1
1
ቴዎፍሎስ፣ ኢየሱስ ሃያናንቴቤ ታማርሳናንቴቤ ዋድማና ይካርሳዳናም ፓይላ እሳ ዋርቃታ ብራስሮ እንታ ሃናንቴ ኡክዲና፤
2
ኣጋኻሞ ኖ ሮራ ይንካ ክዻጳዳሳ ዬስካዛራ ኤና ካማንቴ ይእሳዳናናንቴ ኡስን ጋዛንካ ኣፓ ኬናንቴ ክጌያዳና።
3
ይሳ ጋሎንሳ ራስባራ ኖ ይዻር ኬዛራ ናዴ ሳዳንካ ይዶንም ኬናንቴ ጎይ ጱፅካ ዻውቴ ሮሮ ኦይዲታምሳ ኢር ሃዮ ሃዮኻ ኬናንቴ ሃፕንዽቴ ባርያ ማንግስትንሳ ዬር ኬናንቴ ጌይዲና።
4
ኖ ኬላማ ክንካ እꬅምቴ ዳርቃንቴ ዳንቴ ይንታ ሃማንቴ ኬም ኤልቅምዲና፦ “ኢየሩሳሌም ግዶርካ ዬውትናኖ፤ ኮዶን እንታ ዬናንቴ ዼላቅና እጌይካ ዬኤሳርዳናም፣ ዎምባ ይጌያዳ ኣፓም ካሊማቴ፤
5
ዮሃንስ ኑንቆንካና ክሻያዶ፣ ኮዶን ዬቲ ሮሮ ቶኻሳ ራስባራ ኡስን ጋዛንካ ሻይዻና ዬሻይዻይ።”
6
ኬኻሞ ፑጭንቴ ዳንቴ ክግያ፦ “ጌጳ፣ እስራኤል ማንግስትን ፕር ማሳንቴ ይንካ ሃዎይሳን ዋዳኖ ታው?” ሃማንቴ ኦይስዲና።
7
ኖኻሞ ኬግያ ይንታና ክያማዶ፦ “ባርያ ዎምባ ጌጳሞን ይኖንካ ዋዳስ ዎይካሞ ሮራ ክታኻዳም ዬዼሴኻናንቴ ዬናንቴ ጌይዻድማሞ፤
8
ኮዶን ኡስኖ ጋዛኖ ዬዛራ ኮያንቻን ዋዳንካ ካንታን ቻና ዬቻይ፤ ኢየሩሳሌምቤ ይሁዳቤ ሳማርያቤ ግዶር ፓይላ፣ ፔንሳ ማራንዛራ እሳ ማኚና ዬዳይ።”
9
ኖ ኣጋም ኬናንቴ ጌያንቴ ራስባራ ኬ ኪም ኬሼድካ ዞን ፖላንዛራ ዻጲዲና፤ ሉፕኖኻሞ ኬሳ ኣፕሮኻ ኪም ካይስዲና።
10
ኖ ዞን ክያኣዃ ኬ ፖላንዛራ ላዪ ሼድቴ ኬዳዃ፣ ኬኬንሽማ ኣፓላን ጫውልን ኣርሳዳና ኤዲ ላማ ናዴ ኬኻላ ዎይዲና፤
11
ይንታኻሞና ኬግያ ኬያማዶ፡- “ዬቲ ክና ገሊላ ኤና ዞን ፖላንዛራ ሼድቴ ኮታር ሃርናንቴ ዬዎያዴ? ኣጋ ዬኻላንካ ፖላንዛራ ክይካ ዬያፓዳ ኢየሱስ ኣጋንታ ፖላንዛራ ክይካ ዬያፓዳ ኣጋግያ ኣጋንታ ማታቴ ናኣና ክናኣይ።”
12
ሃያንቴኻሞ ኬ ደብረ ዘይት ሃንዻያ ጌማርታሮኻ ኢየሩሳሌምዛራ ማትዲና፤ ጌማርታ ኣጋኻሞ ኢየሩሳሌም ግዶርካ ኤዲ ካላ ኡኩንሳን ሮራ ጋላ ኪዬኤኻናንቴ
ጌይዻዳግያና ክፔግንዻይ።
13
ኬ ካታማስዛራ ይኣርዳዶን ዋዳንካ ኦኖን ይንግዶር ይዶንሳ ኦና ጳባራን ዳዛራ ውትዲና፤ እግናኻሞ፣ ጴጥሮስቤ፣ ዮሃንስቤ፣ ያእቆብቤ፣ እንድርያስቤ፣ ፊልጶስቤ፣ ቶማስቤ፣ በርተሎሜዎስቤ፣ ማትዮስቤ፣ እልፍዮስ ናሳ ያእቆብቤ፣ ፔን ይሳዛራ ዎዻያ ስምኦንቤ፣ ያእቆብ ናሳ ይሁዳቤና።
