¹ Yesus bekate ke murde-mured-Nye, "Ade seurang kaye an ade kepale pelayan. Wan, ke urang kaye onan dilaporan bahwe kepale pelayannye dah memborosan hartenye. ² Kerne onan, urang kaye onan menalau kepale pelayannye wan bekate, 'Ape an doan dongai tetntang kolai inen? Enjii am pertanggungjawaban atas tuga kolai kerne kolai cade dapat lagek menjadi bendehare doan.' ³ Kepale pelayan onan bai bepiker, 'Ape an bakal doan kerejean kerne inen tuan doan dah memocat doan nggai pekerejean doan? Doan cade cukop kuat ngkai mencangkol wan malu ngkai mengomes. ⁴ Doan tohu ape an haros doan ulah ngkai ketike doan dipocat sebagai bendehare, urang-urang bakal menerime doan di rumah sidak.' ⁵ Sekali tai, nyee bai menalau setiap urang an behutang ke tuannye. Ke urang pertame nyee bekate, 'Beyepe utang kolai ke tuan doan?' ⁶ Urang onan menjawab, 'Seratus bat minyak zaitun.' Lalu, kepale pelayan onan bekate ke nyee 'Utek am surat utang kolai, ocak am dudok wan tulesa am 50 bat.' ⁷ Kemudian kepale pelayan onan betanyak kevurang layen, 'Beyepe banyak utang kolai?' Urang onan menjawabnye, 'Seratus kor gandum.' Lalu bendehare bekate ke nyee, 'Utek am surat utang kolai wan tules am bahwe utang kolai 80 sohan.' ⁸ Kemudian, urang kaye onan memuji kepale pelayan an cade jujor onan kerne nyee betindak juan cerodek. Sobab, anak-anak dunie inen lobeh cerodek dalam beurusan juan sesamenye daripade anak-anak torang. ⁹ Doan bekate ke kolai, ulah am persehebotan juan mamon an cade bonar ngkai ketike mamon onan habes, kolai bakal disambut di rumah abadi. ¹⁰ Sape bai an setie dalam hal-hal an kocet, nyee bai setie dalam hal-hal an bosar. Wan, sape bai an cade jujor dalam hal-hal an kocet, nyee bai cade jujor dalam hal-hal an bosar. ¹¹ Jadi, jike kolai cade dapat dipercaye ngkai mengelola harte duniewi, sape an bakal mempercayean harte an sesunggohnye ke kolai? ¹² Wan, jike kolai cade dapat dipercaye dalam menggunean milek urang layen, sape an bakal meenjii ape seharosnye menjadi milek kolai? ¹³ Mulan pelayan an dapat melayoni due majikan kerne nyee bakal memboncek majikan an seikok wan menyukei majikan an layen. Atau, nyee bakal patoh ke majikan an seikok wan meaboian an layennye. Kolai cade dapat melayoni Allah wan mamon." ¹⁴ Urang-urang Farisi, an adelah pencinte duet, mendongai hal inen wan meejek Yesus. ¹⁵ Yesus bekate ke sidak, "Kolai adelah urang-urang an membonaran di'i kolai seurang di hadopan mendesie, tetapi Allah tohu isek hati kolai an sebenornye kerne an di agung-agungan di antare mendesie adelah sesuatu an menjijikan di hadopan Allah. ¹⁶ Hukom Taurat wan kitab pedangan nabi diajoran sampai mase Yohanes, kabar boyek tentang Kerejan Allah dah diberitean wan semue urang memakse ngkai mansok ke dalamnye. ¹⁷ Namun sesnggohnye, lobeh mudah bagi langet wan bumi ngkai lonyap dari pade sebutek titek dalam hukum Taurat dibatolan. ¹⁸ "Setiap urang an mencoraian bininye wan mengawini betine layen, nyee bebuat zina. Wan, urang an mengawini betine an diceroian lakinye, bai beulah zina. ¹⁹ "Ade seurang kaye an selalu bepakoian ungu wan kayen linen, wan besonang-sonang setiap ari dalam kemewahan. ²⁰ Di lawang gerobang rumah urang kaye nontai, melelangkai am seurang miskin bedame Lazarus, an bukangnye ponoh juan borok. ²¹ Nyee beharap di enjii makan ape bai an garak nggai meje makan urang kaye nontai: bahkan kudok-kudok datang menjilati boroknye. ²² Suatu ketike, urang miskin nontai mati wan diumbai leh pedangan malaikat ke pangkuan Abraham. Urang kaye nontai bai mati lalu dipasar. ²³ Di alam maut, wayah disikse, urang kaye nontai meliat ke pucuk wan meliat Abraham di kejewuhan besame Lazarus di pangkuannye. ²⁵ Akan tetapi, Abraham bekate, 'Nak ingat am ketike kolai gek hidop, kolai dah menerime hal-hal an boyek, sementare Lazarus menerime hal-hal an burok: ninam, di seen Lazarus dihibor, sementare kolai disokse. ²⁶ Selayen onan semue, ade jurang bosar an memisahan kite sehingge urang an hondak menyeborang nggai seen ke tompat kolai cade dapat menyeborang, wan urang an nggai tompat kolai cade dapat menyeborang ke tompat urang koai.' ²⁷ Lalu, urang kaye nontai bekate, 'Man beonan, doan mohon ke kolai Apang, utus am Lazarus ke rumah apang doan, ²⁸ Kerne doan mempunyai lime dulor lelaki. Mbak am Lazarus memperingatan sidak ngkai nantek sidak cade mansok ke tompat penyiksean inen.' ²⁹ Namun, Abraham bekate, 'Sidak ade Hukom Musa wan kitab pedangan nabi, mbak am sidak mengetohui nggai semuenye onan.' ³⁰ Kate urang kaye onan lagek, 'Cade, Apang Abraham. jike seseurang nggai antare urang mati datang ke sidak barok am sidak bakal betobat.' ³¹ Jawab Abraham ke uranf kaye onan, 'Jike pededuloran kolai cade mendongaian Hukom Musa wan kitab pedangan nabi, sidak cade bakal dapat diyakenan, bahkan leh seseurang an bangket nggai antare uranf mati."'