28
1
ፔንዛራ ፃሊንካ ዎቲህ ዬስካንቴ ጉርታ ኣጋም መላጥያ ሃማንቴ ግስንዻይንም ዎቲህ ዼስዲና።
2
ጉርታ ኣጋ ኤናኻሞ ዎናንቴ ፃላሞን ጌጲ ዻውዲና፤ ፔኖ ዶቦቤ ቃጅምቤ ኮዶንታኻ ኖን ኣሳንቴ ዎ ፓይላም ቻይዲና።
3
ጳውሎስካሞ ዲሮ ፑኡሻንቴ ኖሮ ክካኻ፣ ኖንሳ ኦይዻሞንካ ሃማንቴ ኦፖኖ ዉታንቴ ክሳ ኣኒን ጋኣንቴ ርርንቶ ማትዲና።
4
ኤና ጉርታ ኣጋሮ ዳና ጉኖኖ ክሳ ኣኒንዛራ ሎጋሎጋ ሃማንቴ ኮዳኻ ሃፓንቴ ክግያ፦ “ኤያ ካ ጎንዼ ኤዲ ዴሳያና፤ ኛፓስንባራ ይዻቃዳናኻሞ ብቶኖ ጋዛኖ ኖ ሳዳኻ ክዴኻናንቴ ክናንቴ ጌያድማሞ” ና ኬያማዶ።
5
ኮዶን ጳውሎስ ጉንቶንናም ኖሮጎ ይፓትዲና፤ ክዛራ ዬር ዛርቦ ካላኻሞ ዬስካድማሞ።
6
ኤናኻሞ ታታ ዛራኖ ክሳ ኤታዻና ኮኤታዻይ ዎይካሞ ኣጋዛራ ጃንቴ ድናና ክድናይ ሃምቴ ኪም ካሊቴና ኬዶ፤ ኮዶን ኬ ኪም ላይ ካላንቴ ዬር ዛርቦ ክዛራ ኮዬስካድሞንም ሃፓንቴ፣ ይሳ ቃቦና ብራናም ጋራንቴ፣ “ኤያ ካ ባርዮታይ” ና ኬያማዶ።
7
ራቃ ኣጋኻላ ፄዲ ጉርቴን ኦጎሳ ጋራ ፑፕልዮስሳ ራቅ ዳይዲና፤ ኖኻሞ ይሳ ኦኖንዛራ ዎም ኣንሳንቴ ሮሮ ማካም ፃሊንካ ቾችንሽዲና።
8
ፑፕልዮስሳ እምባ ዛራ ኦይዻሞኻቤ ሃርንቶኻቤ ሃጃዻንቴ ዎዻንቴና ክዶ፣ ጳውሎስካሞ ኪም ኣይሳናንቴ ኣርዳንቴ ክናንቴ ምስካንቴ ኣንን ክዛራ ዎዳንቴ ኪም ፓሽሽዲና።
9
ዬራ ኣጋ ይንታ ክያማዃ፣ ጉርታ ኣጋሮ ዳና ኤና ሃጅሞና ዋኒካሞ ንቴ ፓሽዲና።
10
ዎምካሞ ጎይ ጱፅካ ኬ ጎሽዲና፤ ጋግንካ ያኣናንቴ ዎዻጳዶንካኻሞ፣ ዎናንቴ ዬራ ዛግሳይና ውልም ጋግንዛራ ኬ ሃንቺሽዲና።
11
ኣርፒ ማካምሳ ራስባራኻሞ ጉርታ ኣጋሮ ባርግንካ ኩማንቴን ካፓዳ ጋጊ ካላኻ ዎቲህ ያኣን ካርስዲና። ጋጋ ኣጋኻሞ እስክንድርያ ካታማን ጋንቲና፣ ክዛራ ዬራ ምስካዻይና ዲዮስቆሮስ ሃንዻይና ማንቲናሳ ቃንኢ ዳይዲና።
12
ሰራኩስ ካታማንዛራ ኣርዳንቴኻሞ ሮሮ ማካም ዎቲህ ዎዽዲና።
13
ኦጎታርካ ዻጳንቴ ጋግንካ ዎቲህ ሬጊዩም ዬስክዲና፤ ዋጋላሞንካሞ ሃዮን ይውታንሳ ቾባራ ግባሮ ኮዻጳዶንታኻ ፑቲዮሉስ ዎዬስካዶኖ ሮራ ላንሳኻና።
14
ኦጎታርካሞ ዎንዳና ናናም ዎቲህ ሃፕዲና፤ ኬኻሞ ሮሮ ሦጳ ኬ ላማ ክንካ ዎካፔኻናንቴ ዎም ምስክዲና፤ ሃያንቴኻሞ ሮምዛራ ዎቲህ ያእዲና።
15
ኦጎታር ዳና ዎንዳና ናናኻሞ ዎሳ ናእንቶም ኤሳራንቴ፣ ኣፍዩስ ፋሩስቤ፣ ሃያንቴኻሞ ‘ዎዽታን ራቃ ማካማ’ ሃንዻያቤዛራ ዎም ቾቻናንቴ ናእዲና፤ ጳውሎስካሞ ኬም ይያፓና ባርያም ጎሽዲና፤ ሃያንቴ ሌምዲና።
16
ሮም ዎዬስካዶን ዋዳንካ፣ ጳውሎስ ኤያ ኪም ዻቃናያ ማላ ክንካ ዋና ክዴኻናንቴ ጌይዽዲና።
17
