¹ Kən nənga gu ni a bərda Kaisariyan, rə dun mo Karniliyas, nigra nəbbə barə kərangəmi a kʊlən də bərə mo kʊlən da Italiyanən. ² Ni fungri nyagu, wa nəbən dudangən tən kaitangu a netang a gratə Niyajiyuwi; ka nǝgatən nətətta chəmməri a bə farəm mwam rə ruwatən tang a nyini a Niyajiyu kotə warigu. ³ Nyəra rə ji wurwin rə koyəng, ka chu we təmriya Niyajiyuwi bera gwang giyu. We təmri a sotən na hanghuwi go, "Karniliyas!" ⁴ Karniliyas ka maitən kəmta we təmri rə tata bwi go, "Wulai ji, nigra?" We təmri ya sotən na hanguwi go, "Ruwani nyina mu rə nətətta mu tə mən ne nəbbə me rə gəmi ka gwi a yulo ji ya kəmarangi a lau kag ka Niyajiyuwung. ⁵ Ku təm nəb wulang a di ya Yafa na bənən ne Saminu, wung bərə mo Bitrusi. ⁶ Ka chi tən Saminu ni tʊ biti, kaitangu ka nyiya wimangi." ⁷ We təmri ya sotən yəma hanguwi na diyəng, Karniliyas ka buwe bwiranəm ba kaitan guwum, na rə ni barə kərangyi wu fung Kojiyuwi a mura nəbbə barə kərangəm bə nəngatən swerəm. ⁸ Karniliyas ka sotən wargu ji nəngnga bwiyu a hanjimi ka təm hanjim a Yafang. ⁹ Jər rə moriyəng na nyəra ji rə koi tə nugkunəng lawerəng, ka yomban jiyim na lawerə bərəng, Bitrus ka gui a kaita jiyu go na gə ruwa nyini. ¹⁰ Ka nui junəng farə ji ba jauwi, məni a jiwu nəb ka nəngatangnga jini-jauriyuwung, kən ne churongngən, ¹¹ kə chure korən ka wumən bwi rə kasi səge bwi, guji kutagu nyira ji məra bwi rəgi səge bwi bera gusəte, səge bwi rə kəngər təttangu tə gwar. ¹² A muri ka namtə nani tə gwariwe dəndang rə yə kwara-kwarai a gusəti, rə kəleta jiyu. ¹³ Kə jər hən na sotən na hanguwi go, "Gun, Bitrus, ju nan jau." ¹⁴ Bitrus a jautən go, "Me nyang, Ta jiyu; Bəra ki jamən bə ji wu merə yulgoi we na rə nemərəwe." ¹⁵ Mənni jirhən ka kaba betən kalang kǝ suwʊng bo: "Ji wu Niyajiyu wa tumən ni kari bən suwe mo nən nemər." ¹⁶ Jənihi ya nəngnga bwi kali tə bwanbiyəng; rəkwa-rəkwa kən dəb kasihi yigira jiyəng. ¹⁷ A jiwu Bitrus a dǝga kuma muri bǝra rǝ ji wulohi sureyəng, rǝkwang, nǝb bǝn Karniliyas a tǝmem ka lawewa fugong kan gǝng, a buk ka nǝngnga wu gulǝn da kaitanguwun. ¹⁸ Kən hanjkim a ma yaguwung nəngnga gulən da Saminuwun, wun bəra mo Bitrusi, gu chi wi. ¹⁹ A jiwu Bitrus ka nǝngnga kǝmarang a ji ya wulohiyuwung, We ka sotǝna hanguwi go, "Chu, nǝb bǝ bwanbi ka fanna tari. ²⁰ Gun na suwe nan di tən hanjim. Karǝ nǝngnga firiya ditang tə hanjimi, bǝra ki mǝmǝn tǝme hanjim." ²¹ Kǝn Bitrus a su a nya nəb həməng sotənə go, "Nə me wutə fari. Wula be nə jin?" ²² Hanjim a sotən go, "Nigra nəb bə barə kərangəmi wurə dun mo Kaniliyasi, ni rə yobi yu wu fung Niyajiyuwi, kə yəm rə yobi nya a mura Yahudawa, we təmrə wu yulgoi wa Niyajiyuwi a sotən go a təmnəne nəb na ya kaitangu, na hangu a nya nui yim a nyiya mu." ²³ Kən Bitrus a bu hanjim go dəga kai natə chichi kinəng. Təma silang kə hangu a gun a diya tə hanjiməng, kə bagi chite a Yafa a yo hanguwung. ²⁴ Təma silang hanjim ka lauwe wa Kaisariya, a nya Karniliyas yamerə hanjim; hangu ka buwo wu chitəttangu na kagəm bangəm bərə dom. ²⁵ A jiwu Bitrus a dəgiyei, kə Karniliyas a nya hangu a rutəna təm ne gratəng. ²⁶ Mənni Bitrus ka gug hangu sotənə go, "Gun