¹ Memang dah dak laporkan bahwa ade perzinaan dak antare ikau, perzinaan ye bahkan cak ade dak antare bangsa- bangsa laitn, ye inyak ade iyakng ngamik ik bini apakng e. ² Ngan ikau somukng! cak seharus e ikau justru beduka makai iyakng ye melakukan perbuatan inyak dak singkirkan dari dak antare ikau? ³ Memang, secare jasmani aku jauh, tapi aku ade dalapm roh. Ngan aku dah nyatuk ik ukupm man atas iyakng ye melakukan hal inyak, seolah- olah aku ade. ⁴ Dalapm name Tuhatn Yesus, ngan aku besame ikau dalapm roh ngan kuase Tuhatn kite, Yesus, ⁵ aku dah memutuskan makai menyerahkan iyakng inyak ka Iblis makai kebinasaan dagikng e makai roh e dapat dak salamatkan pas ari Tuhatn. ⁶ Kesomukngun kau inyak cak baik. cak panai ak pai ikau bahwa sikit ragi jak akan meragikan semue adonan? ⁷ Barosihkanlan semue ragi ye lamat makai ikau nyadi adonan baru, walau pan ikau cak beragi. Sak, Kristus, Domba Paskah kite, dah dak samoleh. ⁸ Karne inyak, ayuk kite merayakan pesta inyak, bukatn jongan ragi ye lamat, bukatn dari ragi kaburuk un ngan kajahatan, melaitnkan jongan roti cak beragi dari kemurnian ngan kabonaran. ⁹ Aku nulis ka ikau dalapm suratku: inang begaul jongan bale iyakng cabul. ¹⁰ Maksudku, bukantn jongan bale iyakng cabul dak dunie ituk, bale iyakng serakah, bale penipu, atau jongan bale penyembah berhala. Man modal inyak, ikau seharus e keluar dari dunie ituk. ¹¹ Tapi, ituk aku menuliskan ka ikau, inang begaul jongan bale iyakng ye dak sobut menak an man iye adelah iyakng cabul, serakah, penyembah berhala, pemfitnah, pemabuk, atau penipu. Lalu, inang makatn jongan iyakng modal inyak. ¹² Sak, opaikah urusan kau menghakimik bale iyakng luar? Cek e ikau menghakimik bale insie ye ade dalapm jemaat? ¹³ Tapi, Allah ye akan menghakimik bale insie dak luar jemaat. karne inyak, usirim iyakng ye melakukan kejahatan dari antare ikau.