ሮሮ ማካምሳ ራስባራ ጳውሎስ ኣይሁድሳ ኤና ጋርናም ክዛራ ግስምዲና፤ ኬፑጫዃኻሞ ኖ ኬግያ፦ “እንና ናናቶ፣ እንታ ዎሳ ዛርስን ዎይካሞ ዎምባናሳ ዳምብን ሴሳንቴ ዬር ካላኻሞ እኣሽክማ ኢየሩሳሌም ግዶር ኢም ዬዳቴ ሮም ኤናናንቴ እንዽዲና።
18
ኤና ሮምሳ ጌጲናኻሞ ዼላቃም እካላ ጫግማንቴ ዴምጲዛራ ባኣያ ሴሶ እዛራ ይያፓድሞንታኻ ኢም ቡላናንቴ ኬ ዛግዲና፤
19
ኣይሁድ ኤና ኢም ቡልዻይንም ኬቶዛዻዃ፣ ዼላቃ እንታኻ ቄሳርዛራ ክዬኤ እያሜኻናንቴ ኢም እሽክንሽዲና፤ ይያማን ዛርስን እሳም ይንካ እዻብንሻያ እሳ ዼላቅ ኮዳኻ ትማሞ።
20
ዬምካሞ ሼዳናንቴቤ ዼላቅሳናንቴቤ እግስማዶኖ ካናንቴና፤ ሳንሳላትን ኮኻ ኢም ይንናንቴ ዻኻዻዶኖኻሞ እስራኤልናንቴ ጌይዻዳ ኣፓ ይንካ ቃሞ ቁንፃዻያኻ ሃማንቴና” ና ክያማዶ።
21
ኬኻሞ ክግያ፦ “ይሁዳባራ ዬር ሃሳ ይንካ ኡካዻዳ ዋርቃት ካላኻሞ ዎም ዬስካድማሞ፤ ኦጎባራ ናኣዳና ዎንዳና ናናኻሞ ሃሳ ዬር ዛርቦ ኬባኣዳ ዎይካሞ ኬጌያዳ ካላኻሞ ቆልማሞ።
22
ይያማንካሞ ራቅና ውል ግዶር ኤና ጎያ ካሳ ዬር ዛርቦ ኬጌያይንም ዎዼሳዶንታኻ፤ ቃባ ሃንታ ሃር ክዶንም ኤሳራናንቴ ዛጋና ዎዛጋይ” ና ኬያማዶ።
23
ኬ ዼላቃም ሮሮ ኣብዛራ ማሳንቴ፣ ጱፅ ማታንቴ ሮራኻ ራቅን ይንግዶር ክዶንዛራ ኬ ናእዲና፣ ጳውሎስካሞ ቡር ቻንቴ እባንዛራ ኬም ታማርስቴ ባርያሳ ማንግስትን ኣፖን ኬናንቴ ጌይዲና፤ ሙሴቤ ባርያሳ ኣፖን ጌያይናቤሳ ዋርቃትሮኻ ኬናንቴ ጌይቴ ኢየሱስካ ኬም ኣምንሳናንቴ ሃይዲና።
24
ኤና ዋኒ ክጌያይንም ኤሳራንቴ ኣምንዲና፤ ኮዶን ዋኒ ክጌያይንም ኣምንድማሞ፤
25
ኤና ኬ ክሳ ኣፖኻሞ ጋኣድማሞ፤ ጳውሎስካሞ ቱንስሮ ይንታ ሃማያ ኣፖ ኬናንቴ ክጌያዃ ኬ ያእዲና፦ “ኡስኖ ጋዛኖ ኤያ ባርያሳ ኣፖን ጌያያ ኢሳይያስካ ዬምባናናንቴ ይንታ ሃማንቴ ክጌያዳ ልኪና፦
26
‘ዛርስን ኮዛራ ቃልቴ ይንታ ሃማንቴ ኬናንቴ ጌይማ፣
“ዬቲህ ኤሳራንዻን ኤሳራና ዬኤሳራይ፤ ኮዶን ዬቲህ ጶቅስማሞ፤ ሼዳዻን ሼዳና
ዬሼዳይ፣ ኮዶን ዬቲህ ሃፕማሞ።”
27
ዛርስን ኮሳ ዎይላምኖ ዱዲና ኮዶ፤
ቃሞኖ ኬሳኻሞ ካይዲና፤
ይሳ ኣፕንካሞ ኬ ዱምዲና።
እኒ ኦጎንታ ኬ ሃያድምና፣ ኬ ይሳ ኣፕንካ ሃፓንቴ፣
ይሳ ቃሞናኻ ኤሳራንቴ፣
ይሳ ዎይላምንካኻሞ ቃባንቴ ማታና ኬማታይ፣
እንታኻሞ ኬም ፓሽሻና እፓሽሻይ።’
28
ኣጋታኻ ባርያሳ ዻኣሾን ቶርስናናንቴ ይእሳዻዶንም ዬዼሴኻናንቴ ዛጋና እዛጋይ፤ ኬ ኤሳራና ኬኤሳራይ።”
29
ኣጋምካሞ ክጌያዃ፣ ኣይሁድ ኤና ክንካ ጌጲ ክትማዳቴ ያእዲና።
30
ጳውሎስካሞ ኦና ይንግዶር ካሻንቴ ይዳ ግዶር ቦን ላማ ፓሲ ዳርቅዲና፤ ኤና ክዛራ ናኣይናምካሞ ኖ ዋዛኻ ችቴና ክዶ፤
31
ኤዲ ሃውካሞ ኪም ኮማርማ ባርያሳ ማንግስትን ኩርትንዽማ ጌይቴ፣ ጌጳ ኢየሱስ ክርስቶስሳ ዬር ማይ ታማርስቴና ክዶ።