¹ Wang kǝn mʊla rǝ jiguwung, Tiyofilos, ka suwe jǝniyǝn Yesu a su nǝngngatang rǝ jiguwi, mǝnni ka mǝssatǝna nǝb, ² yǝgira fulla dǝb hangu yǝgira jiyu. A bukka ne sori nǝb tǝmrǝm bangǝm a gwa we yʊlgoi yu yǝgira bwiranǝm ba samǝnǝm. ³ A bukka no kunangngǝng, ka be rǝ yum, a nʊngbǝn dʊdagǝn rǝ jǝni bǝn yǝm rǝgi me bʊri we. Ka tǝn hanjim kotǝ furtǝ gwar sotǝn yǝm a jiya dʊʊtǝtta Niyajiyuwi. ⁵ mo Yohana me buriwe a nǝngnga baptisma nǝn hi, mǝni jǝn bǝn nǝngnga gǝmǝn baptisma nǝng We Yʊlgoi a kotǝ bani yǝ beri." ⁶ A kwabwi a gʊ kwanniyǝng ka gʊl hangu go "Te nǝnna jiyu, a wai fulla we gʊ bǝn kautǝnbwi rǝ dʊtǝtta Isra'ilai ga?" ⁷ Ka jautǝn go, "me nǝng kǝngniyǝng mo tǝ yǝm fulla tǝn jii wun Tai ya kʊrabwi a mura kumni tan guwi. ⁸ Mǝni bǝtǝ yʊ kumni a jii wu We Yulgoi a sǝgtǝne bwi a jǝniyu. A fullahi ki bǝtǝ chi nǝbbǝ burǝ bukka miyangngǝm a mura Urisalima na bo a mura Yahudiya warigu na Samariya, yǝgira gusʊtǝ warigu." ⁹ A jii Niyajiyu Yesu a su jǝni yaiyǝng, hanjim a jǝga jiyǝng, kǝn dǝb hangu, kǝ korta mǝramǝn hangu a kǝmta jiyuwʊng. ¹⁰ A di na hanjim jǝga jiyǝng, rǝ kwa rǝ kwa, nǝb bǝsu ka siya kakka jiyǝng rǝ dʊtǝttǝ kwauwi. ¹¹ Ka suwe go "jǝn nǝb ba Galiliyǝm wʊla ma kǝtǝ sira sirai tǝ jǝga jiyǝng? Yesu waiwe dǝb gǝmǝn yǝgira jiyu ba kawe bwi nyǝngkǝ tǝ chu yigi rǝga jiyǝng." ¹² Hanjim a kawebwi a Urshalima nyǝkǝ dʊwe hǝlla Zaitunǝng, a bǝmtǝna Urshalimang, yom ba ko gǝriyǝm. ¹³ A lauweng, ka diya gwiya kaita jiyu a gʊ chirowiyǝng. Bana Bitrus , Yohana, Yakubu, Andrawus, Filibus, Toma, Batalamawus, Matiyu, Yakubu yǝla Alfai, Siman wu me bǝ dimǝna kǝmarang ka gǝngngi, bo na Yahuza yǝla Yakubuwi. ¹⁴ Wariguwa jiyu ka murga dur a yʊlo kwan, fulla hanjima jau kak rǝ dǝgtangnga dur a ruwatang a nyiniyu. Bo ka wʊtǝm a jʊgǝṛ da jiyǝn,Maryamu wa bu Yesuwi, na chǝtǝttangu. ¹⁵ A mura yai kote, Bitrus ka gʊna sissi a sǝttǝni ta chetǝtta guwi, nyǝra rǝ nǝb bekwan rǝ furtusu, a suwe go, ¹⁶ "Chǝtte, a chin kwag jiwun mʊlai a ri bwi, wu We Yʊlgoi a suwe wa bugi a nyiya Dauda a jiya Yahuzai, wa sitǝn kaga ba tau Yesuwumi. ¹⁷ Bǝraki nanu kwan a nǝnnu, wukayʊ jangǝmi ya swer dandi." ¹⁸ (Wai niwaiwe ka sʊtatǝn tari ya dʊdagǝn rǝ duwong ka nǝngna rǝ furi bwira guwong, mǝni a gaiyǝng ka yare rǝ dur, fur ka bʊssa, yattǝ ka kwiyo wa tari. ¹⁹ Nǝbba Urshalimam ka nwi warigu, bǝrarǝ nyang ka bu tari hi rǝ langngǝr da jiyǝn go "Akeldama" go "Tara dʊgumi.") ²⁰ "Bǝraki kǝn mʊla a Wang ka fɨtǝng, 'Masi tarangu a yullo kʊllo, kari bǝn dʊ gu ni ya chiya gai, bo 'masi gu dang a dǝb kʊlgǝnǝn da gǝn da gratǝn.' ²¹ Bǝra rǝ nyang a chi kwak, kwan a mura bǝ tǝnǝn ka kin kwini a jiwu Te nǝnna jiyu Yesu ka dǝgirǝ, jǝrrǝ a sǝttǝni ta nǝnnʊwi, ²² a dǝbewa batisma Yohanai bera ko wun dǝbmǝn hanguwa nǝni yǝgira jiyu, a yulo kwan a mura nǝnni a gwa butang a buk a guntang ka gǝngngi." ²³ Kǝn hanjima jǝge nǝb bǝsuwung, Yusufu wun bǝrǝ mo Barsabbasi, wu bo ne dun mo Yustusi, na Matayas. ²⁴ Kǝn hanjim a ruwanyini a suwe go "Te nǝnna jiyu, mumǝn yǝm furna nǝb wariguwi, nʊng bǝn wʊn samǝn na mura bǝ bǝsuwʊmbi ²⁵ na ba mǝra kang bwa ka dan swiyer dǝng na bo jau kak rǝ tǝmrang a gun Yahuza nyǝgǝl wi yǝgira wugokai." ²⁶ Ka nǝngnga saurang bǝra nǝn hanjimǝng, kǝ saurang hǝng a yara jiya Matayasiyǝng, kǝn hanjim a ke hangu a mura nǝb tǝmrǝm bǝ kwau a jǝr kwanǝməng.