¹ Bulus, ni təmriyan Kristi Yesʊwi a mʊra kəmmarang ka Niyajiyʊwʊng, a ji ya yəm bʊrəm ba yuumuməm bə ka mʊra Kristi Yesʊwʊm. ² Yɨgira gwa Timotiyʊ, bwe miya dai, Nəttətən dautən bəwi, bʊmte, tən chimbə Ləmmangngəm ba a gwa Niyajiyʊwi Te nənnʊ na Kristi Yesʊ Nigra nənnʊ. ³ Kən wʊnnatən a Niyajiyʊ, wʊmən nəngngatən swiyeri a fʊlla tebəbbə gram ba miyəm mi, rə fʊri kalʊriyʊ, nyəngkə jʊtəkwang kəmma nən mwe a mʊra rʊwani nyiniya miyʊ kum rə ko. ⁴ Nyəngkən kəmma rə betə kəmi ya mʊwʊng, kən fau mo mən chun, na ki ri rə fur də kwauwʊn. ⁵ Ken kəmmai mən nəbbəntang ka yəm bə nyaməm ba mʊm ba na nʊ rə jigʊ a nee gra mʊ Loyisəm na nee mʊ Afinikiyəm. Kən yəm bo mo ka chi ya fur da mʊn. ⁶ Wai we gən jiya nəngnga ki mən kəmma nənne mo kau bwi fugtə nəttəttə mən ka gəra Niyajiyʊwi, wʊ mʊra mwiyʊ wʊn nya a gwa tiyatang a kana miyʊwi. ⁷ Bəraki Niyajiyʊ a nəbbən be we tati, mənni wa kumniyʊ rə yotang a dai na yʊwʊrtang. ⁸ Bərarə nyang, kari nwi bujəri a gwa bʊtang ka bugəng ka Nigra nənnʊwʊng, me, Bulus, bʊwa bərə nən gi. A ji a nyangngi, chi rə bʊtang a bwi a notang a kʊnnang bərarə wautang a yəm bə lammangngəm a ji ya kumni ta Niyajiyʊwi. ⁹ Niyajiyʊ ga yiya bən ka bəbbən rə buwʊng ki yʊlgoiyəng. A nəngnga nyang, me mo bəri swiyer da nənnən, mənni a mʊra kʊratang ka bwiyəng ka gəng tən nəttəttən dautən bəwi. Hangʊ ka nəbbən jɨni yaiye a mʊra Kristi Yesʊwi, a ji fʊlla me wi. ¹⁰ Mənni kʊ yiyarang ka Niyajiyʊwʊng ka jɨre wa tari a betang ka Ni yiyari ya nənnʊ, Kristi Yesʊwʊng. Kristi ga berə mwatəntang a bwiyate, bo ka be rə yuum bə me bə jɨrəm a tari a gwa yəm bə Ləmmangngəmi. ¹¹ Bərarə nyang, kən saimən ni wari yəmmi, ni təmri na ni məssari. ¹² Bərarə wai ji we, kəmən no kʊnang rə yai jɨni ye. Mənni a tai bə bujəri, bəraki kən yəm hangʊ, wai wʊ nəbbən yəm bə nyam wi. Kən nga rige mo ba dəmən a tau ji dəgtən a kangngi yɨgira wai ko. ¹³ Chi rə məssartəta yəm bə nyam bən nwi a miyəm, a gwa nəbbəntang fʊriyʊ, na yotang a da wʊ ka mʊra Kristi Yesʊwi. ¹⁴ Ji nya Niyajiyʊ a dəg nən a kangngi, to a mʊra We Yʊlgoi wʊ ka mʊra nənniyʊ. ¹⁵ Kən yəm wai jiwe, mo ba chiro Asiyam warigʊ ka wʊlgamən bwi a mi: A mʊra dan kʊlən hən nən Fijalas tən Harmajanas. ¹⁶ Masi Nigra ne bʊmte kaitan Onisifarasi, bəraki ka nəngngaimən swiyer deni, bo, me bə nwi bujəri ta chənta miyʊ. ¹⁷ A nyangi, a fʊlla ka Romai, ka fai rə pərsi-pərsi, ka nyaiyəng. ¹⁸ Masi Nigra dəg a nya bʊmte a gwan giyʊ a wai ko hi. Kətə yəm jʊta tʊgai gəra Afisa warigʊ.