27

¹ ጣልያንዛራ ዎኤኻናንቴ ታኻዻዶን ዋዳንካ፣ ብታ ዎታደርና ኦላሮን ዳ ዩልዮስ ሃንዻያ ዎታደርና ማቶናሳ ጋራናንቴ ጳውሎስቤ ዻክን ኤና ዋኒቤም ሳስካቴ እንዽዲና። ² ዎቲካሞ ኣድራሚጢስባራኻ ዻጳንቴ እስያ ፔንሳ ጋግና ይዎያይና ራቅናዛራ ያኣይን ጋግሮ ሃንቻንቴ ያኣን ካርስዲና፤ ተሰሎንቄ ግዶር ዳ መቄዶንያ ኤያ ኣርስጥሮኮስካሞ ዎላማ ክንካ ዳይዲና።

³ ዋጋላሞን ዎቲህ ሲዶናዛራ ዬስክዲና፤ ዩልዮስካሞ ጳውሎስናንቴ ዬር ፃል ቃባንቴ ይሳ ኤናኻላ ቃልቴ ኬልሾ ክያፔኻናንቴ ናሽዲና። ⁴ ኦጎታርካሞ ዻጳንቴ ዎቲህ ኛፓስንካ ያእዲና፤ ግባሮኖ ዎሳ ብራሮ ኮዻጳዶንታኻ፣ ቆጵሮስ ጉርቴንካ ማርማንቴ ዎቲህ ሳግዲና። ⁵ ኪልቅያቤ ጵንፕልያቤሳ ኛፓስን ማራሮን ዶን ሳጋንቴ ሉቅያ ፔሮን ዳ ራቃ ሙራ ሃንዻያም ዎቲህ ዬስክዲና። ⁶ ሃያንቴኻሞ ኤያ ዎታደርና ማቶናሳ ጋራ ጋጊ እስክንድርያ ጋንት ጣልያንዛራ ያኣያ ሃፓንቴ ዎም ኣርስዲና። ⁷ ሮሮ ጱፅካሞ ሌሚ ሌሚ ያኣቴ ራቃ ቀኒዶስዛራ ጋላዳቴ ዎቲህ ዬስክዲና፤ ግባሮኖኻሞ ብራዛራ ያኣን ዎም ኮማራዶንታኻ፣ ሰልሙናሳ ዴሞኻ ሃያንቴ ቀርጤስካ ማርማንቴ ዎቲህ ሳግዲና፤ ⁸ ዴሞን ዴሞንካሞ ዬዳንቴ ላሲያ ካታማንሳ ዴሞሮ ጋግናሳ ይንግዶር ዎይዻያ ‘ራቃ ባሻ’ ሃንዻዳም ጋላንቴ ዎቲህ ዬስክዲና።

