¹ Maka, mansuklah Yesus wan melewati kute Yerikho. ² Di soan ade seurang lelaki bedame Zakheus, nye'e adelah kepale pengumpul pajak wan seurang an kaye. ³ Nye'e beusehe meliat Yesus, kaliagak cade dapat kerene tehalang urang banyak; sobab tubuhnye pandak. ⁴ Jadi, Zakheus bekojot melohok'i urang banyak wan menoyek sebatang kayu are engkai meliat Yesus kerene Nye'e bakal melolui jalan onan. ⁵ Ketike Yesus sampai di tompat Zakheus berade, Nye'e menengadah wan betutur ke nye'e, "Zakheus, ocaklah turun kerene hari inen Doan harus menumpang di rumahmu." ⁶ Make, Zakheus bai segere turun wan menerime Yesus juan besukecite. ⁷ Namun, ketike semue urang meliat hal onan, sidak mulai menggerutu wan betutur," Nye'e menjadi tamu di rumah seurang an beduse," ⁸ Kemudian, Zakheus bediri wan betutur ke Duate, 'Duate, liatlah separuh tanggai hartedan bakal deonjok ke urang miskin, wan jike doan tolah menggolapan harte seseurang, doan bakal memulangannye 4 kali lipat.'' ⁹ Make, Yesus betutur ke Zakheus, ''Pade hari inen, keselomatan tolah datang ke atas rumah oyen kerene urang inen bai anak Abraham. ¹⁰ Sobab, anak mendesie datang engkai meontot wan menyelomatan yang hilang.'' ¹¹ Sementare sidak mendongaian semue inen, Yesus melanjutan juan menceritean sebuah perumpamaan kerene nye'e sudah hamping juan Yesaem wan kerene sidak menyangke bahwe kerajaan Allahbakal segere datang. ¹² oleh kerene onan, Nye'e bai betutur,'' seurang bangsawan pogi ke negeri an jowoh engkai di angkat menjadi raje, wan sesudah onan nye'e bakal pulang. ¹³ Kemudian, tuan onan mengumpulan sepuluh urang pelayannye wan meenji'i sidak duit sebosar 10 mina. Katenye ke sidak, 'Bedaganglah menggunean duit inen sampai doan pulang.' ¹⁴ Kaliagak, urang-urang sebangsenye memboncik nye'e wan mengiriman perwakilan selopas nye'e betulak engkai betutur, 'Urang koai cade hondak urang inen menjadi raje atas urang koai.' ¹⁵ selopas diangkat menjadi raje, bangsawan onan pulang wan memerintahan hambe-hambe an tolah dienji'inye duit onan di talau menghadapnye supaye nye'e dapat mengetohui beyepe bosar keuntungan an sidak d apatan tanggai bedagang. ¹⁶ Pelayan an pertame datang wan betutur, 'Tuan, duit 1 mina milikmu onan tolah mehasilan 10 mina udi.' ¹⁷ Raje onan betutur ke nye'e, 'Bagas sekali, hai kolai hambe an boyek! Kerene kolai setie dalam urusan an kocit, kolai bakal memerintah atas sepuloh kute.' ¹⁸ Pelayan an kedue bai datang wan betutur, 'Tuan duit 1 mina milikmu onan tolah mehasilan 5 mina.' ¹⁹ Lalu, sang raje betutur ke hambe onan, 'Berkuaselah kolai atas 5 kute.' ²⁰ Kemudian, menjuhaklah hambe an seikok lagek wan betutur, 'Tuan, inen uang 1 mina milikmu an doan toyohan dalam sapu tangan. ²¹ Doan golak ke koam sobab koam urang an koras. Koam meutik ape an cade peronah koam toyohan wan memanen ape an cade peronah koam tanam.' ²² Kemudian, raje onan betutur kenye'e, 'Doan bakal meadilimu sesuai juan peromomganmu, hai kolai hambe an johat! Jadi, kolai tohu bahwe doan adelah urang an koras, an meutik ape an cade peronah detoyohan wan memanen ape an cade doan tanam? ²³ Kalau beonan, meape kolai cade menoyoh duitdan ditompat urang menjolanan duit sehingge ketike doan pulang, doan bakal menerime duitdan onan beserete juan bungenye?' ²⁴ Lalu, raje onan betutur ke urang-urang an bediri