ላንሳ 2ጢሞቴዎስ 2 አፓ

1 1. ታ ናንሲ ግሳ እሳ ያ ክርስቶስ ካንታንሳ ዋቻጵማ፡፡ 2 2. ኤና ናንቴ ኤጌይካ እካላ ሀኤሳርዶንም ኤና ኤና ዋኒ ናንቴ ጌየን ጴሳዳ ጴስ ድናናንቴ አፓን እምማ፡፡ 3 3. ክርስቶስሳ ዋድማ ኤድ ግየ ዎላማ ጋልማ፡፡ 4 4. ኤድ ዎታደር ኤድ ጌጳ ዩሳም ዋዝንሳንቴና ክአሸካይ ዋድማን ዋድማ አብ አሽክማሞ፡፡ 5 5. አጋንታሞ ኤያ ጐባን ጐባያ ጐባን ዳንብካ ልኪ ዩጐባድምና ቤሬዬር ክያፓያ ቆልማሞ፡፡ 6 6. ኤያ ፓሀላስ ሀምን ፓሀያ እስን ሀፓናንቴ ብራንቴና ክዳይ፡፡ 7 7. እንታ ሀናንቴ እጌየያም ዛሊ ኤሳርማ ጌጰ ባሪያ ዬር ውልካ ሀናንቴ ቃቦን እማናክ እማይ፡፡ 8 8. ዴንጵንባራ ጳጳዳ ዳዊት ቢዛን ባራ ናአዳ የሱስ ክርስቶስም ቃብማ አፓ፣ እሳሞ ካና፡፡ 9 9. ዬራ አጋናንቴ ሀሞ ኤድ ዬር ሴሳዳ ግያ ጳሀጰቴ ጋሎ ሀኘቴና እዶ ባሪያሳ አፖን ጴላቅኖ ጳሪጳማሞ፡፡ 10 10. አጋታሀ ክርስቶስ የሱስ ባራ ዶን ጳአሾን ጐሽን ጌጶን ሀፓጳን ማሌ ኬሀሞ ኬሀፔሀናንቴ ኤና ባሪያ ዛራ ማታይናናንቴ ሀማንቴ ዬርውልካ ጋሎም ዶንሻና እዶንሻይ፡፡ 11 11. ዩንታ ሀማንቴ ዋርቃትን ብራሮ ጌይጳዳ አፓ ጐንጴና ክላማ ዎጅና ክላማ ጥር ሳዳንካ ዳና ዎዳይን፡፡ 12 12. ላይህ ዋቻጳንቴ ዎዳና ክላማ ኘር ውቲ ጌጳጴና ዎጌጳጳይ ኪም ዎጋርና፣ ኖኘር ዎም ጋራና ክጋራይ፣ 13 13. ራቃሮ ጐንጴ ማታንቴ ዎዳድምና፣ ኖ ላይህ ጐንጸ ይዳዛራና ክዳይ፣ ዩም ኖ ዋልማሞ፡፡ 14 14. ዬራ ክናሳ አፓም ክናንቴ ጌያባራሀ ሀማትናኖ ዬር ቆልማ ጴላቃን ኬጋሬ ባሪያስ ዎትሮ ኬም ክልማ፣ ዬር ኦጐኖ ሱን ሀማ ኤና ኤሳራይናም ሴሳያና፡፡ 15 15. ቦክንጶ ቆልማ ባሪያሳ አፖን ጐንጴን ጌየያ ግያ ኤናሳ ዎትሮ ክሳ ፃለሞን ደንሳ ጌይጳያ ኤድ ግያ ሀም ባሪያናንቴ እማ ናንቴ ዋቻጵማ፡፡ 16 16. ባሪያም ዬር ጐሸሽማ ጴላቅ አፖ ሀሳዋ ሱን ሀማሀላ ፔግንጵማ ዬር ኦጐሀ ኤና ዬጽማ ድና ባሪያ በራ ፔግንጳዳቴና ኬያአይ፡፡ 17 17. አፖኖ ኬጌያይኖ ኬሳ ሁጅሚ ፓሽማ ያ ዎራ ጳዳቴና ኮያአይ ኤና ዩንታ ሀምና ግዶር ዳና ኤና ሄሜኔ ዎስቤ ፈልጦስቤና ዳና፡፡ 18 18. ኤና እግና ዬር ጐንጴን ካላ ፔግንጳንቴ ሴንን ያያደናና፡፡ ኬ ኤና እግና ኤና አና ጀዳና አና ጳጵድና ሀንቴ ኤና ዋንሳ ካንታንና ኬዴሳይ፡፡ 19 19. ኮዶን ካሞ ጌጰ ባሪያ ኤና ዩናም ጰስድና ኘርካሞ ባሪያሳ ናብን ግስማያ ኤድ ፓይላ ዬር ሴሶ ባራ ክፔ ግንጴ ሀንጳዳ ማይህ ሀማ ጁግማ ባሪያሳ አፓ ጴላቅ ማይህ ዎይሳጵና፡፡ 20 20. ኦኖ ካላ ግዶር ኮይሶ ወርቄሀ አሽካጳቤ ኮይሶ ሱን ሀማ ሳጐ እማሞ ደይኖ ሀቀሀ አሸካጳቤ ዱኒካ አሽካጳ ኮይሶ ክንካ ዳና ኬዳይ፡፡ ኤግዶር ዋኒ ዬር ጌጲ አሽካያ ጋንትና ዋኒ ኬሳ ዬር ሱን ሀማ ጋንት ናንቴና ኬዳይ፡፡ 21 21. ታናንሲ ኤድ ሀውካሞ ዬራ ክና እጌየዳና ግዶሪካ ዩም ዋና ዶያና ዋድማ ጌጵናንቴ ዋናዳ ባሪያ ናንቴ አጋ ዋድማ ፃል ውል ናንቴ አስካጳ ኮይሶና ክማታይ፡፡ 22 22. ባርሻሞን ቃቦን ዛርቦን ባራ ፔጌ ደሣ ዎይላምን ጫንቃል ሀሞነካ ኤና ባሪያም ግስማይና ማላ ጋዛሞን፣ ባሪያ ማላ ዴንተን፣ ናሽማሞን ፃላሞን ጫግማ፡፡ 23 23. ጴላቅን ሱን ሀሞን ዬርን ዩአሽክሞን ባራ ጌጌ ዳማ አጋሀሞ ሀናቴ ዬራ እግና ዋጭን ኬጳሳይን የ ጴስድና፡፡ 24 24. ባሪያሳ ዋድማን ኤያ ኡሮን ዳማሞ አጋናንቴ ኤድ ውል ናንቴ ባሺ ዳያ ኤና ታማሪሳ ናንቴ ቻላይ ዬር ዛርባም ካሞ ድንሻያና ክዳይ፣ 25 25. ባሪያ ዛራ ኬማቴሀ ናንቴ ባሪያ ኬናንቴ ዎይላም እማናኬእማይ ሀማንቴ ቃላንቴ ኤና ኪም ናሽምናም አፖ ፃልካ ኬም ማሳያ ክዴ፡፡ 26 26. አጋ ሀም ዩሳ ቃቦና ዛራ ኬ ቤሬ ማታና ኬማታይ ክስ ዋድማን ኬአሽኬ ሀማንቴ ኬም ዬዳዳ ሜሻሳ ዛንንባራ ጳቃና ኬጳቃይ ሀማንቴና፡፡