ሰዀተር ፊዃ (ፊዃ-8) ኢየሱስ ስጃ ሲሕ ከውሲ ቊሱዅ

1 ግርጋት እንድላ ከው ገሪው ኮዶ እንኩልኩልስኖ፡እንትኑኹሉ፡ላሪ አብል 2 ኒታለይቶትሲ ሽጞ “እን ከው ሰኸንዲሰነኩለ እንኩኑዅ፡እንግግነት-ናሲዀር ኳራ ግን ነት ይዲ ህንበው 3 ቊግኒ ናኮል ወንተስኖሎም ናልድ፡ስጙትልድ እንተው ህምበነኲ፡ጉግሊ ቂልስድኖ ግን፡ይኹሎም። 4 “ይን ህምብናዃ ከደን ነስክ፡ዓቅታ ሳንስዕ ኤዊልድ ናቅስኖሎም”፡ይኑኹሉ። 5 “ውሪኮ ሳንሲዕ ሻኽድኑኹን?” ዮ ወንቀሩኹሎም፡ናዋ “ለጘታ ዋ” ይኑኹሉ። 6 እንሱን ከውሲ ከፍያ ይኹሎም።እን ለጘታ ሳንሰዓስ አዶ ሐመዶ ሸረረፎ ኒታለይቶትድ እውኹሎም፡ከለብርኖኻ ከውድ በንንጚኒኹሎም። 7 ይኸ ከለላ ዓሳ እርጉኹሎም ነስር አዶ ገውሮ በኒድኖሎም እውኹሎም፡ 8 ቁኖኻ ሽርፍራፍ ከብተውድ ለጘታ ስግርፍኦታት አንሳኽኖ ጉድኑኹ። 9 ቈዋ ሰጃ ሲሕ አከነኲ ንድ ደምቢ ስብድኹሎም። 10 ንርድ ታንኳትድ ኒ ታለይቶትዲ ደልማነትር ብሪል ካሩዅ። 11 እንትኖኻ ወጠንድኖሉ ይኖ ሻሮት ዓስተርልድ ቋሊስሮሎም ጉድዕድዕ ይድኖሉ ተርሲኒዅ። 12 ለበከስ ለለክሶ ቀጡበትድ አኾርሲ ነድነዶ “ውሪዅ እና አሰል ነን ሻሮት ሺወናዅን እምንድክ የኩም እና አሰል ነድ ላሪ ሻሮት ሺወናዅን እምንድክ የኩም እና አሰል ነድ ላሪ ሻሮት ይስታዅ ኒኾርሲክ እውስተለሎም” 13 ታንኳትል አኾ ባሮሎም እንደራ ቅብሊል ካሩዅ። 14 ታለይቶት ሳንሰዓ አድነስ ምኺርኑዅ ናዲ ታንኳትል ሳንሰዓ ካያ እርግለሎም። 15 “ፈሪሳንዲ ሄሮድስዲር መኮት ዓቈልድ ፈጠና ምል ይጋ” ይኹሎም። 16 ናሹር ናሹ “ሳንሰዓ አድግናኽር አኽንነዲን ግን ነዋ ያዅና” ይስትጚኒዅ። 17 ውራ የነት አስተብሃልዱልዅ እማ “ውራ አኽዲነ ጉድዕድዕ ይደናኹን?እንተቱ ሳንስዓ አድኒ ውራ ናን አኽራሲክ ፈሃሙግደናኽር ናጝርማ ዓወስ ህምብደናዅን ለበኪትደኒማ? 18 ክምዱኑ ቋልደኒ እንቁቁው ክምዱኑኽር ሸኑርደኒማ፡ 19 ሳንስዓ አንኳ ሲሕ ግርውድ በናካ ሽርፍራፍድ ውሪካ ስግርፍኦታት እንሳኽድኖ ጉድኑዅን?” ይዅሎም።ናዋ “ሽካ ለጛ ዋ፡” ይንኹሉ። 20 . “እን ለጘታ ሳንሰዓስ ሰጃ ስሕድ በናካኻ ውሪኮ ስግርፍኦታት ሽርፍራፍ ጉድንን፧” ይኹሎም። 