¹ Cek e aku iyakng bebas? Cek e aku tuk Murid? Cek e aku udah nongan Yesus, Tuhatn kite? Cek e ikau adelah asil pakarojaan ku dalapm Tuhatn? ² Man bagi iyakng laitn aku bukatn murid, palikng cadak aku adelah murid bagi kau. Sak, ikau adelah meterai murid ku dalapm Tuhatn. ³ Ituklah pembelaanku terhadap bale insie ye akan merikse aku. ⁴ Opaikah kami cak ade hak makai makatn ngan minum? ⁵ OPaikah kami cak ade hak makai maik serta bini ye seiman, same macapm murid- murid ye laitn, bale menak an Tuhatn, ngan Kefas? ⁶ Atau, Opaikah hanye Bernabas ngan aku ye cak ade hak makai cak bekeroje? ⁷ Sopaikah ye kolak mengabdi jadi tentara jongan biaya e soyakng? Sopaikah ye menanamik kobutn anggur ngan cak makatn buah e? Atau, sopaikah ye menggembalakan ternak ngan cak minum susu e? ⁸ Opaikah aku mengatekan hal- hal inyak menurut insie? bukatnkah ukupm Taurat pan mengatekan hal- hal ye same? ⁹ Sak, ade tetulis dalapm ukupm Taurat Musa,"Inanglah ikau memberangus lembu ye agik mengirik ganupm!" OPaikah lembu ye agik Allah perhatikan? ¹⁰ Atau, opaikah iye mengatekan ne demi kite? Auk, demi kitelah hal inyak dak tulis karne ye membajak arus membajak dalapm pengarapan ngan ye mengirik arus mengirik dalapm hal pengarapan makai dapat bagian ne. ¹¹ Man kami menabur benih rohani dak antare ikau, opaikah kelobihin kalau kami pan menuai hal- hal materi dari ikau? ¹² Man iyakng laitn ade hak inyak atas ikau, ce e kami lobih berhak agik? Walau pan macapm inyak, kami cak ngunekan hak inyak. sebaik e, kami menanguk segale sesuatu makai kami cak munyuk suatu halakngan bagi Injil Kristus. ¹³ Opaikah ikau cak panai bahwa bale insie ye ngerojekan hal- hal ye kudus inyak, makatn pemakatnan Bait Allah jam? Ngan bale insie ye melayatnik dak altar dapat bagian dari kurban persembhan inyak? ¹⁴ Modal inyak pan, Tuhatn nyuruh bale insie ye menceritekan Injil makai idup dari Injil jam. ¹⁵ Tapi, aku cak kolak memakai sutik pan dari hak- hak inyak. Ngan aku cak menuliskan hal- hal inyak makai dak lakukan macapm inyak ka aku. Sak, lobih baik aku mati daripade insie meniadakan kebanggaanku. ¹⁶ Karne, man aku menceritekan Injil, aku cak ade alasan makai bermegah karne kewajiban inyak ade pucukku. celakelah aku, man aku, cak menceritekan Injil. ¹⁷ Kalau aku menceritekan Injil karne kehendakku soyakng, aku ade upah. Tapi, kalau inyak bukatn kehendakku, inyak adelah tugas ye dak pecayakan ka aku. ¹⁸ Kalau macapm inyak, opaikah upahku? Upahku adelah waktu aku menceritekan Injil, aku dapat menceritekan Injil tanpa upah ngan cak menyalahgunekan hakku dalapm Injil. ¹⁹ Tapi, walaupan aku bebas pucuk semue iyakng, aku jadikan dirik aku soyakng hamba bagi semue iyakng makai aku boleh memonangkan lobih banyak agik. ²⁰ bagi iyakng Yahudi, aku jadi macapm iyakng Yahudi makai aku dapat memonangkan iyakng Yahudi. bagi iyakng dak bobah Ukupm Taurat, aku jadi macapm iyakng ye idup dak bobah Ukupm Taurat (walaupan aku soyakng cak dak bobah Ukupm Taurat) makai dapat aku memonangkan bale insie ye ade dak bobah Ukupm Taurat. ²¹ Bagi insie ye tanpa Ukupm Taurat, aku macapm tanpa Ukupm Taurat (bukatne tanpa ukupm Allah, tapi dak bobah ukupm Kristus) makai aku dapat memonangkan bale insie ye tanpa Ukupm Taurat. ²² Bagi iyakng ye lomah, aku jadi lomah makai aku dapat memonangkan bale insie ye lomah. Aku udah jadi segale sesuatu bagi semue iyakng makai ngan segale care aku dapat menyelamatkan beberopai insie. ²³ Aku melakukan semue inyak demi Injil makai dapat bagian dak dalapm me. ²⁴ Cadak panaikah ikau bahwa bale insie ye belari dalapm suatu pertandingan semue e belari, tapi hanye sikukng ye nerimak hadiah? Jadi, belarilah secopat e makai ikau menapat e! ²⁵ setiap iyakng ye betanikng belatih menguasa ik diri dalapm segale hal. bale insie melakukan ne makai nerimak mahkota ye fana, tapi kite makai mendapatkan abadi. ²⁶ Sak inyak, aku cak belari macapm inyak tanpa tujuan. Aku cak ninyu macapm iyakng ye ninyu angin. ²⁷ Tapi, aku melatih bukakng ku ngan koras ngan menguase ik makai udah aku menceritekan Injil ka iyakng laitn, aku soyakng cak dak tolak.