¹ Mən yəgtən yəmma tabə bə ka mʊra jɨniyəm. Me mən chiya jɨnnʊ ta. Wa bu bukka kʊnang ka Kristiyəng, na bo mən ka mʊra bə ba yʊ gratetə bən nʊngngai. Bərarə nyang, kəmmən yɨggəmən, ² tabe, te to kʊlən da Niyajiyʊwʊn də tə ka kiyənnəng. Tə jəgga hanjim, me bərra kwakgi, mənni bəraki kəttə fau nyang, bərarə kəmmarang ka Niyajiyʊwʊng. Tə jəgga hanjim, me bəra nyatangnga chəmmər dərə kʊnnən, mənni rə ngatang ka fʊriyəng. ³ Kari bətə chi nyəra bəksər a ji a nəbbə tə torəm. A ji ya nyangngi tə chi ya məssarangngi a kʊlmorhən. ⁴ A jii wʊn nʊng nidʊ a yartiyʊ, bətə yʊ kʊrmʊng ka gratəng kə me bə jɨrmənəng. ⁵ A jiya nyangngi, jɨn bweləm, tə ne grate tabe. Waringəm ba jɨnnəm tə bʊ bwi rə səgtang a dʊr, tə nəngnga swiyer a bwite, bəraki Niyajiyʊ bən nəngnga kak rə nəbbə gug dʊttem, mənni ne nəttən dautən bəwi a bə səg dʊttəm. ⁶ Bərarə nyang tə səg dʊtta jɨnʊ a kang ka Niyajiyʊ wʊri kʊmni warigʊwi na ba gug gən a fʊlla dautən wi. ⁷ Tə bʊttən jɨni dagənna furna jɨnnʊwi warigʊ a hangʊwi, bəraki ka to gənne. ⁸ Tə chi rə tautang ka dʊrəng, na tə chi rə jəgatang kə nyang, chugo kakga jɨnnu, ni bwira, nyəra rə turəm gərori, yogori, fari wʊ ba jauwi. ⁹ Tə nəngnga kak nəngge. Tə si rə kʊmni a mʊra nəbbəntangnga yəm bə nyam ba jɨnnəm. Tə yəm to kagəm ba jɨnəm ba nəbbən yəmbə nyaməm ba ka mʊra gʊsətəm ka bi fʊri rə kang kʊnang kəttə norəng. ¹⁰ A buk kəttə no kʊnangnga jii baniyəng, Niyajiyʊ wa nəttətən dautənbuwi warigʊwi, wa bəgənne wa gwa gratəttə kʊrəkwangngi a mʊra Kristiyuum, ba mwarmən a dəggəng na bo yəgngimən kʊmni. ¹¹ A gwan giyʊ dʊʊte a chi kʊrəkwang. Amin. ¹² Kɨng nga nən Silvanus chi nya wʊri yəm bə nyammi, bo kən mʊla gəmən banigʊ a gwan giyʊ. Kəmən yəgəmən yəm, bo kə mən sʊgəmənne mo ji mʊlai bə nyam nettətta dautən bəwi ta Niyajiyʊwi. Tə siya mʊrri. ¹³ Nyʊi wʊ ka mʊra Babilai sagəmən kini kə səgənne. Na Markʊs, yəlla miyʊ kə səgənne. ¹⁴ Tə sʊ bwite rə kʊmtangnga bwiya yodai. Masi datang ka fʊriyəng a chi nən jɨn waringəm bətə ka mʊra Kristiyəm.