1 ኤና ካለንካ ወይካሞ ኤናካ ይእስጳደ ትህማሞ የሱስ ክርስቶስቤ ዴንጵንባራካ ባርያ ጌጳቤ ይህእሳደ ጳውሎስካለንካ፡፡ 2 እለማን ደና እናናናውል ገላይያር ደና ምስኮን አኖናናንቴ፡፡ 3 ባርያ ዋንባ ጌጳ የሱስ ክርስቶስሳ ናሽማንቤ ፃለሞንቤ የናንቴ ኮዴ፡፡ 4 ዋሳ ጌጳቤ ባሪያ ዋንባ ይጌያደካ ዋደካ ናንቴ ፔን ዛርበን ኮሮካ ወጳቄካናንቴ ወሳ ሴሰንናቴ ሀማንቴ ይም ሳስካንቴ እምድና፡፡ 5 ካርስሮካ ቻንቴ ላይ ካርስንዛራ ጎሽኖ ክናንቴ ኮዴ ኤኤ ክናንቴ ኮደ፡፡ 6 የሱስ ክርስቶስ ናሽማንካ እግስማደንም ክም ጋራንቴ አራ አፎንዛራ ኦጎንታ ይርካ የማታደኖ እም ዋዝንስድና፡፡ 7 ጎንጲንባኖ ኮደና አፎአብ ቆልማሞ የም ጄክሻናንቴቤ የሱስ ክርስቶስ አፎን ቆርሳናንቴቤ ዛጋይና አድ ካላ ካላ ዳይድና፡፡ 8 ኮደን ካሞ ዋትህ ካሞ ዋደና ወይካሞ ኤርጎን ኤና ፓለሮን ዳና አፓ ጌይጳደሳ አባራ አፎ አብ የናንቴ ጌይጳደና አጋ ካርስሮካ ቻንቴ ለይ አሽሞ ክዴ፡፡ 9 ብርሳንቴ ወገያደ ያደግያ ታካሞ ፈር ማስካ ጌያኔ እጌያይ ኤድ ካለካሞ የቻደሳ አባራ አፎ አብ የናንቴ ክጌይና አጋ ካርስሮካ ቻንቴ አሽሞ ክደ፡፡ 10 ታ እንታ ኣይኔ ጎንጴና ሀንጴካናንቴ ኤና ካለንካው ሞሆ ባሪያ ካለንካ? ሞሆ ኤናሞ ግድካ ዋዝን ሳናንቴ ዛግቴው እዶ? እን ኤናሞ ዋዝንሳናንቴ እዛጋያደና የሱስ ክርስቶስሳ ዋድማ ኤድ እትህሞናና፡፡ 11 እና ናናቶ አፎኖ የናንቴ እጌያደኖ ኤድ ዋድማ ብትህሞን የጴሴ ካናንቴ ዛጋኔ እዛጋይ፡፡ 12 ኤድ ካለንካ ካሞ እንታ ቻድማሞ አፎ ካለንካ ካሞ እንታ ታማርድማሞ የሱስ ክርስቶስ ካለንካ ኮያፈንኳና እቻደ፡፡ 13 አና አይወድ ባሪዮን ጎይንካ ሀሞንታ እደንቤ ባርያሳ ኤኖን ካይሳናቴ ሀሞንታ አይታንቴ እያያደንም የትህ ጴስድና፡፡ 14 ሀርያን እኖን ይደን ዋደንካ ኢይውድና ደና ካለንካ ኢይውድና ባርዮን ጎይንካ ጴግና እዶ ዋንባና ደንብናንቴውል ድደርካ ጳጳንቴ ወያደና እንታ፡፡ 15 ኮደን ካሞ እናሳ እሮካ ካርሳንቴ ፓሻንቴን ባሪያ እም ግስማደሞ፡፡ 16 ዛርስንሳ ባክሮጎ ክሳ አፎን እጌየካናንቴ ናሳ ክስ እንካ ክያፈንጲ ካናንቴ ይናሻደን ዋደንካ ኤና ዋን ባአንቴን ያያይናለማ ካለካሞ ሀሳዋድማሞ፡፡ 17 እሳ ብራር የሱስ ይህ እስደና ሐዋርያትና ዛራ የሩሳሌም እንታ ናአድማሞ አጋዛራ አራብና ፔንዛራ ካልቴ ራስባራካሞ ደማስቆ ዛራ ማትህድና፡፡ 18 ሀያቴ ካሞ ቦን ማካም ሳስካንቴ ጴጥሮስ ለማ ኬራናንቴ የሩሳሌም ዛራና እናአደ፡፡ ኬለማካም ክንካ ሮሮ ታጲ ዶግና እደርደ፡፡ 19 ኮደን ካሞ ጌጳሳ እነንደናሳ ያዕቆብሳ አባራ የሱስ ይእስደናሞ ሐዋሪያትና ዋንም እንታ ሀፓድማሞ፡፡ 20 የራ እኡካይና ባርያሳ ወትህሮጎ ፎጋሞ እጌይሞንም የጴሴካናቴ ጌያኔ እጌያይ፡፡ 21 ሀያንቴ ሰርያቤ ካልቅያቤ ፔንዛራ ካልቴ፡፡ 22 የሱስ ክርስቶስካ ደና ይደናሳ ምስከን ኢኖናካሞ ወትይ እሳሞ ሀፋንቴ ጴስማሞ 23 ኮደን ዴ ኤያ ኣና ወም ኦይታንቴ ያይቴን ደሀ አና ካሳ ብራር ዋም ካይ ሳናንቴን ዛግቴን ደሀ የሱስሳ አፎን ጌይቴና ክዶ ሀማያ ሜርሜሪ ኤሳራንቴና ኬደ፡፡ 24 እንካ ሀማንቴ ባርያሞ ካም ጎሽድና፡፡