1

¹ ዎሳ ባክሮ ዬራ ሃምማዳናም ¹ ኤዲኖ ጱፅኖ ይቻላዳናግያ ዋርቃትሮ ኡክዲና፤ ² ዼላቅና ክናም ካርስሮኻ ቻንቴ ኤና ሃፓዳናቤ ኤና ዼላቅና ክናም ታማርስቴን ዳናቤ ዎናንቴ ኬሳስካዳናና። ³ ጎሻዻዳ ቴዎፍሎስ፤ እንታኻሞ እባራንካ ዼላቅና ክናሳ ጫጪም ፃሊ ሼዳንቴ፣ ዼላቅናሳ ካርስሮኻ ቻንቴ ቱንስንዛራ ኬም ሊክ ሊክ ሃያንቴ ሃናንቴ እኡኬኻናንቴ እናንቴ ፃሊ ማታንቴና ኬያፕንዻዶ። ⁴ ዬራ ክናምካሞ ይንናንቴ እያያይኖ ዬራ ሃታማራዳ ጎንዼ ክዶን ሃዼሴኻናንቴና። ⁵ ይሁዳ ፔንሳ ብታ ሄሮዶስ ዋዳንካ ኤያ ኣብያ ኦላሮ ኤና ኣይሁድሳ ዳምብን ኣሽካያ ኤያ ዘካርያስ ሃንዻያ ዳይዲና፤ ሜኖ ክሳ ኤልሳቤጥ ኤያ ኣሮን ሃንዻያ ቢዛና። ⁶ ኬ ላማ ውል ባርያሳ ቃቦንቤ ዳምብንቤም ፓይላ ሃያይና ዬርን ዛርቦንባራ ዪም ፔግንሳንቴ ዳና ባርያሳ ዎትሮ ኬ ኤዲ ጋዛና፤ ⁷ ይያማንካሞ ኤልሳቤጥ ሴኮ ኮዶንታኻ ኬሳ ናሶ ቆልማሞ፤ ኬ ውል ካልሎን ጌችዲና። ⁸ ሮሮ ካላ ዘካርያስ ኦላን ይኖንሳ ዋድማን ሳኣታኻ ባርያሳ ዎትሮ ኣይሁድናሳ ዳምብን ኣሽክቴ ክዶን ዋዳንካ፤ ⁹ ኣይሁድናሳ ኤና ዳምብን ኣሽካይና ጎይንካ ባርዮን ኦኖንዛራ ኣርዳንቴ ቁኛን ክጉዴኻናንቴ ቡኪ ዻባንቴ ኪም ካንዽዲና። ¹⁰ ቁኛን ባርያናንቴ ጉዳዻን ዋዳንካ ዛርስኖ ፓይላ ጳልሎ ዳንቴ ምስክቴና ኮዶ።

¹¹ ባርያሳ ኤርጎን ኤያ ቁኛን ጉዳዻን ሙልዻንሳ ምዛቅባራ ዎያንቴ ክናንቴ ሃፕንዽዲና። ¹² ዘካርያስካሞ ኤርጎን ኤያም ሃፓንቴ ዎይላም ታክዲና፤ ካልሎን ጌጲካሞ ኩርትንዽዲና። ¹³ ኮዶን ኤርጎን ኤያ ክግያ ይንታና ክያማዶ፦ “ዘካርያስ፣ ሃኩርትንዽናኖ፤ ምስኮን ሃሳም ኤሳርዽዲና፣ ሜኖ ሃሳ ኤልሳቤጥ ኣንጌ ናሶ ሃናንቴ ኣዻና ኮኣዻይ፤ ናብን ክሳምካሞ ዮሃንስ ሃማንቴ ዎድማ። ¹⁴ ክንካ ዼርቃዻንቴ ዋዛና ሃዳይ፤ ኪም ኣዻዻዳኻ ሃማንቴ ኤዲኖ ጱፅኖ ዋዝንዻና ኮዋዝንዻይ፤ ¹⁵ ኦጎኖኻሞ ኖ ጌጳሳ ዎትሮ ኤዲ ጌጲ ክዳይንታኻና። ዎይንን ዚኣንቤ ውጮና ዋኒ ኤናም ባርያሳይናቤም ውጭማሞ፤ እንዳንሳ ኢሮ ዳንቴ ባርያሳ ኡሲን ጫራጚን ቻና ክቻይ። ¹⁶ እስራኤል ኤና ግዶርካ ኤዲን ጱፅኒም ጌጳ ኬሳ ባርያዛራ ኖ ማሳና ክማሳይ፤ ¹⁷ እምባናሳ ዎይላምን ኬሳ ናናዛራ ማሳናንቴ ኤና ኤሳርምናም ኤና ጋዛናሳ ሃማሞዛራ ማሳናንቴ፤ ጌጳ ናንቴ ዛርስን ሼክምን ዶን ባኣናንቴ ኤልያስ ኡስንካቤ ካንታንቤኻ ጌጳሳ ዎትሮ ያኣና ክያኣይ።

