7

¹ ዎምባ ናናቶ፣ ኤና ዳምቢን ዼሳዳናናንቴ ዼላቅ እጌያና እጌያይ፤ ዳምቢኖ ኤዲ ካላዛራ ጌጳሞ ኮሳ ኮዳይኖ ኤያ ሳዳንካ ክዳና ሶጎ ኮዳይንም ዬቲ ዼሳዬው? ² ሜ ትዻዳ ካላ ኣንጋላማ ክንካ ዳምቢንካ ዻክማንቴ ኮዳይኖ ኖ ሳዳንካ ክዳና ሶጎኖና፤ ኮዶን ኮሳ ኣንጋ ክጃዳና ይንካ ይትዻዶን ዳምቢንባራኻ ውታና ኮውታይ። ³ ኮዶንካሞ ኣንጋ ኮሳ ሳዳንካ ክዳኻ ኣንጌ ኣብ ኮትዽና ቡሎና ኮግያ ሃንዻይ፤ ኮዶን ኣንጋ ኮሳ ክጃዃ ኣንጌ ኣብ ይትዻዳናኻሞ ና ዳምቢን ኦጎባራኻ ውትዲና፤ ኮግያ ቡሎ ሃንዽማሞ።

⁴ ኣጋታኻ ዎምባ ናናቶ፣ ዬትካሞ ክርስቶስ ዋንካ ዳምቢንናንቴ ጃይዲና፤ ኣጋኻሞ ዴምጲንባራ ዻጳዳ ኤያ ዋናንቴ ክንቴ ማታንቴ ባርያናንቴ ኣፒ ዎኬኻናንቴና። ⁵ ኣና ብርካ ሴሶን ዋን ጌጳሞንሳ ¹ ቾባራ ዎዶንካ፣ዴምጵንናንቴ ኣፒ ዎኬኻናንቴ ዳምቢኖ ይዻሳዶኖ ሴሶንሳ ካጃልማኖ ዎሳ ዋንሳዛራ ኣሽክቴና ኮዶ። ⁶ ኮዶን ታ ኣና ብራንቴ ዎም ዻኻዶንናንቴ ውቲ ጃንቴ፣ ዳምቢን ካላንካ ውቲ ውትዲና፤ ኦጎኖኻሞ ዳምቢን ጌቾን ኡካዻዶንካ ዎዋድሜኻናንቴ ትማሞ፣ ኡስን ጎይን ሃሊንካ ዎዋድሜኻናንቴና። ⁷ ታ ናንሲ ሃር ዎያሜ? ዳምብኖ ይባራንካ ሴሶው? ካለኻሞ ሴሶ ትማሞ፤ ኮዶን እኒ ዳምቢን ጎይንካ ኮትምና ሴሶኖ ሃር ኮዶንም እኒ እንታ ዼስማና እዳይ፤ ዳምቢኖ ሃጝርዽናኖ ኮያማድምና፤ ኣጝርማኖ ሃር ኮዶንም ጎንዼ እኒ እንታ ዼስማና እዳይ። ⁸ ኮዶን ሴሶኖ ዳምቢን ይዻዋዳ ጎያኻ ኣርዳንቴ እሳ እሮ ኣጝርማና ዛርቦና ሃንዻይናም ፓይላ ዻስስዲና፤ ኦጎኖ ሴሶኖ ዳምቢ ኮቆልማ ዴምጲ ኮዶንታኻና። ⁹ ዳምቢኖ ኮቆልማ እንታ ሳዳንካና እዶ፤ ዳምቢኖ ኮናኣዃ፣ ሴሶኖ ሳዳ ሃፕዲና ኮዶን እንታ ጃይዲና። ¹⁰ ሳዳንናንቴ ሃማንቴ ዳምባ ቃባዻዳ ኣጋ፣ ዴምጲ ክባኣዶንም እንታ ዼስዲና። ¹¹ ሴሶኖ ዳምቢንካ ሃማንቴ ጎያ ይያፓዳኻ ኣርዳንቴ ኢም ታይስዲና፣ ዳምቢንካኻሞ ኢም ዴስዲና። ¹² ኣጋታኻ ዳምቢኖ ይባራንካ ጫራጚና፤ ዳምቢኖ ጌይዻዶኖኻሞ ጫራጚቤ፣ ጋዛቤ ፃሊቤና።