21 “ውራ ናን አኽራሲክ ፈሀምደኒማ?” ይኹሎም። 22 ሳይዳትል እንትኖሰናኻ ላዅ ዓረብ ናቅስኑኹሉ ተመድሮሉኻ ሺዊኒኹሉ። 23 እን ዓረብሲ ናንድ ሻኾ ከወልድ ከደን አዶ ፈርኹሉ ብጭቅድ ዕልልሲ ቋሶሉኻ ናንትትሲ አኾርሊ ገምድኹሉ እማ “ቋልደኩማ ዮ” ወንቀሩኹሉ። 24 ዕልልሲ ብርሰ “ከው ቋለኩን እንኩኹን ደአም ካን ውልቀውሲ ተከነኲ” ይኹሉ። 25 ናንትትሲ ዕልላ ዳግ ገምድኹሉ ኒኻ እንሲን ፈጠኖ ማኻልቱዅ እማ እቢሩዅ ኒእማኒሰናኻ ኒትክ ሺራኹልድ ትክሰ ቋልዶ ቃደሩዅ። 26 ፈሪ ኩልጝሊ፡ድገትል ላኹድ ድወግ ዮ ተብዶ ጋቢኹሉ። 27 ኢየሱስ ኒታለይቶትዲ ቂሳርያ ፊሊጶስር ደገጊተል አኽራሲክ ፈሩዅ። ፈሩኑኻ ኒታለይቶትሲ ነዋ ዮ ወንቀሩኹሎም “ከው ይት አውኒ ግን የናኹንለ” ይኹሎም። 28 “ላዋ ዮሓንስ ጠመቅደንታ ግን የነኩካ ላዋ ኤልያስ ግን የነኲ ላውኻ ኮዶ ኒን ነበዋትልድ ላዅ ግን የውርካ ህንበናኲ” ይንኹሉ። 29 “እንቲጛ አውኒ ግን ይደናኹንለ?” ይኽሎም።ቤጥሮሳ ክልብርሰ “እንቲ ክርስቶስ ግን” ይኹሉ። 30 ላኹድ ድወግኒን ተብዶ ፈሀምዲሱኹሎም 31 “አዳሚንዱኹራ ገሪጼ ከዋ በህሊንድኽር አቅሽሽቲ በህሊንድኽር ከታበንድኽር ማሕገድ ገምሮሉ ግን ቃበብስሮኽር ግን ኩዉስትሮኽር ግን ደአም ሰዃ ግርጋ ደምቢ ክሪልድ ጉሮ ግን” ዩንሲክ ጋቢኹሎም። 32 ጋር ኒሳ ላሪ ትብስጊ ጂጝስቱሎም ሰጘኲ።ላግርጋ ቤጥሮስ ኒቱ አድኹሉ። 33 ኒታለይቶትሲ ግልጭ ዮ ቤጥሮስቲ “ነበንታ ሸጣን ስርግ ዪ ይልስ ፈሪ፡እንቲ ስኻ ወራት ንኻ ጃሩዅ ሻክላ” ዮ ዋኺትኹሉ። ኢየሱስቲ አውሀብረ ተለይረት 34 ኒታለይቶትዲት ሽጞ ይጉርበት እንትሮ ነየታኹክ ኒፊዅትሲ በረዮ ኒመስቀል ምዅሮ ተለይንለ፡ 35 ኒፊኹትሲ ደኤንድሮ ጀረበዅክ ኒፊኹት ድሂስሮ ግን፡ኒፊኹትሲ ይመታንዲ ወንጌል መታንዲ ድሂሳኹካ ደኤንድሮላ ግን። 36 አዳም ኒትክ ብረሲክ ሻኾ ኒፊዅትስኻ ድሂሰን ውራ ውርኪትረሊ? 37 አዳም ኒፊኹት አብሊ ውራ ኡሮ ገረሳዅን፡ 38 ይልድኽር ይጋብልድኽር ስማረን እና አሰል ናፍዳንዲ ዓገቡዲ፡አዳሚንዱዅራኽር ኒኽርድ ሳቡርድ ኒሻትካን መላእኽቲዲሲ እንተራካክ ኒድ ስማርዶ ግን የኩንኲም።