⁹ ሮሮ ጱፅ ሱን ካይሳንቴ ቶሮንዻን ዋዳኖ ኮሳጋዶንታኻ ¹ ጋግንካ ያእንቶኖ ጋሎ ኮዶንታኻ ጳውሎስ፦ ¹⁰ “ኤናቶ፣ ያያ ካ ዛርቦ ክዳንቤ፣ ጋግንቤ ኮይናቤ ዎዛራኻሞ ጋሎ ጌጲ ኮዬስካያም እናንቴ ሃፕንዽቴና ኮዶ” ሃማንቴ ኬም ኪሊዲና። ¹¹ ኮዶን ዎታደርና ማቶናሳ ጋራ ጳውሎስ ይጌያይን ኤሳራዻን ጋራንቴ ኤያ ጋግን ብራያቤ ጋግን እምባቤም ጋይንም ኤሳርቴና ክዶ። ¹² ባርግንም ኦጎታር ካፓናንቴ ራቃ ካ ይንግዶር ጋግናሳ ዎይዻያ ባሺ ክዳድሞንታኻ፣ ዎግዶር ኤና ዼፕና ፍንቄ ሃንዻያ ራቃ ጋግና ይንግዶር ይዎያያም ዬስካንቴ ኦጎታር ካፓናንቴ ቃባንቴ ዎዬኤኻናንቴ ታክዲና፤ ራቃ ኣጋኻሞ ቀርጤስሳ ሃዮን ይዋይንባራና ክዶ። ¹³ ግባሮ ሾሊ ሃዮን ይዋንሳ ቾባራኻ ኮግባርሳዶን ዋዳንካ ኬቃባዳግያ ኮዳ ማይሻንቴ ጋግንሳ ጎርን ቡጫንቴ ቀርጤስ ዴሞን ዬዳንቴ ኬ ያእዲና። ¹⁴ ኮዶን ኣኻራ ጌጲ ካፕማ፣ ግባሮኖ ጌጶኖ ‘ሃዮን ይዋንሳ ጳባራቤ ሃዮን ይውታንቤሳ ባክሮ ግባርሳይኖ’ ሃንዻይኖ ጳ ጉርቴንባራኻ ዻጳንቴ ምጫ ኬዛራ ግባርስዲና። ¹⁵ ጋግኖኻሞ ቱልማይንካ ይእሽክማዶንታኻ ግባሮን ባሻንቴ ያኣናንቴ ቻላድማሞ፤ ኣጋታኻ ጋግኖ ዎጋራዃ ግባሮኖ ዎም ኩል ባኣቴ ያእዲና። ¹⁶ ዎቲህ ጉርታ ሾላ ቄዳ ሃንዻያኻ ማርማንቴ ሳጋንቴ፣ ጋግን ጌጶንሳ ጩማሮጎ ዻኻዻዳ ጋጋ ሾላም ጋላንቴ ዎቲህ ዻኣሽዲና፤ ¹⁷ ጋጋ ሾላም ጋግንዛራ ኣርሳንቴ ጋግኖ ኣን ኮጋሬኻናንቴ ጉፃንካ ኬ ሽር ዻክዲና፤ ሻምን ስርቲስ ሃንዻይንዛራ ቃልቴ ዻይማን ኬጋሬኻናንቴ ኩርትንዻንቴ ጋግንሳ ሻራን ዻባንቴ ጋግኖ ይዛጋዳዛራ ኮዬኤኻናንቴ ኬ ሃይዲና። ¹⁸ ቱልማይኖ ዎም ካልሎን ጌጲ ኮጋልንሻዶንታኻ፣ ዋጋላሞን ኮይሶን ጋግሮ ዶንም ኬ ኑንቆሮ ዻባን ካርስዲና፤ ¹⁹ ሮራ ማክንሳኻኻሞ፣ ጋግንሳ ኮይና ሻራን ዻኻይንቤ ኮሳይንቤም ኬ ኮሳንቴ ኛፓስንዛራ ዻብዲና። ²⁰ ሮሮ ጱፅካሞ ሃዮንቤ ኤዝንንቤም ሃፓዻድሞንታኻቤ፣ ግባሮኖ ዎዛራ ኮዋቻዻዃ፣ ዻቃና ዎዻቃይ ሃማንቴ ቃሞን ዎቁንፃዶኖ ፓይላ ዎኻላንካ ፔግንዽዲና።

²¹ ኤና ዳኣኖ እꬅማ ሮሮ ጱፅ ኬዎዻዃ፣ ጳውሎስ ኬሳ ባክሮ ዎያንቴ ይንታና ክያማዶ፦ “ዬቲህ ኤናቶ፣ ክሊማስ ዬናንቴ እጌያዳም እኒ ዬኤሳራዳና ቀርጤስባራ ዬቲህ ዻጵማሞ፣ጋሎን ኮቤ ካዮን ኮቤ እኒ ዬዛራ ዬስክማሞ። ²² ታኻሞ ሌምማቴ፤ ይካያያዳናኻሞ ጋግኖና ካያይኖ፣ ዬግዶር ኤዲ ካላኻሞ ጅማሞ። ²³ ኒ ሶታኻ እንታ ኤያ ክንታ እምስካያ ባርያ ይንእሳዳ ኤርጎን ኤያ እካላ ዎያንቴ፦ ²⁴ ‘ጳውሎስዮ፣ ሃኩርትንዽናኖ፤ ቄሳርሳ ዎትሮ ሃዎዬኻናንቴ ዛግሳና ኮዛግሳ፤ ኤና ሃላማ ይቴን ዳናምካሞ ባርያ ሃንካ ሃማንቴ ዻኣሽዲና’ ና ክያማዶ። ²⁵ ኣጋታኻ ዬቲህ ኤናቶ፣ ሌምማቴ! ኖ እናንቴ ክጌያዳግያ ኦጎንታ ኮያማይንም እንታ ኪም ኣምናና እኣምናይ። ²⁶ ይያማይንካሞ ግባሮንካ ጉርቴ ካላዛራ ቃልቴ ዎሳ ኬቅማኖ ሽዽማሞ።” ²⁷ ሶታ ታጲ ኦይዲሳኻ ኣድርያ ኛፓስሮ እስቤ ኦራቤ ሃምንቴ ጋልቴ ² ዎዳዃ ሶትንሳ ግዶ ጋልትቤ ግዶር ፔንካላ ይሳንሳዳና ኬማይሻዶ፤ ²⁸ ጉፃስ ኑንቆንሳ ፄራሞንም ዬክንሳያም ምጫ ኪም ዻባንቴ ኬሼዲና ኑንቆንሳ ፄራሞኖ ሜትር ኦይድታምግያ ኮዶንና ኬያፓዶ፤ ዋዳ ቶኻሳ ራስባራ ፕር ኬዬክንሲና ሜትር ማካንታምግያና ኮዶ። ²⁹ ሱንን ላማኻሞ ዳይማን ዎጋሬኻናንቴ ኩርትንዻንቴ ጋግንሳ ጎርና ኦይድናም ጋግንሳ ጩማንባራ ኬ ዻብዲና፤ ዎናንቴ ፔኖ ሶፅማሬ ሃምቴ ምስክቴና ኬዶ። ³⁰ ኤና ጋግን ቢራይናኻሞ ጋግንሳ ዎትባራ ጋግንሳ ጎርናም ዻባያግያ ሃያንቴ፣ ጋጋ ሾላም ሃንችሻንቴ ጋግን ጌጶሮኻ ያኣናንቴ ሃይዲና። ³¹ ጳውሎስ ዎታደርና ማቶናሳ ኤያ ጋራቤ ዎታደርናቤግያ፦ “ኤና ክና ኮታ ጋግሮ ኬዳድምና ዬቲካሞ ዻቃናንቴ ቻልማሞ” ና ክያማዶ። ³² ዋዳስ ኣጋኻ ዎታደርና ጉፃና ጋጋ ሾላም ዻኻዳናም ቱማንቴ ጋጋም ኛፓስንዛራ ኦጎታ ያይቴ ክሽዼኻናንቴ ሃይዲና።

