ቆሮንቶስ ኡኩንሣ 2

1 እናናቶ የካለ እናአደ ሮራካ ባርያሣቃቦም የናንቴ ወርሐያንቴ እያሣዎን ሐሣዎን ፃሊ ሐያንቴ ሐማምካ እጰዎናንቴ ሐማንቴ እንታንማም፡፡ 2 ባኪሮ የሣደም ኢየሱስ ክርስቶስ አጋ የናንቴ ዝታጰደ አጋ ኖሦጎና እንታ አብ ጴሣናንቴ ዛግማም ሐማንቴ ታካንቴና እደ፡፡ 3 ኮሆ የዛራ እናአደንቃጃቤ ኩርትምቤካና አናአደ ሐያንቴ ካም ኩርታም ጴፋካና ግባዝቴ እደ፡፡ 4 አፎኖ ወሐሣዎደኖካም ባርያሣ ካንታኖ ዎናንቴ ከሐፋንጰካናንቴና ሐንጲና ታይስ አፎ ሐማካ ጌደጰያ ደድማም፡፡ 5 ኮኖ ዎምሰካይኖ ባርያሣ ካንታካ ሐማንቴና ሐንጲና ኤድ ናሦሣ ሐማካ ሐማንቴ አሸካደ የርዛራ ትማም፡፡ 6 ኤና ቀበንሣ ኡሸዳናዎሣባኪሮ ደናሣና የርምዎጌያዶ ሐያንቴካ ፌንኮሣ ሐማትማ ሐያንቴ ካም ካያናቴ ደን ፌንከሣ ጌጵናሣ ሐማምንትማም፡፡ 7 የርካካካ ፉር ካያንቴ ደኖ ባርያሣቃቦኖ ሐመምካና ሐማ አጎም ባር አንብርካዎሣ ጎሽናቴ ሐማንቴ ብርካ ቃባንቴ ኪደ፡፡ 8 ፌን ኮም ሸናደና ኤናሣ ዎን ሐማምንኮም ቀባድማ አንካላ ይጰሣደና ባርያ ጌጰካም ዝትማም፡፡ 9 ይንታካ ከደናካ ውት ፃፋጰደን አፋካም ሐፋድም ቃምካካም ውት ኤሣርድማም ኤድናሦሣ ወይላምካ ቃባጰምን የርን ባርያ ይም ጫጋደናናቴና ቀባንቴ ኪደ፡፡ 10 ባርያካም ኮም ኡስንደሣካ ሐማንቴ ወናንቴ አና ብሮካ ጳውስድና ባርያሣ ካንታኖ የርም ፃሊ ሐያንቴ የርካለካም ሽጰን ኮጋሬካናንቴ ፋይለ ከሼዳደ፡፡ 11 ይሣ ኤሮንደናሣ አባራ ካንታን ዶኖንሣ አብ ኤድሦሣ ባኪሮ ካለካላሣ ኤደድሣ ቃቦ ጴሣንቴ ደሀ ሀውጤ አጎንታካም ኮደካካም ባርያሣ ካንታንሣ አባራቃበኪሣም ጴሣደ ኤድ ካለካም ቆሊማም፡፡ 12 ባርያባራ ደን ካንታንና ወሼደይ ፌንከሣ ካንታን ውት ጫግማም ኮሆ ባርያሣ ዎናንቴ እንጰደን ዎጴሣደን ካሐማንቴና ዎደ፡፡ 13 ውት ዎጴላቃይኖ ኪና ኬና ኤድ ናሦሣ ሐማምካ ሐሣውጰደ ቃቦትማም ባርያሣ ካታንባከራካ ወታማራደናምና ዎሐሣዎይ ባርያሣ ካንታንካ ሐማንቴ ጎንጴና ዎጌያደና ባርያሣ ካንተንካና ከደደ፡፡ 14 ባርያባራ ደድማኤድ ባርያሣ ካንታንባራ ደን የርናም ቻናቴ ደንደይማም አጎኖ ይንታ ኪካለ ሐንጰይኖ ኪካላ ማሊግንታ ምና አጎኖ ባርያሣ ካንታንካ ሼደጰይኖ ኪናንቴ አርድማም፡፡ 15 ኤያ ባርያ ለማ ኪንካንደስ የር ውሊምና ፃሊ ሐያንቴ ኪሼደይ ይምካም ማሣቴ ፃሊ ሼድማም፡፡ 16 ኪታማርሰደንካ ሐማንቴ ባርያ ጌጰሣ አንቆም ኤድካለካም ጴስማም ውት ፍር ኢየሱስ ክርስቶስሣ ወይለምኖ ወለማንኪንካ ደይድና፡፡