¹ Mwo apapiwemwo u Yesu mukaya ka Betelehemu mu chisu cha Yudeya, mumashiku ghamalafyale u Herodi, popo bakaboneka mu Yelusalemu babo bakafumila kubufumilo Bea lisuba, bakati, ² "Alikughu u Malafyale wa ba Yuda yo apapiwa lulu? pakuti tulubweni ulutondwa lwake kubufumilo bwa lisuba, twisa ukuti twilambe kukwake." ³ Umwene u malafyale u Herodi akati apulika shishishi, shikamunyomosha, bope nabamukaya ka Yelusalemu bakanyomokela pamupene nawe. ⁴ Lole bwo ababunganieshe abaputi abosongo, nabamanya ndaghilo aba bandu, akabalalusha akati, "Ngimba kokoki ko tise apapiwe u Kilisitu?" ⁵ abene bakamubusha bakati, "Mwo mukaya ka Beteleheghemu muchisu cha Yudeya, isa mwo fikalembeliwa nu musololi ukuti: ⁶ 'Nuwe we kaya ka Betelehemu mu chisu cha Yuda, ungatingi we munandi mubalaghili, muchisu cha Yuda; keta mwako tise afumemwo umulaghili, yo tise abalongoshange abandu bangu aba mu Israeli."' ⁷ Po u Helodi akabitisha kulubafu abamanya ndondwa, akabatepagha pakabalilo kako lwabonekile ulu tondwa. ⁸ Akabatuma mukaya ka Betelehemu akati, "Bukagha muye mumulondole umwana; pala mwamwagha , mwise mu mbule, ukuti nune nise mbuke imulambile." ⁹ Abene mwo bapulika amashu gha Malafyale, bakabuka, bakalwagha ulutondwa lwo bakalubona kubufumilo bwa lisuba, lwabatangilile mundashi mwabo nukwima pamwanya pabuyo papo alipo u mwana. ¹⁰ Lole bakati ba lubona ulutondwa, bakaba nulusekelo ulukulu ngani. ¹¹ Bakingila munyumba, nukumuketa u Maliya umayi wake. Po bakisa bamufughamila pase, nukumulambila, abene mwo basatwile ifyima fyabo, bakamupa ifyabupe, ifya Golide, Lubani nu Mila. ¹² Mwobasokiwe mufilota ukuti manye munyokeleko sona kwa Herodi, bakenda isila iyingi ukunyokela kwabo. ¹³ Lole mwo babukite uwandumi wa Chala akamubonekela u Yosefe mufilota akati, "Nyatukagha, umweghe umwana nu ng' ina, ukindile mukaya ka Igiputi, uye wikale kuko mphaka Po tinise ngubulile; pakuti u Herodi akumulonda umwana ukuti amughoghe." ¹⁴ Po u Yosefe akamwegha ung'ina pa bushiku akabuka mukaya ka Igiputi . ¹⁵ Ikikala kuko mphaka pakabalilo kako u Herodi akafwilagha; ukuti mwo shimalile shisho u Chala akayugha nu musololi Po akati; "Ngamwitisha umwana wangu mukaya ka Igiputi." ¹⁶ Umwene u Herodi akati ashimbuliwa nabamanya ndondwa, akakalala ngani; akabatuma aba silikali bake ukuti Baye baghoghe abana aba lisha aba mukaya ka Betelehemu naba mumbafu shoshi, ukufuma pabafyinja fibili ukufika pa bafyele, ukufwana nakabalilo kako apulikile kubamanya ndondwa. ¹⁷ Shikisa shisho akayugha u msololi u Yeremiya po akati, ¹⁸ "Amashu ghapulikikwa mukaya ka Rama, nu muywegho umushisha nukwililisha ukukulu, U Rakelo mwo akulilila abana bake, akakana nusumbishiwa, papo abana bake ba fwire." ¹⁹ Lole mwo afwile u Herodi, Po awandumi wa Chala akamubonekela u Yosefe mufilotamukaya ka Igiputi; ²⁰ akati, "Nyatukagha umweghe umwana nu ng'ina, ubuke mukaya ka Israeli, pakuti bafwile babo balondagha ubwumi bwa mwana." ²¹ Umwene u Yosefe akanyatuka akamwegha u mwana nu ng'ina, bakabuka mukaya ka Israeli. ²² Lole mwo apulika ukuti Alikilau weyo ukulaghila mukaya ka Yudaye mubuyo bwa wise u Herodi, akaghopa ukubukamwo, lole mwo asokiwe mufilota, aka buka mukaya ka Galileya. ²³ Akabuka aya asenga mukaya kako batingi Nazareti. Shisagha shisho bayughite abaghonela ukuti, tise itishiwaghe ukuba mu Nazareti.