ለጘተር ፊዃ (ፊዃ-7)

እማኒውድ ስሪዕ 1 ኢየሩሳሌምትልድ እንተውዲ ላው ከታበንዲ ኢየሱስቲ ናነበክል እሲነሉ እንኩልኩልስኑዅ፡ 2 ላዋ ኒታለይቶትልድ ናንትትሲ እንቃርግኒ ቋውሲ ቋልኑዅ፡ 3 ያሁዲ ስርዕ እማኒውዱዅ ተክውድኖ ይኖ ና ናንትትሲ እንቃርግኒ ቁኑ ሰጘኒ። 4 ወንተርኖሰና ኰዶ እንቃርግኒ ነብራ አዱኑ ሰጘኒ።እኽርስኮ ስሪዕሲ ተመምድድኖ ኒድ ጀአና ጀንትትዲ ግፋትዲ ኤርግ እንቃስነዲ ይኸ ናህቢነክ ኤር ወራት ገሪው እሱኑ ሰጘነኲ። 5 ፈሪሳንዲ ከታበንዲ “ውሪዅ እና ኩታለይቶት እኽርስኮ ስርዕድ ፈረገው ውሪዅ ናን ትትሲ እንቃርግኒ ቋናኹን” ይኖ ወንቀርኑኹሉ። 7 6 “ነበንቲ ሃፋፋን እን ነቢ ኢሳያስ “እና ከወነን ናአብድ ጀንጀነነኩለ ግን ግራ ናለፈክዳ ይልድ ሺሮ ህንበውግን፡ከዋ ስርዕ መሀርዱኑ ግምሽድ ጀንጀነነኩለ” ዩንሲክ እንተድ ተነበሃዅ እምን ግን ይኹሎም። 8 ጃሩሲ ባርድኖ ከዋ ስርዕሲ ተብድኖ ተከውደነኲ እንኩድኑዅ። 9 እንታ ስርዕሲ ተከውትኖር መታን ትእዳድ ጃሩዅሲ ታሕሰስድኑዅ፡ 10 “ኲ-እኽርዲ ኲ-ገነዲት ከበርዲ ኒኽርሲ ወሪ ኒገነት ጃዅዅ ክራ ክርኒ ዮ ህንበኲ”። 11 “ላዅ ኒኽርሲ ወሪ ኒገነት እን እንቲ 12 አድቶ ጀረብዳኹካ ሰደቀት ግን ይደነኲ።ኒኽርድ ነገነዲሲ ላሪ ድኳ 13 ባርድኒሉ።ናሀብዲነ እኽርስኮ ስርዕ መታን ጃር ጋብሲ ምንኮር ሃብዲኒዅ፡ነስ ተከው ይኸ ከላእ ሃብደነኲ”። 14 ኒል ሽጞኻ “ናዀርክ እንደ ይት ፈጠንድኖ ሸኑረለ፡አዳምቲ ጂብዳዅ 15 አብድ ቱዋዅ አኽላ እን ለበኪልድ አብድ ፋዅ ግን ምቊልዳዅሉ፡ 16 ዋሲው ክመኹክ ዋስኒ ኻ” ይኹሎም። 17 ሲረ ልጝሊ ትዎሰና ኒታለይቶት እንድግም ውራ ይና አኸት 18 “እንትጝርማ ላሪ ለበኪትድኒ ውራ ላሪ ፈሃምድንማ ኒውክ ከደንልድ አብድ ቱዋዅ አዳምቲ ክያውደለሉ። 19 እን አብድ ጐድጉል ቱዋዅ ጐድጉልድ ፈከደን ድግድግል ፈረኲ 20 .ግን ግራ ኒለበኪል ላሪ እሰለሉ።አዳምር ምቁሊሰው እን ለበኪልድ 21 ምቁልናርግን፡ውረድ ኣዳምር ለበኪል ሃመት ሙቁልናሩዅ ናፍዳንዲ 22 ኩነዲ ፋኲ።ኮዶ ይኸ ዳነይና ህርፋንዲ ድብጥናርዲ ምለናዲ ተነክነዲ ጂብድናዲ፡ሐበንዲ፡ልኽናዲ፡ብጝትነዲ ሀሳሰትዲ ግን። 23 ናውካ ለበኪልድ ፍልፍሎ ምቁልናርድ፡አኻ ጋራት ግን፡አዳምቲ ጂብደው ኮዶ ናው ግን። 24 ላእዂና ሲሮፊኒቅሳዊትር እምነት ጐኻ ጢሮስዲ ሲዶናዲር ገፍድ ፈሩዅ።ኮል ገእዮሰናኻ ላኹድ ቋልስትጊ ሽሉቊ ዮ ልጝሊ ትዉዅ።አርእስትሮ ጀረቡ እርግላ ደአም፡ 25 ገረስላ።ላእዅና ንርቁረት ሸጣን ቃባ ሻኻሪ ኒእንተርነስ ዋስቲ እማ ንርድ ንርድ ኒል እንትሮ ኒልኩል ሐርበጥ። 26 ግሪካ አክሩ ንርአሰል ሲሮፈኒቃ እርጉዅ፡ንርቁረትልድ ጅንሲ ፍድሮላ ሺዊቲሉ። 27 ይኸ “ባሪ ሰልፍ እቁር ብትድኖ፡ውረድ እቁር ብትግኒ ሳንሰዓስ ናልድ አድሮ ግሽጝድ ማልና ታሚተላ” ይኹላ። 28 ክልብር ስረ “የዋ ይደራ ኩእምንግን ደአም ግሽጝር እን እቁራ ግባርልድ ብሪል ለባ ሽርፍራፍሲ ቋነኲ” ይቲሉ። 29 “ፈሪ እና ኩጋበሲ እን ጅን ኩቁረትልድ ፊዅ” ይኹላ። 30 ወንተርዶሰናኻ ንርቁራ እን ጅን ባሮላ እቢርዶ አርግል ከፍ ይሮ ዲቲላ። 31 ጢሮስትልድ-ፌ ሲዶናሲ-ዮ ሽካ ደገጊር ነበክድ፡ደኮ ገሊላር ዓይግል እንቱዅ። 32 ሽሙምዲ ጨማምዲ ናቅስኑዅሉ።ናንሲ ገምድሮሉኻ ሺዊንዅሉ። 33 ከወልድ ኒቱ ዕጭጭሰ ኤዶሉ ዓጫብዕሲ እንቊቐል ትውሱዅሉ። 34 ላንቅስ ተመድዅሉ፡ዕልልሲ ዓስተርሊ፡አኽታሲክ ብርሰ “ኤፈታ” ዩዅ፡ኒንኻ “ብስቲ” ይናግን። 35 ኒእንቁቚ ብስትኹሉ፡ኒላንቅኽር እንክስትዅሉ ጠላቖ ጋቢሮ፡ 36 ድወግ ዮኻ ተብዶ ጋቢዅሉ፡ድወጊኒን ገበንሎም ወንተተሪንክ ድሪስኑዅ። 37 “ጨማማንሲ ዋሲሳዅ ሽሙማንሲ ጋብሲሳኹ ኒትክ ትክሳዅ” ዩኑ አቅትራሲክ ፈከርስኑዅ።