1 1. ታ ናንሲ ክርስቶስ ዛራን ዩኖንካ ጋሎን ክያፓዶንታሀ ይትካሞ ቃባ ካሀ ጳክጳንቴ ጳጳማቴ፣ ኦጋ ክሳ ዛራን ይሳሀ ጋሎን ሀፓያ ኤያ ሴሶን ጋርድና፡፡ 2 2. ዬራ አጋሀካሞ ሀማንቴ ታናንሲ ፔን ዴንታሮ ዩሳ ባሪያሳ አፓንካና ክዳይ ቃቦን ኤድን ጋይንሳ ዳማሞ፡፡ 3 3. ኤና ሱንን ዳና ኬሀያያግየ ሜ ጫግንቶሀ፣ ዋ ቃቦሀ፣ ባሪየሞሀ፣ ዋርሳ ክርባሀሱን ውጮን ኮሳ ጳባራ ውጭቴ ዬርን ሜሽን ጐይን ዛርቦንካ ዬዳዶን ቦንኖ ሣጋዶኖ ዬክድና፡፡ 4 4. ዬሪን ኦጐ ዴንታን ዛርቦንካ ኬላማ ዬክጰማታሀ ኬናንቴ ዬር ዋና ኮማታኗ ዬር እራና ኬእራይ፡፡ 5 5. ኦጐንታ ኮዶን ኤና አኘንካ ደናቤ ኤና ጃዳና ኬዛራ ብተን ታሀናንቴ ዳናንቴ አፓን ክናንቴ ማሳና ኬማሳይ፡፡ 6 6. ባሪያስ አፖኖ ኤና አና ጃዳና ናንቴ ካውል ጌይጳ ዶኖ ጐያ ካሀና አጋታሀ ኬዛራ ኤን ውለ ጋንታ ግያ ብቶ ታሀናታሀ ጳይ ባሪያስ ካንታንካ ባሪያሳ ቃቦንካና ኬዳይ፡፡ 7 7. ዬር ውልሳ ቱንስኖ ሳንድና አጋታሀ ባሪያም ምሥካናንቴ ዬቻሌሀ ናንቴ ሜቴ ፓክ ሀማ ዬሳ ኮዴ ዬመ ካሞ ማንካይና ዳማቴ፡፡ 8 8. ናሽማ ሴሶ ጱፅና ኮክጨይ ዬር ውልሳ ጳባራ ኪም ጐንጴሀ ናሽማቶ፣ 9 9. ክንካ ጐንድማ ኪም ቾችንሽማቴ፡፡ 10 10. ባሪያሀ ሀማንቴ ዋድማን እንጳዶንካ ዩቲ ፓይላ ባሪያሳ ዬናንቴ እጳዶን ዋድማንሳ ኤያ ዋናንቴ ክዋድሜ፣ 11 11. ዬግዶር ኤያ አፓን ጌየያ ባሪያ ቃቦንካ ክጌዬ፣ ኤያ ዋድማያ ሀሞ ባሪያሳ እንጳን ካንታንካ ክዋድማ፣ አጋ ባሪየ የሱስ ክርስቶስካ ክጐሻ ጴሀና ጐስቤ ካንታቤ ክናንቴ ላይ ላይ ዛራ ኮዴ አሜን፡፡ 12 12. ሀርናቶ ኖ ግያ ኮቃያ ካሎ ካንታ ዬዛራ ኮዬስካዶን ዬር ሀሊ ዬዛራ ኮዬስካዳግያ ማይሻንቴ ዬር ዋና ዬናንቴ ማታና፤ 13 13. ኦጐንታ ኮዶን ባሪያሳ ጌጳሞኖ ኮዬስክና ዋዛኖ ዬሳ ጌጲ ኮማቴሀ ናንቴ ክርስቶስ ጋሎንሳ ጋሎ ኤድ የማታ ዶንታሀ ዋዛ ደማቴ፡፡ 14 14. ክርስቶስ ናብንሳ ሀማንቴ ዬም እራጵና ጐሻ ጶኖ ካንታኖ ባሪያሳ ካንታኖ ዬዛራ ኮናአይንታሀ ዩቲ ጐሻ ጳናና፤ 15 15. ዬግዶር ኤያ ጋሎን ሀፓያ ኤድ ዴሳንቴ ወይ ዲባ ማታንቴ ወይ ዬር ሌሳንቴ ወይ ኤድ ዬር ግደር ሱን አርዳንቴ ጋላን ክጋሬ፡፡ 16 16. ባሪያሀ ዳንቴ ጋሎ ክዛራ ኮዬሳክና ናባ አጋ ናንቴ ባርያም ክጐሼ ቦክንጳን ክጌሬ፡፡ 17 17. ብቶን ታሀኖ ባሪዮን ኦኖሮሀ ኮካርሳዶን ሮሮኖሳንድና ታናንሲ ብቶን ታሀኖ ዎንካ ኮካርሳያዳና ባሪያሳ አፓናንቴ ኤኤ ሀምምና ቱንስኖ ኬሳ ሀር ኮማቴ? 18 18. ናንሲ ኤያ ባሪዮን ኤያ ክጳቃይኖ ጋሎሀ ኮዳና ጋሮን ኤናቤ ሴሶን ኤናቤ ጋይኖ ሀሞንታ ኮማቴ? 19 19. አጋታሀ ባሪያ ቃቦንካ ኤና ጋላይና ፓይላ ሳዳን ዩሳም ጐንጳ ባሪያ ናንቴ እማንቴ ዋድማን ፃልን ሀያንካ ኬዴ፡፡