sissi; mə rə bwimi mən ni." ²⁷ A jiwu Bitrus ka suga yǝm tǝn hanguwi, a yəga nya nǝb a muri ka kura bwitə mwam. ²⁸ Kǝ hangu a sotǝn go, "Jin rǝ butǝjəni kǝtǝ yim to men sori ya Yahudawai ni a murga dur tǝn gu ni wa bagi tǝmi. Mǝnni Niyajiyu ka nungngi go kari bǝn bu gu ni mo merə yulgoi na rə nemər. ²⁹ Bəngə be gaiwe me kani we, a nyənkə təmiyeng. Bəri rə nyang mə gulən mo wula ma kin təm mo biyeng?" ³⁰ Karniliyas go, "Kotəttə gwar ya suwi a wai jiwe, mən ka ruwatanga nyini nyira ji ya koi wurbin a kaita miyu; kən chu, ni a si mǝnna kag rǝ dutǝ kǝlbare. ³¹ Ka suwe go, "Karniliyas, Niyajiyu ka nwi nyini ruwa na mu, tugarang kǝ mǝn nǝngatǝna nǝb bǝ merǝgǝm ka dǝg Niyajiyu a kəma nən mwe. ³² Təm ni a Yafa, na bənəne ni wu bǝrǝ mo Simani, wu bǝrǝ bo mo Bitrusi. A chiya kaita gu ni tu biti wu bərə mo Saminuwi, a nyi ya wimangi.' (A be ki ba sunən yəm) ³³ Rəkwa-rəkwang kən təmnən nəbən. Kən nəngnga nyagu kən beng. Ku nyenke, nən gəba kag ka munga kag ka Niyajiyuwung, na nən nui ji bən suwei wargu nyənkə Ta jiyu sunan grəng." ³⁴ Kən Bitrus a wumən nyi a suwe go, "Bə nyam, kən yim mo Niyajiyu me bə nənga dandangyi. ³⁵ Mənni, a bənə warigu, wu fungri na nəngnga ji nyai ki, ba nya yutang a bwi a gwan giyu. ³⁶ Jən kətə yəm jiya təmtən na nəbba Israilami, a fulawu si finang ka chim bə ləmangəmi a gwa Yesu Kristiyu, wu gən Ta jiyu warguwi- ³⁷ jən rə butəjəni kətə yəm jəna nənga bwiyu, ya nənga bwi warigu a mura Yahudiyai, ya suwa Galiliyu, a buk ka batisma Yohana nənga finang ka gəngngi; ³⁸ jəna tau ya Yesu wa Nazareti, nyənkə Niyajiyu a samən hangu rə We Yulgoi na rə kumniyəng. Hangu ka dəga gani mwam nəngnga swer də nyan rə netang a bwitə ləmangngi nəb bə we bwira ne kunangəm, bəraki Niyajiwu ka nəngəng. ³⁹ Nən bənən bʊ chu jini Yesu a nəngngai warigu a təmba Yahudawam na mura Urshalimai- hanjim a ju hangu a gwa kwaitangnga riyang a jiyu. ⁴⁰ Ni waiwe Niyajiyu ka gug a kon bwanbiyu ka dəg yim hanguwung, ⁴¹ me nəb warigu bo, mənni a nəbba bʊ bugəm a ji ya bən Niyajiyu a ngarəgəm na samən rə jiguwum-nən rə butənəni, bənən jau na nən no na hanguwum a buk ka gune wa ba bətəro-bətəroyəm. ⁴² Hangu a nəbən sori go tənən sitən finang a nəb na tənən ne yimbə nyam no nən ge wu Niyajiyu a samən go na nəngnga tən duta bərə yumǝm na rǝ ba bǝtəromi. ⁴³ Wargu nəb bə yuwe yiməm ka bʊ buk kan gən, go na wunə wa nəbən yəmbə nyam a gi yu ki ba nya yunotang ka jəni bwirayəng a gwa dunda gən ni. ⁴⁴ Bitrus ka ji ya sutangnga yəm a jine yaiyəng, We Yulgoi ka yar tən ne wa wargu nəb bə ka gai kautən su wa hanguwiyəm. ⁴⁵ Nəb bə wa mura bə muyatən biyang ka kwaltəm bə ka kulən da nəb ba nəbən yəmbə nyaməm -wargu ba be tən Bitrusim-ka mənna bwite, bəraki nətətta We Yulgoi kən kwitəna nəb ba kuməm rə kəggiyəng. ⁴⁶ Bəra ki ka nwi nəb ba kuməm surə yəm rə tagi langte ne gratə Niyajyu. Kən Bitrus a nga tənnəng go, ⁴⁷ "Ka rə ni ba dang hi wubən nəngngatən batisma gəra nəb bambi ga, nəb bə ka yu We Yulgoi nyənkə nən rə kəniyəng nən yu grəng?" ⁴⁸ Ka chəlla go nəngngatən batisma hanjimi a mura dunda Yesu Kristiyən. Kə hanjim a sotənna hanguwi go tə chi kin ka yagi kotəng.