¹³ ታ ናንሲ ዬራ ፃላ እናንቴ ዴምጲ ማትዲው? ካላኻሞ ይንታ ዳድማሞ ኮዶን ሴሶኖ ሴሶ ይዶንም ማይ ኮዳዃ ዼሳዼኻናንቴ ዬራ ፃላባራኻ እዛራ ዴምጲን ባእዲና፤ ኦጎኖ ሴሶኖ ዳምቢንካ ሃማንቴ ካሎን ሴሶ ኮዴኻናንቴና።

¹⁴ ዳምቢኖ ባርያ ጋን ኮዶን ውቲ ዼሳናዎዼሳይ፣ ኮዶን እንታ ሴሶንናንቴ ካይሲግያ ሻንሻዻዳ ዋ ኤድ እዶንም ዼሳና እዼሳይ። ¹⁵ ዬራ እያያም እንታ ዼስማሞ፤ ዬራ ሃያናንቴ እዛጋይናም እንታ ሃይማሞ፤ ኮዶን ዬራ እቶዛዻያ ኣጋም ሃያና እያያይ። ¹⁶ ዬራ ሃያናንቴ እዛጋያም እያያዳና ዳምቢኖ ፃሊ ኮዶንም እንታ ማጚና። ¹⁷ ኦጎንታ ዳና፣ ዬራ ክናም ሃይቴን ዳ እንታ ትማሞ እሳ ኢሮ ዶኖ ሴሶኖና። ¹⁸ እግዶር፣ ብሺን እሳ ሴሶን ጋይሮ ዬር ፃል ካላኻሞ ኮዳሞን እንታ ዼሳናእዼሳይና፤ ዬር ፃል ሃያናንቴ ² ፖሻዻናእፖሽካዻይ፤ ኮዶን ሃያናንቴ እንታ ቻልማሞ። ¹⁹ ዬራ እያያይና ዬራ ፃሊና ሃያናንቴ እዛጋይና ትማሞ፤ ኮዶን ዬራ ሃያናንቴ እዛግምና ዬራ ዛርቦናምና እያያይ። ²⁰ ዬራ ሃያናንቴ እዛግምናም እያያዳና ዬራ እግናም ሃያያ እንታ ትማሞ፣ እግዶር ዶኖ ሴሶኖና። ²¹ ኣጋታኻ ዳምቢኖ ኮኖ ኣሽክቴ ኮዶንም እናንቴ ኣርድዲና፤ ኣጋኻሞ ዬርን ፃሊን ኣሽካናንቴ እዛግና ዬሮ ዛርቦኖ እላማ ክንካ ዳይዲና።

²² እንታ እሳ ኢካ ባርያሳ ዳምቢንካ ዋዝንዻና እዋዝዻይ፤ ²³ ኮዶን እሳ ዋንሳ ኢሮ ኣሽካን ሴሶን ዳምቢናንቴ ኢም ዻኪ ኤድ ሃያንቴ፣ እሳ ሜቴንሳ ኢሮ ዳምቢን ዶን ላማ ዳማያ ዳምቢ ኣብ እሳ ዋንሳ ኢሮ ኮኣሽካይንም ሃፕቴ እዶ። ²⁴ እንታ ሃሞንታ ካሎን ኤድ እዴ! ኮ ብሺን ዴምጲንናንቴ እንዻዶንካላንካ ሃውቴ ኢም ዻኣሻያ? ²⁵ ጌጳ ዎሳ ኢየሱስ ክርስቶስካ ጎሺኖ ባርያናንቴ ኮዴ።

ታ ናንሲ፣ እንታ እባራንካ እሳ ሜቴንካ ባርያሳ ዳምቢንናንቴ ካይሲ ዳንቴ፣ ኮዶን እሳ ዋን ሴሶንጋይንካ ሴሶን ዳምቢንናንቴ እንታ ካይሲና።