¹ Kʊ, kəmmən mʊla gəmən, ba yodaiyəm, kang wang kən sʊwʊng na ba kəmma gəmmən, na bo swi kəmmarang ka jɨnəng kə nyang. ² Na ba tə kəmma rə bwantəttə nəbbə yʊlgoiyəm bə yʊwe yəməm a sʊwe kʊniyəm, na bo sori ya Nigra nənnʊ Ni Jəgri wʊ nəbbən a gwa nəb təmrəm ba jɨnnənmi. ³ Tə yəm nyangnyəngke rə jigʊ, to nəb ba nʊwʊrrəm ba be a kota mwatənti. Ba nəngnga gəmən nʊwʊr, ba jau kak rə yobi a jəllən də bwiran da jiyəni. ⁴ Ba sʊwe go, "Yəm bʊrəm ba kauwetang ka bwiyəng kang gəng ka le? Kʊni-kʊni, tebəbba nənəm ba bɨtɨrom, jɨni warigʊ ka nyəngkə kagərəng, a ji nəngnga gʊsətəng". ⁵ Rə dəngtang kan jiyəng a tamən go, ji tən təm, a chi ya gwa hiyʊ, bo a gwa hiyʊ, rə langtang, a gwa sori ya Niyajiyʊwi, ⁶ mənni bo gwa a yai jɨniya gʊsətə ta wai jii wʊreri, kən yi rə hi wirri. ⁷ Mənni ji tən təm bə kʊwʊm, ti mo bərə kərang ka wai soriyəng. Ti bərə ko duuti na lʊgtətang ka nəbba yəm bə Niyajiyʊwʊm. ⁸ Kari bətə tamən rə wai we ba yodaiyəm, to ko kwan a gwa Niyajiyʊwi nyəra jʊtə nee kwan, mənni bo jʊttə nee kwan nyəra rə ko kwan. ⁹ Nigra me bə nəngnga firi bərə yəmbʊrəm ba gəm, nyəngke bagi churə firi rəgəng. A nyəngngi tə yəm to bə mida nən jɨn. Me bə farə go wʊna jɨnnʊ a kiya, mənni nən wʊnə ki a lau butang a kang. ¹⁰ A nyəngngi, ko Nigrai ba be nyəra nikʊ: Jii ba su rə jiir də kʊntan. Kərang ba ju wʊnə jii warigʊ, mənni bo gʊsəte rə swiyetəttə ka mʊriyʊ ba jɨr kwetere. ¹¹ Na jɨni yaiye warigʊ bən lʊgtə nyangnyəngkəng, bənne nəb gəba dautən we bətə chiyəm? Ka dautən we tə chi rə yobi yʊlgoi rə yəmtang a Niyajiyʊ. ¹² Tə chi ya mʊra tidai, na bo ka dai a betang ka ko Niyajiyʊwʊng. A ko wai we bən tung ji rə kərangngi, mənni jɨni warigʊ ba swira a mʊra kwewi wʊn dəniyʊ. ¹³ Mənni bəra yəm bʊrəm ba gəm, nən yame ji tə fi na gʊsətettə tə fi, gʊ nya ba chiwi. ¹⁴ Bərarə nyang, ba yodaiyəm, na tə katənə titang ka daang a jɨni yaiyəng, tə tərsa bwi na nyagən me tənni dəllənde, tən bwiran a kak ka gəng, a mʊra chimbə ləmmangəm. ¹⁵ Na bo tə dəb mitang ka daang ka Nigrang bərakin yiyarangngəng, nyəra ki chiya nənnʊ wa dai Bulus a mʊla gəmən gərəng bəra bərsan də nen. ¹⁶ Bulus ka sʊ yəm a jɨni yaiye a mʊra wanangʊ warigʊ, a mʊri karə jɨni ya bwai jəgatang deniyʊ. Ba tabə dʊttəta jiyʊwʊm, bə wʊlga jəggatang ka yəm nyəra ki nəngngatən gra yagi yəm bʊrəm bə funəm, wʊtənne wʊngrangnga dʊttatan jiyʊ. ¹⁷ Bərarə nyang, ba yodaiyəm, na kəttə yəm jɨni yaiye warigʊwʊng. Tə tau duttəta jɨnnʊ kari nəbbə mebə fʊng soriyəm ba jʊllagən na ba tə bʊna swiyer də nyan da jɨnnən. ¹⁸ Mənni tə gra a mʊra nəttə tən kəmma bi, na yəmtang ka Nigra nənnʊ Ni Jəgri Yesʊ Kristiyəng. Masi wertang a chi wʊgo yɨgira kʊrəkwang. Amin.