¹ v 1 ጪኒጌን ናኒዮ፤ ናንዳካ ውርካ እስራኤል ኣርግማካ ሻን ናኒ፣ ሃይሁኔ ባሪዮዻ ካባይሽባዬ ጊያ። ² ናንዳካ ባሪዮ ጋዬ ሹቃጝ ናንዳካ እንግን ሃቻሊባ ማኒሺዬን፤ ዬ ሹቃ ኣዬን ጊዬይ ማር እን ናሹጝኬ ኦኬ እባጄኔን። ³ ሃናንዳካጝ ማሬ ጫንቃል እን ኩንኬ ሃምካ ባሪዮ እባጄኔ ናንዳካጝ ዎሼ ጫንቃል ጊዬይ ሻሜኑጝ፣ ካኒ ማቲኬን ካጫንቃልካ ባሪዮ። ⁴ ናንዳ ካጝ ኣምኒ ፓይላ ካኣዬ ጫንቃሉጝ ክርስቶስ ሃሕግካ ቱንሲ። ⁵ ሙሴ ክያጅ ጫንቃል እን ኣይኬ ታካ ሕግያጝ፣ ውር ጊታካጝ ሹዋጵሽ ጊታጙጝ ቆባ ከእንግን ሺጛ እያይ። ⁶ ዬ ጫንቃል እን ኣይኬ እምነት ሺጝ እያጝ፤ ኬሸን ኑኑ ኦይ ሃኒን ካሌፍሼ እያጝካ ፎላ ሺጜን? ይን ሃክርስቶስ ጎብሼን፤ ⁷ ወይ ኦይ ሃኒን ካጎብ ሃም ኣይ ቱሌ ሺጜን? ይንዻ ሃክርስቶስ ከኦካ ኣርሼን ቡሌን። ⁸ ኣይባዬ ሺጝ እያን? ክያጃ ኣኔን ኦካ ቆጩር ኑኑ፤ ኣኔን ኦካ ቶግ ኑኑዬ ሻኑኑ ቱዎጜ፤ ክያጃካ እምነት እን ሃሜይቴ ውርዻ ሃይዕጝ፤ ⁹ የሺጚ ኢየሱስ ሃታቺዬ የማኚሺያ ከቶግ ኑኑያጝ፣ ባሪዮዻ ቲቴኬ ኣርሼን ክያኑጝ የኣምኒያ ኬሸን ኑኑያጝ የባይሽባ። ¹⁰ ከጌዬ ጫንቃሉጝ የኣምኒኬ ሻን ኑኑዬ ጊያ፤ ከባይሼዻ የማኚሺኬ ቶግ ኑኑዬ ጊያወ። ¹¹ ወርቀት ከእያይ ሺጞጝ፣ «ካጝ ኣምኒኬ እሹጝ ፓይላ ቦኩንዽኬን። ¹² ከኦካ ጫቃንካ ኣይሁዴ ኣሕዛቤ ኣኔኬን ዋና ማቲዬን፤ ታቺ ክየም እኑጝ ሃታቺካ ፓይላዬ፤ ጊታይ ኣምኒዻ ጁዋኒቲሼ ኡዋንባ፤ ¹³ ጊታካጝ ሺው ሮጝካ ታቺ እን ፓይላ ባይሽባዬ። ¹⁴ ኣኪ ጊታይ ማር ኣምኒዬን ሻም እያን ካሺዎጝ? ማር ናንዳካ እሺ ዋዬኔ ሻም እያንካ ኣምኒዮጝ? ውር ኬናካ ሜይሼ እንግን ኣኔኬኔ ሻም እያን ካቻሊዬ ዋዬኑጝ? ¹⁵ ኤማር ይዕሲዬንያጝ ሻም እያን ካቻሊዬ ውር ሜይሼኑጝ? ይንዻ ሃኬ እያይ ሺጜ እያጜ ቶኮጝ፣ ጊታይ ቦፓይኔ ክያጃ ሹቃጝ ጃፍ ጊዬይ ኣይ እያን ሹቃ። ¹⁶ ኣይባዬ ጊታይ ዋዩጝ ፓይላ ካኒ ቦኬን ክያጃ ሹቃ እኑጝ፤ ኢሳይያስዻ ሺጛ ታቹጝ ዮ፤ ሃኒን ኣምኒ ሜርሜር ጉዋዩዬ? ¹⁷ ኣኪ ካጌዬ እምነቱጝ ሃኬ ሜርሜር እን ዋዬን፤ ሜርሜር እንዻ ሃኬ ክያጃካ ክርስቶስ። ¹⁸ ኣይባዬ ሃሺጚ ካኒ ዋይኬኒዬ? ሃኣንሼንባ፤ ዋያ ከኣኩሉክ፤ ናቅዲ ጊዬይ ከኦካ ፔን ፓይላ፣ ክያጃ ጊዬይዻ ዋያ ሌይ ሃም ፔን ዶኩዮጝ። ¹⁹ ሃኣንሼንባ ፕር እንቃ፤ ውርካ እስራኤል ካኒ ጶቅሲኬን እያጝኪ? ከሌሜን ሙሴ ሺጝ እያጝ፤ «ኦካ ጊታይ ማር ዛርሲ ኣዬን ሃቦውሲ እንግንባ፤ ኦካ ዛርሲ ጊታይ ማር ኦኬ ጶቅሲዬ ሃጎሪሲ እንግንባ» ²⁰ ኢሳይያስዻ ከሾያሞ ሺጛ፣ ሃጌዬንያ ኦካ ጊታይ ማር ኣን ዎሼኑጝ፤ ኦካ ጊታይ ማር ኣን ኣንሺኔን ሃዹዋልሼንያ ኣን ኤምኑ። ²¹ ዬ ናንዳካ እስራኤል ሺጝ፣ ሃምካ ዛርሲ ጊታይ ማር ዋይሺኔን ሃምካ ጊታይ ማር ኤኤ ሺጜን፣ ሹ ጮል ሃቲትሼያ ቡዋ ናኒ።