¹ Po bwo lyashila ishiku lya sabata, kuwuche ishiku ilyakwanda pa sabata, kukisa u Maliya wa magadala, nu Maliya umunine, pakuketa ipumba. ² Popapo keta, pakaba akasenyende akakulu; pakuti uwandumi bwa Chala akika ukufuma kumwanya, nuku bungunia ibwe lila, nukwikala pamwanya pake. ³ Ukuwoneka kwake kukaba ngati kalabi, nifyakufwala fyake fikaswepa ngati nabwe gha fula. ⁴ Popapo nukoghofya kwake abomalonda bakoghopa, bakaba ngati bandu bafwe. ⁵ Lole u wandumi yula akamula akati ku bakolo bala, "Manye mwoghopaghe mwea, pakuti ishimenye umwe mukulonda u Yesu, Yuyo akakomeliwa. ⁶ Umwene atalimo muno nashiku, pakuti ashukite isa mwo akayughila. Samuno mukete mubuyo mwo akaghonamwo u malafyale. ⁷ Popapo bukagha lubilo kababushe abamanyili bake muti, ashuka ku bufwe. Popapo keta nababusha umwe. ⁸ Popapo abakolo bakatila lubilo kwi pumba, nu bwogha nu kusekelela ukukulu, nukukinda pakubabusha abamanyili bake. ⁹ UYesu akakomana nabo, nukubalamuka. Po abene bakisa nukufughamila mutulundi mwake, nukumwiputa. ¹⁰ Popapo uYesu akayugha nabo, "Manye mwoghopaghe, bukagha, kababule abakamu bangu ukuti babukaghe ku Galileya, kwotise bangete une." ¹¹ Po abakolo bakabukagha, keta, bamu abomalonda abakabukagha mukaya, nukubabula baputi abasongo shoshi fyo fikaboneka. ¹² Po abene bakakomana pamupene na baputi bakikala akabukutila nukubapa a bashikali bala indalama inyingi, ¹³ Bakababula bakati, "Mutingi ku bandu, abamanyili bake bakisa pabushiku nukumwiba umwene mwo utwe tuli mtulo." ¹⁴ Pakuti pala ichi chamanyikwa kwa mulindilila Ichisu, utwe tise tumwishe indumbula, po umwe tese mube ninogwa. ¹⁵ Popapo abene bakapokela indalama shila, nuku bomba ngati isa mwo bakababula: popapo ilishu likafymukwa mu yuda nukubukikila mpaka nu musughu. ¹⁶ lole abamanyili leveni (11) bakabuka ku Galileya, kwighamba kuko U Yesu akabalaghila abene. ¹⁷ Bwo bakuketa umwene, bakamwiputa umwene, lole bamu bakilamwagha. ¹⁸ Po u Yesu akisa nukuyugha nabo, amaka ghoshi ghapeghiwe kukwangu kumwanya na pachisu cha pase. ¹⁹ po mubukaghe muye mupele abamanyili abandu abafikolo fyoshi, nukubosha mungamu ya Tata, niya mwana, niya mbepo mwikemo. ²⁰ Muye mubamanyishaghe ukukonga shoshi sho mbabulite umwe; keta, une Indi numwe bwila, umupaka nakubumalilo bwa chisu.