1 ኧጎይታ አገልጋይ እእየሱስ ክርስቶሲ ኪኢሸረኘ ኧኸርሁ በጎይታ ኧትቬጠርሁ ብእምነት ኧኸረ ኧዉረ ኧኸረ ይማኖት ይሆሩዋኸ ኤቪ ኧትሾሙሁ ጳዉሎስንሁ ። 2 እም ሃይማኖት ዘላለም አያ በኸረ ተስፋ ባትሸከቨንረ ኧቆቁት ኤኖወ ጎ ይታ ኧዘላለም አያ ዬቨንሬ ተሮኦራ ዘቨር ኢፍቲ ቃር ገፓንረ ። 3 ወቅትኋበሰንአ ግዚየ ጎይታ በቃርኋ ኤኤደን እም ቃር ኢያ ባአደራ አዉኝ ባተነፈንረ በጎይታ እዝዝ ቃርኋ ኢኢድ ። 4 እንመንራ በኸረ እምነት ኧዉረ ኧችኛ ኧኸረ ቲቶ ታአቭቪ ተጎይታ ኢናቭ ታተነፈንረ ተኢየሱስ ክርስቶስቭ አጋዪ ወገሬትቭ አኸ ኧህር ። 5 አኸቭ በቀርጤስ ገኘ ኧቸኧከ ሁዳ አንትጌኴሩዋ ዘንጋ ኤኤድ ኤኤዲ ታጠጥነኸ ፤ ኤኤዘዝከመኸ ኧቤተ ክርስቲያን አላፊ በከተማ እንእ ትሾሙነኸ ። 6 ኧቬተ ክርስቲያን አላፊ አታአር አዪኢጅኰ ፤እእማት ምሽት ምስ ኧኸረ አአር ዴንጋኋ አንቌጫድ በሁርት ዌ ባንታአዘዥትሁኖዋ አያቁዎጩዋ አአር ፤በክርስቶስ አአሞሩዋ አአር ኧሁሩዋ ። 7 ኧቤተ ክርስቲያን አላፊ ኧጎይታ ሜና ባአደራ ኢቴኤፐሪ ኧኸሬ አያትቄንጥ አአር ኧሁርት አኖወ ፤እመኸቭ አይትጋኬዝ አአር እማት ኢያ ሱቩኦኝ አይቭር አአር ፥አይቨኧች አአር ፥አይሰህር አአር አይትጭቃጨቅ አአር ኧዋጋ ዘግዘግ አይቭር አአር ኧሁርት አኖወ። 8 ኢረእካሞኋ ባዘራ ኢቴኤፐርካ አአር ወሄ ኧኸረ ዘንጋ ኢረምድካ አአር ፥ይቬስርካ አአር ፥ወሄ ቅዱስ ጩፑ አአር ኧሁርት አኖወ ። 9 ኤኛሞሁኖዋ ኧዉረ በኸረ ትምርት ባትሞርት ይቨህሪ ብእም እምነት ኢትራኮሽታ ሰቭ ጌኪተ መልስ ኧዣዉርት ኢኸነኸ በትማረን ትምርትኋ ያትመረኸ በትማረን ትምርት ተቁማሞረ ኢትሸከካአአር ኣህር ። 10 ኢረእካሞኋ አይሁድ ኧሆሩዋ አይታአዘዡዋ እምኧኸ ኢልፎሉፉታ ኖኦራ ሰቭ አኖዉዋ። 11 ዋ ሰቭ ቁስ አቶፑት ያትኬሽ ኧቭር ቢዩሪ ቢያቅቨጭካ አአር ኧዋጋ ዘግዘግ በዋርት አአሰት ትምርት ባትሞርት አበሩስ እንእ ኢትራከሰኸ ዪንኦዋ ። 12 ተሁኖም አት ኧገግሁኖዋ ነቢ ኧኸረ ምስ«ኧቀርጤስ እንእ ግዚየ ኤነ አአር ኢኢጁዋታ ኧዉሼእ ኧድቭር አዊኸ ቡሼኧኸር ገግህኖዋ ኢረሙጅታ ሰቭኖዋ ባረ ። 13 እም ኢኢጂዳ ዘንጋ ዉረምን ፤ባቴ ሁኖም ብእምነትሁኖዋ ወሄ አአር ኢሆሩዋመኸ ገክር ማአችዎ። 14 ኧይሁዳ ሰቭ ዠረይ ኧኸረ ቃር ባይሶኦዋይ ኧዉረ አአር ኧቆጩዋ ሰቭይ ምኽር ባይቴኤፖሩዋይ ገክር ዉቅስታ ምኽርኮዋ ። 15 ኧጥርር ሰቭ እንእ ዘንጋ ጥርርን ፤ኧሰነኸ አአር ዬዉታ ሰቭ ጭን ጥርር ኧኸረ አአር አታአር ኤነዳ ፤አቸሞኃ እእንቨሁኖዋይ ቀረብሁኖዋ ኧሰነኸዳን አአር ። 16 «ጎይታ ንሂርኔ ዩሩዋ ዘጋኋ ጭን በቬናሁኖዋ ኢሆጄ ቀቨጥ አይቫር አይቴኤዘዡዋ ወሄ ሜና ኦንኧት አይኸኖዋ ሰቭኖዋ።