6

¹ ታ ናንሲ ሃር ዎያሜ? ባርያሳ ፃላሞኖ ኮሻብሜኻናንቴ ሴሶ ኣሽክቴ ዳውዎዳይ? ² ኦጎንታ ዳማሞ፤ ውቲ ሴሶንናንቴ ጃይዲና፤ ታ ናንሲ ሃስ ሃያንቴ ክላማ ክንካ ዎዴ? ³ ኢየሱስ ክርስቶስ ማላ ክንካ ካላ ዳናንቴ ሻይዻዳና ውቲ፣ ክሳ ዴምጲንማላ ካላ ማታናንቴ ዎሻይዻዶንም ዬቲ ዼሳዬው? ⁴ ኣጋታኻ ክርስቶስ ባርያ ዎምባሳ ጎሺንካ ዴምጲንባራ ክዻጳዳግያ፣ ውቲካሞ ኦጎንታ ሳዳ ሃሊካ ዎዴኻናንቴ ሻዮንካ ጃንቴ ክላማ ክንካ ውቲ ዱካዽዲና።

⁵ ዴምጲንካ ክላማ ክንካ ኦጎንታ ካላ ዎዳና፣ ዴምጲንባራ ዻጳዻንካኻሞ ኦጎንታ ክላማ ካላ ዳናዎዳይ። ⁶ ካኻ ካርሳንቴ ሴሶንሳ ካይሲ ዳን ዎጋሬኻናንቴ፣ ብሺኖ ሴሶንሳ ሺእሻዼኻናንቴ ዎሳ ዋኖ ጌቾኖ ¹ ክላማ ክንካ ዚታዻዶንም ውቲ ዼሳናዎዼሳይ፤ ⁷ ኦጎኖኻሞ ኤያ ጃዳ ሴሶንሳ ካይሳሞንባራኻ ላልማንቴ ውትዲና።

⁸ ክርስቶስ ላማ ዎጅና፣ ክላማ ክንካ ዎዳይንም ውቲ ዼሳናዎዼሳይ። ⁹ ክርስቶስ ዴምጲንባራኻ ዻጵዲና፣ ፕር ማታቴ ክጅሞንም ውቲህ ዼሳናዎዼሳይ፤ ካኻ ካርሳንቴ ዴምጲኖ ክዛራ ካንታ ዳማሞ። ¹⁰ ይጃዶን ዋዳንካ ሴሶንናንቴ ካላብሽ ቱንሲ ጃይዲና፤ ኮዶን ሳዳንካ ዳዻይንም ባርያናንቴና ክዳይ።

¹¹ ሊኪ ኣጋንታ ሴሶንናንቴ ዬጃዳግያ ክርስቶስ ኢየሱስካ ባርያናንቴ ሳዳንካ ዬዳግያ ዬም ፓይድማቴ። ¹² ኣጋታኻ ሴሶንሳ ቃቦን ዛርቦን ሃያናንቴ ብሽን ዬሳ ጃንዛራ ሴሶኖ ኮብትሜኻናንቴ ዬያይናኖ። ¹³ ብሺን ዬሳም ይንካ ዬር ዛርቦ ኣሽካዻያ ኮይሶ ሃያንቴ ሴሶንናንቴ ዬእምናኖ፤ ኦጎናንቴ ዴምጲንባራኻ ኤና ሳዳንዛራ ሳጋዳናግያ ዬም ባርያናንቴ እምማቴ፤ ብሺን ዬሳም ይንካ ዬር ጋዛሞ ኣሽካዻያ ኮይሶ ሃያንቴ ባርያናንቴ እምማቴ። ¹⁴ ዬቲህ ባርያሳ ፃላሞንሳ ቾባራና ዬዶ፤ ዳምቢንሳ ቾባራ ዬዳድሞንታኻ ሴሶኖ ዬዛራ ብቲ ዳማሞ። ¹⁵ ታ ናንሲ ሃሞንታ ኮዴ? ውቲ ዳምቢንሳ ቾባራ ዳማ፤ ባርያሳ ፃላሞንሳ ቾባራ ዎዶንናንቴ ሴሶ ዎኣሽካያው? ኦጎንታ ካላኻሞ ዛግስማሞ! ¹⁶ ዬም ኤዲ ካይሲ ሃያንቴ ዬእምና፣ ይንናንቴ ዬኤሳራያ ኣጋናንቴ፣ ኣጋኻሞ ዬም ዴምጲንዛራ ኣንሳያ ሴሶንናንቴ ዎይካሞ ዬም ጋዛሞንዛራ ኣንሳያ ኤኤ ሃማንቴ ጉማዻንናንቴ ካይሲ ዬዶንም ዬቲህ ዼሳዬው? ¹⁷ ኮዶን ኣና ብራቴንካ ሴሶንሳ ካይሲ ዬዳናኻሞ፣ ታማርና ዬናንቴ እንዻዳናም ዎይላም ካላኻ ኤና ኤሳራዳና ዬዶንታኻ ጎሺኖ ባርያናንቴ ኮዴ፤ ¹⁸ ሴሶንሳ ካይሳሞንባራኻ ቡልዻዃ፣ ውታንቴ ጋዛሞንሳ ካይሲ ማቲዲና።

¹⁹ ዎድንታርካ ዬቲህ ኤድ ካንታ ቃጃ ዬዶንታኻ፣ ዬግያ ኤዲ ይዼላቃያግያ ይንታና እያማይ፦ ዋን ዬሳም ካሳ ብራር ሲያሞንናንቴቤ ብራዛራ ካሎን ጌጳዻዳቴ ያኣን ዛርባሞናንቴ ካይሲ ሃያንቴ እምቴ ዬዳግያ፣ ታ ናንሲ ጫራጝማሞንዛራ ዬም ኣንሳን ጋዛሞንናንቴ ካይሲ ሃያንቴ ዋን ዬሳም እምማቴ። ²⁰ ሴሶንሳ ካይሲና ዬዶን ዋዳንካ ጋዛሞንባራኻ ፔጌና ዬዶ። ²¹ ታ ዬም ዬርን ቦክንሳባራኻ ኣና ዋዳን ኦጎኻ ዬራ ፃላ ዬያፓዳ ሃርቴ? ዬራ ኣጋ ይባኣይኖ ዴምጲና። ²² ኮዶን ታ ሴሶንሳ ካይሳሞንባራኻ ቡልዻዃ ውታንቴ ዬቲ ባርያሳ ካይስና ማቲዲና፤ ዬራ ዬፑኡሻይናኻሞ ዬም ጫራጝማሞንዛራ ኣንሳና ኬኣንሳይ፤ ዬራ ኣጋሳ ቱንስኖኻሞ ላይን ዳይኖ ሳዳኖና። ²³ ሴሶንሳ ካሽኖ ዴምጲና፤ ኮዶን ባርያሳ እምንቶኖ ዎሳ ጌጳ ኢየሱስ ክርስቶስካ ላይን ዳይኖ ዳይኖና።