¹⁸ ዘካርያስካሞ ኤርጎን ኤያግያ፦ “ዬርን ኦጎም ሃርካ እዼሴ? እንታ ኤዲ ጌቾና፤ ሜኖ እሳኻሞ ካልሎን ጌችዲና” ና ክያማዶ።

¹⁹ ኤርጎን ኤያ ማሳንቴ ክግያ ይንታና ክያማዶ፦ “እንታ ባርያሳ ዎትሮ ዎያያ ገብርኤሊና፤ ዬራ ካም ሃናንቴ ጌያናንቴቤ ዼላቃ ፃላ ካም ሃናንቴ ባኣቴ እኔኤኻናንቴ ኢም ኒእሳዽዲና። ²⁰ ታ ያ ቤሬ ይሳ ሮራኻ ዼላቃ እሳ ሃምማያም ጎንዼና ሃማንቴ ሃቻድሞንታኻ፣ ዬራ ካሳ ጎንዼ ማታዛራ ያ ኣፖ ካያና ሃዳይ፤ ዼላቃናንቴኻሞ ያ ቻልማሞ።” ²¹ ዋዳ ኣጋኻ ዛርስኖ ዘካርያስ ባርዮን ኦኖንባራ ውትማ ሃርናንቴ ክካፓዶን ኬናንቴ ዬር ዋና ኮማታዃ ካሊቴና ኬዶ። ²² ኖ ባርዮን ኣኖንባራ ይውታና ኬም ዼላቅሳናንቴ ቻልድማሞ፤ ኬላማ ይሳ ኣኒካ ዼላቃሳ ኦባራ ኣፖንካ ዼላቃናንቴ ክቻልድሞንታኻ፤ ባርዮን ኦኖሮ ባርያ ክናንቴ ዬር ካላ ክዻዋዶንም ኤና ዼስዲና።

²³ ዘካርያስካሞ ባርያናንቴ ክዋድማን ዋዳኖ ኮማቃና ይሳ ኦኖንዛራ ያእዲና። ²⁴ ናንሲ ኣጋሳ ራስባራ ሜኖ ክሳ ኤልሳቤጥ ኢ ካምዲና፤ ኣርፒ ዶጝናንቴኻሞ ዪም ኣችዲና፤ ናኻሞ ይጌይና፦ ²⁵ “ዬራ ኢም ቦውሳያም ኤናሳ ባክሮ እካላንካ ዻሳናንቴ ጌጳ ይሳ ጋዛሞንካ ኢም ሼዳንቴ ሮሮን ኮኻ ዬርን ኮም እናንቴ ሃይዲና” ና ኳማዶ። ²⁶ ኤልሳቤጥ ስርማዻንቴ ኣርፒ ላኽ ኮሳ ኮማታዃ፣ ባርያ ይሳ ኤርጎን ኤያ ገብርኤሊም ገሊላ ፔንሳ ናዝሬት ሃንዻን ካታማንዛራ ይእስዲና። ²⁷ ይንዛራ ይእሳዻዶኖ ዳዊት ቢዛስ ዮሴፕ ሃንዻያሳ ሃራኖ ዱዲኖ ኣንጌን ዼስሞንናንቴና፤ ናን ዱድንሳኻሞ ናብኖ ማርያሚና። ²⁸ ኤርጎን ኤያ ኮዶንዛራ ቃልቴ ኮግያ፦ “ያ ናሻዻዶኖ፣ ፃሊኖ ሃናንቴ ኮዴ፤ ጌጳ ሃላማና ክዶ፤ ያ ሜ ይንናንቴ ፓፂን እዻዳና” ና ክያማዶ።

