¹ ናንሲ ኤርጎን ኤና ሰጳናግያ "ዩማቴ ፔሮንዛራ ባርሳ ካይሶን ባአይና ዮራ ሶጳና ወይንን አፕና መቴባጳናም ሮንቅስማቴ" ሀማያ እለት ባርዮን ኦኖን ባራ እንታ አስርድና ² ኤርጎን ኤያ ብራስ ቃልቴ ባርያሳ ካይሶን ባአይን ወይንን መርባጶን ኩሊሮሀ ይንቅስድናና፣ ሜሻ ዳብታሳ ሜይጴን ቻደና ዳብታ አሽካጳናንቴ ኮንፓርሳዳና ኤና ዛራ ሀጅሚ ጌጵ ጋልንሻያ ኬዛራ ኡትድና፡፡ ³ ላንሳ ኤርጎ ኤያ ወይንን ጩብድን ኩሊንካ ሌኤን ኑንቆንዘራ ይንቅስድና፣ ሌኤኖሀሞ ማአሲ ማትድና ኑንቆንሳ አሮ ዳና ዳብና ሀንጰይና ዮሮዳና ፓይላ ጃይድና፡፡ ⁴ ኤርጎን ኤያ ማክንሳ ወይንን ኩሊንካዶን ኑንቆና ባይንካ ዳና ግደርቤ ኑንቆን ሮቶራይን ራቅሮ ይንቅስድና፣ ኬሀሞ ማአሲ ማትድና፡፡ ⁵ ናንሲ ባርያሳ ኤርጎን ኤያ ኑንቆንዛራ ጌጵስጳ ሮንታ ክያማኋ አንታ ኤሳርድና፣ "ዳቤ ዳዳቤ ቻራጓ ያ ጋዛና፣ ⁶ ኤና ባርዮን ኤናቤ ኤና አፓን ጌያይናሳ ማአሲን ኬይንቅሳ ዶንታሀ ያሀሞ ኬ ማአሲ ኬውጩሀ ያ ሀይድና፣ ኦጎኖሀሞ ኬናንቴ አጋንታና ኮዳይ፡፡" ⁷ ሀያንቴሀሞ ራቃ ዩንግዶር ባርያም ምሥካጳያ ዎይስጳባራ ይንታ ሀማያ ጴላቅ እንታ ኤሳርድና፣ "ዩኒ ውልም ቻላያ ጌጳ ባርያዎሳ ዮራ አፓብቶን፡፡ ኤና ዛራ ሀታሀያ ጎንጴቤ ጋዛቤና" ⁸ ኤርጎን ኤያ ኦይድሳ ወይንን አፕን ጩብድን ኩሊንካዶን ሀዩን ዛራ ይነቅስድና፣ ሀዩኖሀሞ ኖ ማታንቴ ኤናም ኮኮቄሀ ሀይጵድና፡፡ ⁹ ኬ ኤናሀም ሀዮንስ ኦይጳሞንካ አትድና፤ ዮራ ክና ካይሶን በአይናሳ ብታም ባርያምና ኤና ክና ኬእራይ ዩሳ ሴሶንባራ ማታድማኤ፣ ባርያ ናንቴ ባርያም ጉባድማሞ፡፡ ¹⁰ ዶኚሳ ኤርጎን ኤያ ወይንን አፕን ጩብድን ሜሻ ዳብታሳ ጌጰሞን ቦርኮቶንዛራ ይንቅስድና፣ ሜሻሳ ፔኖ ፅፕድና፣ ሶድና ኤና ፔሮ ዳና ካሎን ጋሎንካ ሀማንቴ ዩስ አታጵንና ኬጋአይ፣ ¹¹ ኬሳ ጋሎንቤሀቤ ኬዛራ ዶን ሀጅምንካ ሀማንቴ ባርም ኬ እሪድና ዩሳ ዋድማ ዛርቦንባራ ማታድማሞ፡፡ ¹² ላይስ ኤርጎን ኤያ ወይንን ጩብድን ኤፍራጥስ ባይን ኑንቆንዛራ ይንቅስድና ኑንቆኖሀሞ ኤና ብትና ፔን ሀዩን ይኡታንባራ ናኣይና ናንቲ ጎይህ ኮሜታሀ ናንቴ ኑንቆኖ አቅድና፡፡ ¹³ ናንሲ ቃርታ አፓንባራ "ሜሻ ዳብታስ አፓን ባራቤ ኤያ አፓ ፓጋሞን ጌያያሳ አፓን ባራ ኬስ ፓይላ ዮር ፓናቆ ታሀዳ ግያ ሀምና ሜሽን ቤሮና ሲዮና ኬኡትካ እንታ ሀፕድና፡፡ ¹⁴ ኤ እግና ዋድማን አሽካይና ቤሮናሳ ካንታና ኡስናና፣ ኬ እግና ባርሳ ናአጳያሮራ ኡን ጋንታ ናንቴ ኤና ፔሮ ዳና ብትናም ኬፑሼሀ ናንቴፔ ውልዛራ ያአና ኬያአይ፡፡ ¹⁵ ታ እንታ ድቢያና እናአይ ኤድ ሀውካ ፑንዱርቆ ዳን ክጋሬ ጉሮ ክዷኋ ሀፓጳን ክጋሬሀ ናንቴ ፓሀልጳንቴ ዩሳ ሀፓላን ፃሊ ጳክንጳንቴ ዳ ኤያ ኣጋ ጎሻጳና፡፡" ¹⁶ ኬሀሞ ኤና ፔንሳ ብትናም ዕብራይስጥ አፓሀ ራቃ አርማጌዶን ዛራ ፑኡሽድና፡፡ ¹⁷ ኤርጎን ኤያ ሶጵሳ ወይንን አፕን ጩብድን ዞን ፓላን ዛራ ይቅስድናጳ ባርያሳ ጌጳሞን ኦኖንባራ "ማቅድና" ሀማያ አፓ ኡትድና፡፡ ¹⁸ ናንሲ ጳልቃትቤ፣ እርጎቤ ፔሳ ጃጉማ ጌጵ ማትድና፣ ኤድም ፔሮ ዎድድዛራ ካርሳንቴ ዮር ፔሳ ጌጵ ጁጉማ አጋንታ ሃማ ሀፓንቴ ጴሳጵማሞ፣ ጁጉማኖሀ ካሎን ጌጵና ኮደ፡ ¹⁹ ከታማኖ ፔኖ ጌጶኖ ራቅ ማካም ግያ ካሽምድና፣ ኤድንሳ ፔኖ ሞሮኖ ዋኒ ኮስምድና፣ ባርያሀሞ ፔን ዋድማን ዩሳሀ ባርያሞ ጴስሞኖ ባቢሎንም ኮሳ ዋድማስ ዛረባስ ናንቴ ኮም ኮም ካይስድና፡፡ ²⁰ ኤና ኑንቆን ጎዶሮ ዳና ውል ጎብድና፣ ኤና ፔማርሮ ዳ ካይድና፡፡ ²¹ ዶቦንሳ ሽክንኖ ኤና ዛራ ጳባራ ፓላንባራ ሀንችድና፣ ዶቦጥሳ ሽክንኖ ሀንቻዶኖ ኤና ዛራ ኮሳ ዴፃሞን ዮክንሳጵና ኦይድታም ዶኚና ኤና ዛራ ጋሎኖ ናአዶኖ ጌጵ ዶዶንታሀ፣ ናሽክንኖ ኦጎኖ ኤናም ኮልንሻኋ ኤና ባርያም እሪድና፡፡