³³ ፔንሳ ሶፅማ ኣፖ፣ ጳውሎስ ኤና ፓይላ ኬእꬅሜኻናንቴ ኬም ይንታ ሃማንቴ ምስክዲና፦ “ሮሮ ታጲ ኦይዲ ዎይላም ዬሳ ኮካያዃ ዳኣኖ እꬅማ ዳቆኻና ዬካፓዶ፤ ³⁴ ኣጋታኻ ዳኣኖ እሳንቴ ዛራ ዬሳም ዬዋችሼኻናንቴ እንታ ዬም ምስካና እምስካይ፤ ዬሳ ባክሮጎ ኤዲ ይንዛራ ዬር ዛርቦ ይዬስካያ ካላኻሞ ቆልማሞ።” ³⁵ እግናም ጌያንቴ፣ ባላሻን ቻንቴ ኬ ውልሳ ዎትሮ ባርያም ጎሻንቴ፤ ቁንፃንቴኻሞ እሳን ካርስዲና። ³⁶ ኬ ፓይላ ውልሳ ዎይላም ኮማታዃ ባላሻንም ይዻር ቻንቴ ኬ እሲዲና። ³⁷ ዎቲህ ኤና ጋግንሳ ኢሮ ዳናኻሞ ማቶ ላማቤ ሦጳታም ላቤና። ³⁸ ኬእሳንቴ ምሻንቴ ራስባራ ኬ ናሙቹሌናም ኑንቆሮ ጳባንቴ ጋግንሳ ዴፃሞን ሾልጲሽዲና።

³⁹ ፔኖ ኮሶፃናኻሞ ኬ ፔንካላ ይሳንሳዶን ዼሳዲማሞ፤ ኮዶንካሞ ኛፓስንሳ ማራሮ ጋይሊሚ ዹሊ ሃፓንቴ ጋግንም ይቃቴ ራቃ ኣጋዛራ ዬስክሳናንቴ ኬ ሃይዲና። ⁴⁰ ሃያንቴኻሞ ኬ ጋግንሳ ጎርናም ታኻንቴ ኛፓስሮ ጋርዲና፤ ዋዳ ኣጋኻ ይባይናሳ ጉፃናምካሞ ኬ ቡልዲና፤ ሻራን ጋግንሳ ዎቲሮን ዶን ግባሮንናንቴ ካች ሃያንቴ ራቃ ዹላ ኣጋዛራ ኬ ያኣን ካርስዲና። ⁴¹ ኮዶን ጋግኖ ሻምን ማላ ዻይማንቴ፣ ፔሮ ዬድንዽዲና፤ ኮሳ ዎትኖኻሞ ሻምሮ ኣርዳንቴ ውታዻን ጋርዲና፤ ኮሳ ጩማኖኻሞ ቱልማይንካ ዛርቦ ዻይምቴ ኣን ካርስዲና።

⁴² ዎታደርናኻሞ ዻክን ኤናሳ ኤዲ ካኻላሞ ዞታንቴ ዻቃናንቴ ኬያይና ዴሳናንቴ ቃብዲና። ⁴³ ኮዶን ዎታደርና ማቶናሳ ጋራ ጳውሎስ ክዻቄኻናንቴ ይዛጋዶንታኻ፣ ዬራ ይቃባዳም ኣሽካን ኬጋሬኻናንቴ ኬም ማርዲና፤ ኤና ዞትን ዼስዳና ጋግንባራኻ ጱላንቴ ብራንቴ ፔንዛራ ኬውቴኻቤ፣ ⁴⁴ ኬሳ ዋኒካሞ ሃቃን ላጳንካ ዎይካሞ ጋግንሳ ኣሞንካ ኬሳጌኻናንቴ ጌይዲና። ጎያ ኣጋኻ ኤና ፓይላ ውል ፃሊንካ ፔንዛራ ዬስክዲና።