di soan, 'Utik mina onan tanggai nye'e wan onjok ke urang an mempunyei 10 mina.' ²⁵ Namun, sidak betutur ke sang raje, 'Tuan, hambe onan sudah mempunyei 10 mina.' ²⁶ Jawab raje onan, 'Doan betutur ke kolai, setiap urang an mempunyei bakal dienji'i lobih, kaliagak tanggai urang an cade mempunyei ape bai, semue an dimilikinye bakal diutek. ²⁷ Kaliagak, tontang musuh-musuhdan an cade menginginan doan menjadi raje atas sidak, umbailah sidak ke seen wan bunuhlah sidak dihadapandan.'' ²⁸ Selopas Yesus mengatean hal-hal onan, Nye'e bejalan lobih lohok menuju Yerusalem ²⁹ Ketike Nye'e menjuhak di hamping desa Betfage wan Betania, hamping bukit bedame Bukit Zaitun, Nye'e meutus due urang murid-Nye. ³⁰ Kate-Nye ke sidak, ''Pogilah ke desa an ade di dopanmu onan. Wan, ketike kolai mansuk ke soon, kolai bakal meliat seikok anak keledai an terikat wan olom peronah dinoyik'i urang. Lopasanlah anak keledai onan wan umbailah ke seen. ³¹ Jike ade urang betanyak ke kolai, 'Meape kolai meumbai Keledai onan?', kateanlah beoyen: Duate memerluannye." ³² Lalu, pogilah kedue murid an diutus-Nye onan wan menomuan segale sesuatunye topat macam an tolah dikatean-Nye ke sidak. ³³ Selagik sidak melopasan anak keledai onan, pemiliknye betanyak ke sidak, ''meape kolai melopasan anak keledai onan?" ³⁴ Sidak bai menjawab, "Duate memerluannye." ³⁵ Lalu, sidak meumbai anak keledai onan ke Yesus wan melotakan pakaiannye di atas punggung keledai onan, kemudian menoyek'an Yesus ke atasnye. ³⁶ Ketike Yesus melelui jalanan, urang-urang membontangan pakaian sidak di jalan. ³⁷ Wan, ketike Yesus sudah semakin hamping Yerusdalem, yaitu di jalan an menurun tanggai arah bukit Zaitun, semue pengikut-Nye mulai memuji Allah juan besukecite wan suare an nyaring. Sidak besyukur ke Allah atas semue mujizat an tolah sidak liat. ³⁸ Sidak berseru, "Diberokatilah Nye'e an datang sebagai Raje dalam name Duate, damai sejahtera diseruge waan kemuliaan di tompat an mahe tinggi!" ³⁹ Bebeyepe urang Farisi tanggai kerumunan urang banyak onan betutur ke Yesus, "Guru, togorlah murid-murid-Mu." ⁴⁰ Kaliagak, Yesus menjawab, "Aku betutur ke kolai, jike sidak diam, batu-batu inenlah an bakal beseru-seru." ⁴¹ Wayah Yesus udah di hamping kute Yerusalem wan meliat kute onan, Nye'e bai menangisinye. ⁴² Kata-Nye, ''Seandainye hari inen kolai tohu ape an mendatangan damai sejahtera atasmu. Kaliagak, sekarang hal onan betapok tanggai matemu. ⁴³ Sobab bakal datang wayahnye ketike musuh-musuhmu bakal membangun teombok penghalang di sekelilingmu wan mengopongmu tanggai semue arah. ⁴⁴ Sidak bakal meruntuhanmu, kayen beserete anak-anakmu an belindung pade tembokmu. Wan, sidak cade bakal menyisaan sebutik batu bai tesusun di atas batu an lain di dalammu sobab kayen cade mengonali waktu ketike Allah melawatmu." ⁴⁵ Kemudian, Yesus mansuk ke Bait Allah wan mulai meusir keluar urang-urang an bejualan di soon. ⁴⁶ Kate-Nye ke sidak, ''Ade tertulis: 'Rumah-Ku bakal menjadi rumah doa, 'kaliagak kayen tolah menjadiannye sebagai sayang perampok!" ⁴⁷ Lalu, Yesus mengajar di Bait Allaah setiap ari. Namun, imam-imam kepale, ahli-ahli Taurat, wan padangan pemimpin bangse onan meontot care engkai membunuh-Nye. ⁴⁸ Kaliagak, sidak cade tohu macam ape melakuannye sobab semue urang memogang toguh perkatean Yesus.