¹ Nəbbə yʊwerəm ba nyatəm ka be gwa nəbbə, a nyang bo, nəb məsssarəm ba nyatəm ba be, ba be gəmən a kʊllʊ-kʊllʊwi bwi rə məssarang ka chʊchʊwiyəng ka jurangngəng, ba jau buri ya Nigra jəg hanjimi. Hanjim bə wʊtəng jurong a dutəta jiyʊ rə kwa. ² Mwam ba fʊng yobi a taltəttan jiyʊwi, bo a gwa hanjim bən ngəlmən a kalʊri ya yəm bə nyami. ³ A gwa sʊwi ba yi gən rə yəmna na jʊlaiyʊ. Jurang ka jiyəng me ba gʊllo; duutəta jiyʊ ka diye rə do. ⁴ Niyajiyʊ a dʊbə weni təmri ya nəngnga jɨni bwiraiyʊ. A nyangngi ka tʊng hanjim a mʊra kum yəlʊwi rə kərang kə me bə bwiyarəng, a bʊwa rə chənte yɨgira ko duuti. ⁵ Nəng nyang a dʊbe gʊsətə tə kʊniyʊ. A jiya nyangngi ka samən Nuhu wʊ wari yəm bə nyammi, tən nəb nyibi, a jii ya be ri hi wirriyʊ a gʊsətə tə yəmbə Niyajiyʊwi. ⁶ Kə Niyajiyʊ a tung bəttətta Sadoma na Gomratai rə kərang na hanjim a yullo bʊgəmmi, wʊ ba chi məssarang a ji wʊ ba nəngnga bwi rə bə me bə yəm Niyajiyʊwʊm. ⁷ Mənni ni nyai Lutu, wʊ fʊriya swimənni bərə yobi bwira wa nəbbə me bə fʊng soriyəm, Nigra ka jəg hangʊ. ⁸ Ni nya waiwe wa chi chima mʊran jiyʊ rə wʊne ko ki wa fur də yuumlluwʊn, bərə jiya chu na nwiyʊ. ⁹ Bərarə nyang Niyajiyʊ ka yəm nyəngke ba jəg nəbbə nyam gra bɨngorangəng, na bo nyəngke ba tau nəbbə rə bʊnai ya yəm bə nyaməmi a ko duuti. ¹⁰ Nəng nyang bo yəm bə nyam a ba jau kak təm swiyer da bwiyən na yɨgtən sʊ a bə nəngnga duutəm. Ka rə duttəttə nəggəngni nəngnga jɨni churə sərri. Me bə nwi tata sʊtangnga bwantəttə bwirai ya weni təmriyʊ. ¹¹ Nən kwini, weni təmmri karə kʊmni rə grate, a li hanjim ki, me bərə wʊrə a letang ka jiyəngngi a kak ka Nigrang. ¹² Mənni yai namtəyi me rə kəmmarangngi, nəngnga mo tau na bwang bwigi. Bən nəngnga jəllən da jiya yəmbə ba bətəro. ¹³ Ba nya jangemi ya swiyer də bwiran da jiyəni. Hamjim kəmmari go nwitang a ləmmang ka nəngngatangnga jɨni rə kʊnni rə ko gon nwitangnga ləmmangngi. Hanjim jɨnna kiyakiyaiyʊ rə nemər. Bən nwi ləmmang ka swiyer da jyɨn da jʊllaiyən, a fʊlla tə jari jɨni jauri kinni. ¹⁴ Kari kəmta jəllən də fari nyʊiyəm bən talbəm; me bə rire rə nəngngtang a jɨni bwirai. Nomən dʊr a bə si bə rə kʊmni a mʊra yobi nyammi, yɨgira switəttə bwirai, na bo ti furnan jiyʊ a kʊlmotang. Hanjim bətəm bə nəngngatəng nyim. ¹⁵ Ka dʊ fʊngtang a jʊwiya yəm bə nyammi. Ka nyagel a fʊng jiwʊyəng Bala'amʊ, yəllang Beori rə wa yotən da nyatangkə me jʊwi nyangngi. ¹⁶ Mənni kən kwertəng yəm bərarə jɨni bwirai yangʊ. Koro wʊ me bə sʊrə yəmi ka kwertən yəmma jɨni tallna ni yʊwe yəmmi rə jiir da ni tən kʊnniyəng. ¹⁷ Bambe nəb a jɨrgotən kəmta hiyʊ yə me hi wi. Nyəra korte tə səmba kari. Yuumllu deniyʊ ka yamrə hanjimi. ¹⁸ Bə sʊ yəm nən dʊttəttə nəggəngni. Bən nomən dutta nəb rə jəllən da bwiyən. Bə Jʊlla nəbbə fari go tə mwamənna yobi bwiram. ¹⁹ Nəngngatən yəm bʊrəm ba chimba dʊrəm, mənni hanjim jiiri butəji keweta jɨni bwiraiyʊ. Bəraki ni n'kewe jiya li kʊmnitangʊwi. ²⁰ Warigʊ wa mwamənna kiyatang a gʊsətəng a gwa yəmtang ka Nigra na Ni Jəgri Yesʊ Kristiyʊ, na bo kaubwi a mʊra a kiyatangngi, yobiyajiyʊ wa mwatanti ba nəngnga bwiragʊ a li kə ri jigʊwʊng. ²¹ Kənna litən a yəmbə jʊwi nya, ka yəm na wʊlgamən bwi a yobi Yʊlgoi wʊ ne hanjim rə jigʊwi. ²² Bam yəmbə dəgrəm be ka chi bə nyam a dʊttətan jiyʊ: "Jwai ka kauwe bwi jəlma mʊngaitangʊ. N'gərri wʊ waitən hiyʊ ka kaubwi a mʊra bwi.