²⁹ ማርያምካሞ ዼላቅን ክሳኻ ካልሎን ቃꬅማንቴ፣ “ኮኖ ጌሶ ሃስ ሃማቴ?” ሃማንቴ ዼላቃም ቃባን ካርስዲና፤ ³⁰ ኤርጎን ኤያኻሞ ኮግያ ይንታና ክያማዶ፦ “ማርያም፣ ሃኩርትንዽናኖ፤ ባርያሳ ዎትሮ ያ ካንዽዲና። ³¹ ታ ያ ኢ ካማና ሃካማይ፤ ኣንጌ ናሶኻሞ ኣዻና ሃኣዻይ፤ ናብን ክሳምካሞ ኢየሱስ ሃማንቴና ሃዎዳይ። ³² ኖኻሞ ኤዲ ጌጲና ክማታይ፤ ባርያ ጌጳሳኻሞ ናሳና ሃንዻይ፤ ባርያ ጌጳ እምባ ዳዊትሳ ብታሞን ቦርኮቶን ክናንቴ እማና ክእማይ፤ ³³ ኖ ያእቆብ ሞሮሮ ላይ ብቲና ክዳይ፤ ክሳ ማንግስትንሳ ቱንሲ ቆልማሞ።” ³⁴ ማርያምካሞ ኤርጎን ኤያግያ፤ “እንታ ኣንጌ እዼስሞንታኻ፣ ዬራ ኣጋ ሃስ ኦጎንታ ክዴ?” ና ኮያማዶ።

³⁵ ኤርጎን ኤያ ማሳንቴ ኮግያ ይንታ ሃምዲና፦ “ኡስኖ ጫራጚኖ ሃዛራ ናኣና ኮናኣይ፤ ጌጳሳ ካንታኖ ሃም ክጫና ኮክጫይ፣ ኣጋታኻ ናሳ ጋዛስ ኣዻዻያ ባርያ ናሳና ሃንዻይ። ³⁶ ታ ሃሳ ኤዳኖ ኤልሳቤጥኻሞ ይሳ ጌችንታን ዋዳንካ ኣንጌ ናሶ ስርማዽዲና፤ ታ ኤስኖ ሴኮኖ ሃንዻዶኖ ስርማዻንቴ ኣርፓ ላይሳም ዬስክዲና፤ ³⁷ ባርያም ዬር ባሻያ ቆልማሞ።”

³⁸ ማርያምካሞ ክግያ “እንታ ጌጳሳ ካይሲና፤ ኣፓ ሃጌያዳግያ እናንቴ ኮዴ” ና ኳማዶ። ሃያንቴ ኤርጎን ኤያ ኮኻላንካ ያእዲና። ³⁹ ማርያምካሞ ዋዳስ ኣጋኻ ዪሪካ ዻጳንቴ ይሁዳ ፔንሳ ጌማርሮ ዳ ካታማ ካላዛራ ያእዲና፤ ⁴⁰ ዘካርያስ ኦኖንካሞ ኣርዳንቴ ኤልሳቤጥም ጌስዲና። ⁴¹ ኤልሳቤጥካሞ ማርያምሳ ጌሶንም ኮኤሳራና፣ ናሳ ኮሳ ኢሮ ዻጵዲና፤ ኤልሳቤጥካሞ ኡስን ጫራጚንካ ፆፅዲና፤ ⁴² ናቅሲ ይሳም ዼግ ሃያንቴ ይንታና ኮያማዶ፦ “ያ ሜና ግዶር ሜ ይንናንቴ ፓፅን እንዻዶኖና፤ ናሳ ሃሳ ኢሮኻ ውታያ ይናንቴ ፓፂን እንዻዳና። ⁴³ ኤሳንካ እሳ ጌጳ እንዳኖ እዛራ ኮኔኤኻናንቴ እንታ ሃውቴ? ⁴⁴ ታ ሃሳ ጌሶን እኤሳራና ናሶኖ እሳ ኢሮ ዶኖ ዋዛኻ ዻጵዲና። ⁴⁵ ኮናንቴ ዬራ ሃምማና ክያማይ ሃማንቴ ጌጳ ክጌያዳ ኣፓም ኤኤ ሃማንቴ ኤስኖ ቻዶኖ ኦጎኖ ኤዲ ይንናንቴ ፓፅ እንዻዳና!” ⁴⁶ ማርያምካሞ ይንታና ኮያማዶ፦

