¹ ኧጎይታ ትከ ኢየሱስ ክርስቶስ ወኼ ዋራይ ይቆርሽኮዳ ² በነቢ ኢሳያስ መጣ « መያ ይጤርካ ኪሸረፕኛ ታኸ ኢፊቲ ኤኬሽኪ ³ ሁድቭ « ኧጎይታ ሜያ እጣውርዋ ዋአድኮኋ ጎኩርዋ ባረ በቨረሀ ያኸራካ ሰቨ ቃርን »ቧርሙ ኧጣፊይ አአር ባንደ ። ⁴ በኽም ኧቫአ ያጠምካ ዮሐንስ « ባጢራሁዋ አፍ ይኩዋይ በጎይታ ኢፍቲ ንሰሃ ጉኦም ተጠመቁዋ »ባረ በቨረሃ አዋጅ ቲቭር ማአ ። ⁵ ኧአይሁድ ገኝ ሰቨ እንእ ኢኢየሩሳሌም ሰቨ እንእ ጀፖርምታ ዎርሙ ባጢርሁኖዋ በጎይታ ኢፊቲ ቲትራዘዝዋ በዮርዳኖስ እሃ በዮሕንሲ ኧጅ ይጠመቁዋ ባንደ ። ⁶ ዮሐንስ ተጋሜራ ድገር ኤፐዊ ውጅር ተኸተረ ናቫኋ በጠፍር ታአከደ ኧበረሃ ውየ እጉረቬናቭ ይቨራ ባንደ ። ⁷ ሁድቭ ይኢድኩ ኧረፐረአዋጅ «ኧጫማኋ ያአጉጅኮዳ ክር ስን ሙግ ባይተሁ ዓፈዳኔ አይትቨቃያአር ቲያ ይረካ አአር ቲያ ኢኢ ይቫአኬ ፥ ⁸ ኢያ ብእሃ አጠምቅሁዋ ሁዳ ጭን በመንፈስ ቅድስ ያጠምቅሁዋቴ » ይርእካ አአር ባንደ ። ⁹ በሀ ግዚየ ተገሊላ ገኝ ተናዝሪት ከተማ ማአታበዮርዳኖስ እሃ በዮሐንስ ኧጅ ተጠመቀ ። ¹⁰ ኢየሱስ ትእሃ ተዋአመኸ ሰማይ ተከፈተደታ መንፈስ ቅዱስ ቡናር መሰረ በፎርኋ ቲወትካ አሸ ። ¹¹ « ኧረድኸዳ ትከኛ አኸተ ባኸቭ ይሽሬ »ይቭርካ ቃር ተሰቫይ ተጎይታይ ተሰማ። ¹² ህመጋ መንፈስ ቅዱስ ኧቨረሃኒየ ኤፐ ወሰደን ¹³ በህሜ በቨረሃ በሴጣን ቲትፈተን አርቫአ ቀረ ኤኮሰ ።ተቨራ አዊ እማትሜ ቲይረቨር መላአይካቭ ያጌኪሪ ባንደ ። ¹⁴ ዮሐንስ ጠቦጪታ ባአኮጂ ቀጥወ ተጎይታይ እአቫአ ወሄ ዋራይ ቲይኢድ ገሊላ ዩሪዳ ገኝ ወረታ ¹⁵ ግዚየኋ ሰንአ ኧጎይታ መንግስት ማአ ሰንአ ባጢራሁዋ በጎይታ ኢፍቲ ኦኦም ንሳሃ ጉኦዋ ብእም ወንጌል ኦዎርዋ »ቲይር ይኢድ ባንደ ። ¹⁶ ተህም ቀጥወ ኢየሱስ በገሊላ ባር ሞሬ ቲያርካ ስሞኦንቪ ኧስምመኋ እንድሪያስ ዓሳኢጠጭዋ ኧረፐሬ ኧኸሬ ዓሳ ኢጠጭኮዳ ሽካ ኧቫሪ ኤፖም ቲቋሽታ አሽኖም ¹⁷ ኢየሱስ የሁዋ ተሆተርኝ ሰቨ ተቫጢርሁኖዋ ትዥፕርዋኸ ኧናሁዋሴ ባረኒም ። ¹⁸ ሁኖም ህመጋ ዓሳ እጠጭኮዳ ሽካሁኖዋ ቃሸውምታ ቴኼተሪ ። ¹⁹ ቀሪም ኤኤዲ ተወረ ቀጥወ ኧዘብዴዎስ ኧች ያዕቆብቪ ኧሳምመኋ ዮሐንስቭ ብእንሲየ መርከብ ቸኧኖምታ ዓሳ ያጠጭኮዳ ሽካሁኖዋ ያጣውርዋ ባንደ ። ²⁰ ኢየሱስቭ አሽኖምታ ህመጋ ኸናኖም ። ሁኖም አባሁኖዋ ዘብዴዎስ ተቬነኘመኋ በመርከብ ሁዳ ፎር ቼኤዊታ ኢኢየሱስ ቴሃተርሙ ዎርም ። ²¹ ተህም ቀጥወ ቅፍርናሆም ዩሪዳ ኤኤዲ ወርሙ ኢየሱስብ ህመጋ በሰንበት አአይሁድ ኧጠሎት ቢድ ገፓታ አትሞርት ቀነሰ ፤ ²² ቲያትመርካ አአይሁድ ቂጭ አስተማሪየኸ ተይኸርቭ ዳኝነድ አነንዳ ሰቨኸ ኧረፐሬ ኧከሬ ኧሶሜ ሁኖዋ እንእ ወግ ይኸርወዋ ባንደ ። ²³ በኽም ግዚየ ቢደሞችኮዳ ቢድ ኧረፐረ አት ሴጣን ኧጠበጠን ምስ ዋኸ ቲይር አኸና፥ ²⁴ «ኧናዝሪት ኢየሱሰ አኸ ቲያ ምር አነነኸ ታአፋንሬ ማአኸይ? ኢያ አኸ ማን ኧኸርኸኸ ኤሂር አኸ ኧጎይታ ኧይቀደስኸ »ባረ ። ²⁵ ኢየሱስብ ቁስ ባር ግፍርኩታ ሆር ባረ አጥራቆረን ። ²⁶ ሴጣንቭ ሁዳ ኧቭስ ሁዳ አተገ ኖኦራአበጥቨጠቨን ቀጥወ በሩኡየ ቃር ኮ ባረታ ገፈረን ወረ ። ²⁷ ሰቨ እንእ ዋ ዘንጋ ምራፈድን? ምይነትን ወያ ትምርትን ። ኧሴጣን ስን ይኢዝዝ ሁኖም ኢታአዘዥነ ቧርሙ ወግ ኧረዎምታ ገግ ትገግመሁኖዋ ኢጮጅዋ ባንደ ። ²⁸ ህም ግዚየ ኢኢየሱስ ዋራይ በገሊላ ገኝ ተሰማአ ። ²⁹ ህመጋ አይሁድ ቲደመጅኮዳ ቢድ ተዋአመኸ ተያዕቆብቪ ተዮሐንስቭ ኧሰምኦንይ ኢኢድሪያስሜ ቢድ ጎፖም ። ³⁰ በቪድ ከስ ኧስሞኦኒ አቫቸድ ሚሲየሻ ሜኬረችታ ተገተረች ባንደ ።ሂድቭ ኤኤመናኸ ህመጋ ኤኤጂ ። ³¹ ተኽም ኧትረሳ ኧትገተረቸ ኤኤዲ ወረታ ኧጅሻ ጠበጠታ ነሳና ።ትቬክር ኧረፐረ ቼኤናታ ተረሳች አቫዘረችኖም ። ³² አየድ ወይአታ በቨሸጋ ኧቃያኋ ሰቭ ኤኤመኖሚ ባአሽ ኧጠበጠነዋ ሰቨ እንእ ኧሁዳይ በቾም አዎአዮም። ³³ ኧከተማኋ ሰቨ እንእ በወረጀ ቁጥ ቧርሙ ባንደ ። ³⁴ ኢየሱስቭ በሮኦራ ባአሽ ኧትጠቦጭዋ ሰቭ እንእ አፊያ ኤፐ ኖኦራቭ ሴጣን አዋአ ዘንጋኋ ጭን ሴጣን ሁኖዋ ማን ኧኸረኸ ኢሂሪ ኧረፐሬ ኣኸሬ ኢዝረኩዋይ አናቨኖታ ³⁵ ሱቢ እረርኧ ገና አየድ ታይዋአ ኢየሱስ ተረሳ ተቪድ ዋአታ አት ሰቨ ኤነወ ኤኤዲወረ ጠሎት ይንአ ባንደ ። ³⁶ ስሞኦን ትቬሻሞኋ እማትሜ ኢኢየሱሲሰ ኢሱኢ ዎርሙ ። ³⁷ በረከዊመጋ ሰቭ እንእ አኸ ኢስኸ ቢ ። ³⁸ ኢያ ኧቫአሁ ኧጎይታ ቃር ኢኢዲ ኧኸሬ «ኧሰቨ ኧጎይታ ቃር ኒኢድኔ ኧቪየምንራይ አነውታ ቃያ እማትሜ ንሆርነ ባረኖም ። ³⁹ አይሁድ ቢደምችኮዳ በጠሎት ብድሞሁኖዋ ቲጋአ ኣጎይታ ቃር ትእድቪሴጣንቭ ቲያዋአ ገሊላ ቢዩሪዳ ገኝ እንእ ውርውር ይቭር ባንደ ⁴⁰ አት ኧጎጋ ባሸ ኧጠበጠን ምስ ኢኢየሱስ በኧግርኋ ወተኧ ቢሽርኸ ታተርፈይ ኢኸነኸባረታ ሳአረን ። ⁴¹ ኢየሱስቭ አትቫጠጠንታ ኧጅኋ ዝራካ ሙሻሸንታ ትተርፊ «ኢሽሬ ትረፍ ባረን » ⁴² ምስቭ ሁዳ ኧገግኋ ባአሽኋ ገፈረን ህመጋ ገፈረን ። ⁴³ ኢየሱስቭ ኧምስሁዳ ቲያስራብትኩዳ « ኢያ አተነፍከኸ አአትሞኋ ሰቨ እኔኤድኸ ዘንጋኋ ጭን እማት ኧካሃናት አተዥ ⁴⁴ ኧተንፍኸመኸ ኧሰቨ እንእ ምስክር ኢኸረኸ ሙሴ ኤኤዘዘን ህትቭ ኧጎይታ አተኧንቭ »ባረታ አጬፐን ። ⁴⁵ ቢኸር ጭን ምስሁዳ ተሀአ ይ ዋአታ ዋ ዋራይ እንወኋ ቲያር ቲያር አአውጅት ቀነሰ ፥ተህም ኧትረሳ ኢየሱስ ሰቨ ቲያዥኩ ማንኝእ ከተማ ኢጋአይ አንቴፐነዳ ቢኸር ጭን ሰቻ ዋአታ ሰቨ ቤነወ ኤኤዲ ይረቭር ባንደ ፥ሰቭቭ ቴኤድ ኤኤዲኧሁዳይ ይዎኦዋ ባንደ ።