¹ Siman Bitrus, kewe na ni təmri ya Yesʊ Kristiyʊ, yɨgira ba yʊ yəm bə nyaməm bərə gratə dəniyəm nyəra kənnəng yʊ gərəng, yəm bə nyam a mʊra nyagʊ wa Niyajiyʊ wa nənnʊ na Ni Jəgri Yesʊ Kristiyʊ. ² Masi nətttə nən dautən bəwi na chimbə ləmmangngəm a yɨgtən bwi a mʊra yəmtang ka Niyajiyʊwʊng na Yesʊ Nigra nənnʊ. ³ Ka nəbbən jɨni warigʊ a mʊra kʊmni ta gʊ rə yobi ya nəbbən bərə yəmtang a Niyajiyʊwi, wa bənne gən a mʊra a gratəttang gʊ rə nyagʊwi. ⁴ A mʊra nyangngi, ka nəbbən yəm bʊrəm bə kʊntam bə nyam, a nəngnga nyang nyəngke go nati chi bərə sʊ a mʊra Niyajiyʊtang gʊ, a jii jəggənna mʊra kiyatang kə ka mʊra gʊsətəng bəri jəllən də bwiran dəndangən. ⁵ Bərarə wai jiwe, nəngnga rə dəmantang ka mung, yəgtən nyagʊwi a nəbbəntang ka yəm bə nyam ba mumən, na a mura yəmtang. ⁶ a mura yəmtang ka mung, yəgtən tautangnga dur, tən yəmtang a Niyajiyʊ. ⁷ A yəmtang a Niyajiyʊ, yotangnga daa chətte, a gwa yotangn a daa chətti yəgtən yodai. ⁸ Jɨni yaiye ka mʊra jɨni ki, na bo ka gra a mʊra jɨni ki, me bən nya bəlmi tən bʊnai a bəttəbəyʊ a mʊra yəmtang a Nigra nənnʊ Yesʊ Kristiyʊ. ⁹ Mənni wa bʊnna yai jɨni yaiye, bə jəgga jɨni rə doi bwigi; ka dʊ. Ka tamən go kən təgʊmən jɨni bwirai yangʊ yə funi. ¹⁰ Bərə nyang, chətte, tə dəg dʊr tə tərsatang tə yəm buwʊng tən saurang ka jɨnnəng. Tə nəngnga jɨni yaiye ki, me bətə təlna. ¹¹ A nyangngi bətə nya dɨgitang a mʊra dʊʊtəttə kʊrəkangəngi ta Nigra nənnʊ na Ni Jəgri Yesʊ Kristiyʊ. ¹² Bərarə nyang kən kʊra bwi jʊtəkwang n'kəmma gəmmən jɨni yaiye, nən kwini kəttə yəm jɨni hi, bo kəttə nəngnga kʊmni a mʊra yəm bə nyam kʊ. ¹³ Mən kəmma mo nən nyagʊ n'swi gən rə kəmmarang ka jɨni yaiyəng a jii mən ka mʊra bwiyʊ. ¹⁴ Bəraki kən yəm a dʊ nən bani ki bən dʊ bwiyaiye, nyəra kən Ni gra Yesʊ Kristi a nʊngngi gərəng. ¹⁵ Bən dəg dʊr a tərsatang jʊtəkwang mo nati kəmmare jɨni yaiye a bukkən diyəng. ¹⁶ Bəraki nən fʊng bə yəmna nyati nʊng dəlna mʊriyʊ, yə nən sʊgəmməni rə kʊmni a nʊngtang ka Nigra nənnʊ Yesʊ Kristiyəng. Mənni nən bʊ buk a ji nən chu a kʊmnita gʊwi. ¹⁷ Bəraki ka yʊ wertang tən grate a gwan Niyajiyʊ Te, a fʊlla jɨre wa gwa wʊri gratə warigʊwi sʊwe re go, "Waiwe gən yəlla miyʊ, wa yodai ya miyʊ, wʊ mən nwi ləmmang ka gəng deniyʊ. ¹⁸ Kə nən nwi jiir da diye wa jiyən, a jii wʊ nən ka kin a bangkə yʊlgonni. ¹⁹ Ka nənni nə dan bwan də yʊwerəm də kən bʊtən kʊrən nyagʊwʊng, kətə nəngnga nyagʊ nyəng kəttə kaubwi rə kəmmarang ka jɨnəng a jiyəng. Nən nyang nyəra rə gʊngor da kərang kəlbara a mʊra kʊmmi ki mənni təm silanəm ka beng, na bo beswangngi a təm silanəmmi a gʊn a mʊra furna jɨnnʊ. ²⁰ Tə yəm kangkə rə jigʊ to me yəm yʊwerəm, bən jəgara a jiya kəmmarang ka niyəng. ²¹ Bəraki me yəm yʊwerəm ba be mʊwe a kəmmarang ka niyəng. A jiya nyəngngi, We Yʊlgoi gə swirəng hanjim go sʊ yəm ba Niyajiyʊwʊm.