“ሳዳኖ እሳ ጌጳም ዼግ ዼግና ኮያያይ፤

⁴⁷

ኡስኖ እሳኻሞ እሳ ዼሻስ ባርያኻ ዋዝንዻና ኮዋዝንዻይ፤

⁴⁸

ኦጎኖኻሞ ኖ እ ካይስቶን ይሳሳ ቦውንታም ሃፕዲና።

ሃይታላኻ ካርሳንቴ ኤዲኖ ፓይላ

እግያ ና ኤዲ ይንናንቴ ፓፂ እንዻዶኖና ኬያማይ፤

⁵⁰ ፃላሞኖ ክሳኻሞ ኤና ኪም ኩርትንዻይናናንቴ

ቢዛ ኣብ ኣብዛራ ላይና ኮዳይ።

⁵² ኤና ብቲናም ኬሳ ብታሞን ቦርኮቶሮኻ ሃንችሽዲና፤

ኤና ዪም ይርክ ሃያዳናም ዼግ ዼግ ሃይዲና፤

⁵⁴ ይሳ ፃላሞንናንቴ ሃማንቴ ይሳ ካይስታ

እስራኤልም ኬልሽዲና፤

⁵⁶ ማርያም ኣርፒ ማካምግያ ኤልሳቤጥ ካላ ዳርቃንቴ ይሳ ፔንዛራ ማታቴ ያእዲና። ⁵⁷ ኤልሳቤጥካሞ ኣዽማን ሮራ ኮሳ ክዬስካና፤ ኣንጌ ናሶ ኣዽዲና። ⁵⁸ ኮሳ ጉልን ኤናቤ ኤዳናቤ ጌጳ ኮናንቴ ፃላሞን ጌጲ ክያያዶንም ኤሳርዲና፤ ኮላማኻሞ ኬ ዋዝንዽዲና። ⁵⁹ ሮራ ሎንካይሳ ጋላ ኬ ናሳም ቃማን ታስኮታ ናእዲና፤ ኬ ናብን ክሳም እምባ ዘካርያስ ናብንካ ግስማናንቴ ዛግዲና። ⁶⁰ ኮዶን እንዳኖ ኤናግያ “ይንታ ዳማሞ፤ ዮሃንስ ሃንዼ” ና ኮያማዶ። ⁶¹ ኬኻሞ ኮግያ፣ “ሃሳ ኤና ግዶር ኤዲ ናባ ካኻ ግስንዻዳ ቆልማሞ” ና ኬያማዶ። ⁶² እምባኻሞ ክናንቴ ናብ ሃር ዎዳናንቴ ክዛጋዶንም ኬ ክካላ ኣኒካ ኦይስዲና። ⁶³ ኖኻሞ ዬር ይንዛራ ዋርቃት ኡካዻያ ኦይሳንቴ “ናብኖ ክሳ ዮዋንሲና” ሃማንቴ ኡክዲና፤ ኣጋኻሞ ኤዲኖ ፓይላ ዬርሽዲና። ⁶⁴ ኣጋዛራ ዘካርያስሳ ኣፖኖ ቡልምዲና፤ ኣታጵኖ ክሳኻሞ ፕክዲና፤ ባርያም ጎሽቴ ዼላቃን ካርስዲና። ⁶⁵ ክሳ ጉልን ኤና ፓይላ ኩርትንዽዲና፤ ዬሮ ኦጎኖ ፓይላ ይሁዳሳ ፔየስ ጌማርሮ ዳሮ ሃሳውምዲና። ⁶⁶ ዬራ ኣጋም ኤና ኤሳርዳና ፓይላ “ናሳ ካ ቤሬ ብራዛራ ሃስ ሃማናንቴ ክዴ?” ሃማንቴ ዬራ ኣጋም ይሳ ዎይላምካ ዬድዲና፤ ኦጎኖኻሞ ጌጳሳ ኣኒኖ ጎንዼ ክማላና ኮዶ። ⁶⁷ ናሳ እምባ ዘካርያስ ኡስን ጫራጚንካ ፆፃንቴ ይንታ ሃማንቴና ክዼላቃዶ፦ ⁶⁹ ይሳ ካይስታ ዳዊት ሞሮሮ፣

² ዻኣሾ ኤድ ዎናንቴ ዻስዲና፤

⁷² ዬራ ኣጋም ይንታ ክያያዶኖ ዎምባናናንቴ ፃላሞን ይሳም ዻዋናንቴቤ፣

ኣፓ ጋዛስ ይጌያዳም ጶቅሳናንቴቤና፤

⁷⁶ ፕርካሞ ያ ናሳ፣ ባርያ ጌጳሳ ኣፖን ጌያያና ሃግያ ሃንዻይ፤

ጌጳሳ ጎይን ኣሽካናንቴ ኪም ብራንቴና ሃያኣይ፤

⁷⁸ ባርያሳ ሃይንቶን ፃላሞንካ ሃማንቴ

ቡሪ ሃዮ ፖላንባራ ዎናንቴ ውትዲና፤

⁸⁰ ናሳኻሞ ጌጲዲና፤ ኡስን ጋዛንካኻሞ ዋቻዽዲና፤ እስራኤል ዛርስንናንቴ ይሳ ሃፕንዻዛራ ዳራሮና ክዶ።