo, "Mǝnǝ wǝnǝ, Nigra? Ka swi mǝn go mǝnǝn Yesu wa Nasaradi wu mǝn ne kunangngi. ⁹ Bǝ nǝn kakinnǝm ka chu kwetǝrai, mǝni a jǝgga bǝ jir da wuna swimǝn yǝmmǝn. ¹⁰ Kǝn suwe mo, 'Wulai ji bǝn nǝngngai Nigra?" Nigra ka swi mǝn go, 'Gun na diya mura Dimashku, a gai bǝn sunnǝn ji a chin kwag bǝn nǝngngai. ¹¹ Dǝmǝn bǝn chu tǝm bǝrarǝ nyǝlbatang kǝ kwetǝreng, kǝn diya Dimashku rǝ tugarang ka bǝ nǝn ka kinnǝm. ¹² A gai kǝn nya gu ni wǝn bǝrǝ mo Ananiya, wu nwi tate Niyajiyuwi rǝ duute, rǝ dun dǝ nyan agwa Yahudawa bǝ chiro gaiyǝm. ¹³ Ka be gwa miyu, ka si a bǝmtǝnna miyǝng, ka suwe go, 'Chiyamiyu Shawulu, yu chutang ka mung.' A jii hi waiwe kǝn chu hanggu. ¹⁴ Ka suwe go, 'Niyajiyu wa tebǝ gram ba nǝnnǝmi ka sanǝn go nan yǝm kǝmmarang kangǝng, kǝn chu wu nya wǝ bo kǝn nwi jir da jire wa nyiyanguwǝn. ¹⁵ Bǝn yulo wu burǝ bukangngǝngi a gwa nǝb wariguwi a jin chuwi na nwiyu. ¹⁶ Mǝn yam wulai ku? Gun nan nǝngnga nǝn batisma, na tunǝn jǝni bwirai ya mu nan bǝra a mura dundangngǝn. ¹⁷ A bukkǝn kauwe bwi ya Urshalimang, a jii wǝ kamǝn ruwanyini a mura kandǝn ruwanyiniwʊn, kǝn ni chuwarang. ¹⁸ Kǝn chu hanguwung ka swimǝn go 'Nǝngnga wulag dʊ Urshalima ku nyǝng nyǝngke, bǝrki me ba nga rǝ butang ka bugngǝng ka mʊng a gwa miyu ¹⁹ Kǝn suwe mo, Nigra, hanjim ka yǝm nyǝng kǝn dǝg hanjim rǝga jarǝm na bo bugte bagi ba nǝbbǝn yǝmbǝ nyamǝm a kantǝtǝn ruwa nyiniwi warigu. ²⁰ A jiiwʊn kusre dugum ba wa bu buka mʊng Istifanusǝng, mǝn ka sisiya gai mǝn burǝ buka ba ju hanguwum mǝn tautǝn dʊtte ta bǝ juwum. ²¹ Ka swimǝn go di bǝn tǝmmǝn na gai agwa ba yǝmbǝ yǝmhǝm mǝm. ²² Ka kautǝn su a hanguwi a du hangu a suyǝm yigira wai jii. Ka gug jir a suwe go, tǝ dǝbmǝn wai ni we a gussǝte: a dautǝn ba chi rǝ yuwum; ²³ A jii wa hanjim a gʊg jirri kǝ miya sǝre dʊttǝtan jiyu, bo gʊg kʊrra sǝmba, ²⁴ Nigra nǝbbǝ barǝ kǝrangǝm ka dǝg go be nǝn Bulus a gun kawurre, ka nǝbbǝn sori go sǝnna hanggu rǝ sǝmbi, go na gǝ yǝm jiya nǝngnga kǝn hanjim ma gug wurte nǝngnga kak rǝgǝ nyangngǝng. ²⁵ A bukka buwa rǝ hǝllatǝng, Bulus ka sotǝnna kweli wu ka giya kǝngngi go, "Nǝn nyagu nǝngnga tǝn sǝmbi ya niya Romawai wu duuta tibi ga? ²⁶ A ji wu kweli hi a nwi nyangngǝng, ka diya gwa nigra nǝbbǝ barǝ kǝrangngi suwe rǝ go, "Wulai ji mǝn farǝ mo nǝngngai? Bǝraki ni we ni muri ya Romawai." ²⁷ Nigra hi ka be a sotǝnna hanguwi go, "Swimǝn, mwe mǝn ni ya Romawai ga?" Bulus ka ngatǝn go, "Nǝn nyang." ²⁸ Nigra hi ka ngatǝn go, rǝ chǝmmǝr mwam n'suta sǝr da bwe tǝmmiyǝn." Kǝn Bulus a suwe go, "Mǝn buwong ka tǝm ba Roma. ²⁹ Kǝ nǝbba beem go natǝ sǝnna hanguwum, ka du rǝ kwa rǝ kwa. Nigra nǝbbǝ barǝ kǝrangngǝm gǝ rǝ kǝgang ka nwi tate nyǝngka yǝm go Bulus bwe muri ya tǝmba Romawai bǝraki ka buwa hangu. ³⁰ Rǝ silang, Nigra nǝbbǝ barǝ kǝrangǝmi ka fau go gǝ yǝmbǝ nyam a sǝnatang kǝ Yahudawa nǝngngatǝna Bulusǝng. Ka kǝmǝn na chǝntǝng, ka dǝg nigra nǝbbǝ tung jǝniya chǝriya Niyajiyuwum na dǝntǝlǝn da nǝb kurgarǝm, da chiga. Ka be nǝn Bulus a tiya jʊggʊr da jiyǝn.