14
ኬ እግና ፓይላ ሜናኻሞ ኢየሱስ እንዳን ማርያምቤ እንዳን ናናቤ ላማ ክንካ ማታንቴ ዎይላም ካላኻ ዋቻዻንቴ ባርያም ምስክቴና ኬዶ።
15
ሮሮና እግና ግዶር ጴጥሮስ እንዳን ናና ማቶ ካላቤ ላማታምናቤሳ
ባክሮ ዎያንቴ፤
16
ይንታና ክያማዶ፦ “እንና ናናቶ፣ ኢየሱስም ኤና ዬዳይናም ኣንሳዳና ይሁዳሳ ኡስኖ ጋዛኖ ዳዊት ኣፖንካ ዋርቃትንሳ ብርሳንቴ ጌይዻዳ ኣፓ ክያሜኻናንቴ፤
17
ኖ ዎሳ ባክሮ ዳንቴ ዋድማን ኮም ዋድማናንቴ ዎግያ ባሊ ሃፕዲና።”
18
ኤያ ኣጋ ይሳ ዋድማን ዛርቦንካ ብሬን ክናንቴ ካሻዻዶንካ ፔ ሻንዲና፤ ኦጎታርካሞ ይሳ ዎትንካ ፔን ኡካንቴ ኢ ጳቃንቴ ክሳ ኢን ዬሮ ጳልን ውትዲና፤
19
ዬራ ኣጋኻሞ ኤና ኢየሩሳሌም ግዶር ዳናናንቴ ፓይላ ኤሳርምዲና፤ ፔያስ ሻንዻዳሳ ናብን ኣፖን ኬኖንካ ‘ኣኬልዳማ’ ሃማንቴ ግስንዽዲና፤ ክሳ ዎኻልኖኻሞ ‘ማኣስ ፔና’ ሃንዻዶ።
20
ጴጥሮስካሞ ጫግሻንቴ ይታና ክያማዶ፡-
“ዋርሳን ዋርቃትሮ ክግያ፣
‘ክሳ ራቅኖ ይንግዶር ክዳይኖ ጉሮ ኮዴ፤
ኤዲ ግዶር ዳያኻሞ ሃፓን ጋርዼ’ ሃያንቴኻሞ ፣
‘ጌጳሞን ክሳምካሞ ኤዲ ኣብ ኮቼ’ ሃማንቴ ኡካዽዲና።
21
ኣጋታኻ ጌጳ ኢየሱስ ዎሳ ባክሮ ራቅና ክኣርዳዳቤ ክያኣዳናቤ ፓይላ ግዶር ኤና ዎላማን ሮሮ ውል ዳናሳ ባክሮ ኤዲ ካላም ካምንቶ ዛግሳና ኮዛግሳይ፤
22
ኣጋኻሞ ኤዲ ዮሃንስ ኤናም ሻያን ክካርሳዶሮኻ ቻንቴ ኢየሱስ ዎኻላንካ ክያኣዳ ሮራዛራ ዎላማን ዳ ክዴ፤ ኦጎኖኻሞ ኤና ክናሳ ካላ ዎላማ ክንካ ኢየሱስ ዴምጲንባራ ክዻጳዶንሳ ማኚ ክዴኻናንቴ ኮዛግሳንታኻና።”
23
ኣጋታኻ ኢዮስጦስ ኬያማያም በርስያን ሃንዻዳ ዮሴፍቤ ማቲያስቤም ኬላማ ውልም ኬ ባእዲና።
24
ይንታ ሃማንቴኻሞ ኬ ምስክዲና፡- “ጌጳ፣ ያ ኤና ፓይላሳ ዎይላምን ዼስዲና፤ ኤና ክና ላማናሳ ባክሮ ኤያ ሃካማዳም ዎናንቴ ዻውማ፤
25
ይሁዳ ራቅን ይኖንዛራ ያኣናንቴ ዋድማን ክጋራዶንም ክኣሽኬኻናንቴቤ ኤዲ ይእሳዻዳ ክዴኻናንቴ ጌጲስማ።”
26
ሃያንቴኻሞ ኬናንቴ ኬ ቡኪ ዻባዲና፤ ቡካኻሞ ማቲያስዛራ ውትዲና፤ ኖኻሞ ኤና ይእሳዻዳና ታጲ ካላና ላማ ክንካ ፓይዳዽዲና።