¹ በህም ግዚየ በሮኦራ ሁብ ኢትቬዘርታ ሰቭ ተደሞጁም፤ ኖኦራ አአር ተሁርትሞሁኖዋ ኧትረሳ ገግተገግሞሁኖዋ በትጋፎት አትሁዳ ባአት ሁዳ ፎር ኢድራደሩዋ ባንደ ፤ኢየሱስቭ በተረታ ኧተማሪኋ «ተፈሪሳ ሰቪ እርሾ ተጠፑዋ ኸጥንድ አይበርቨሁዋ ኧዋርትነኛ ። ² ቢኸርቭ ኧቴኤፈ አይትከፈድ ኧትደኧረ አይትሄር አአር አታአር ኤንዳ ፤ ³ ህመኸ ኸረሜ በቭሳአረ በተነቫ ትትጮጂዳ ሁዳ እንእ በዋአና ቡኡዋየ ኢትሰምአኬ ፤በወቀ ኧዝሬኲዴ። ⁴ «አሁዋ አቦጎዳኞ ኢኢድሁዋ ዋ በሰር ዮኦትራት ተሃአ ኤኛ አአር አይኸኖዋ ሰቭ አትፍረዉዋ ። ⁵ ኢያ ጭን ትፎሪዳ ሁዳ አቲሽሁዋቴ፤ተኧተረ ቀጥወ ባአዛብ እሳድ ኢቃሺ ደረግ አነነዳ እግዜር ፍረዉዋ ኧዉረመኛ እቭሁዋ ኣሁዳ ፍረዉዋ ፤ ⁶ አምእስት አፉ ብእማት ፈራክ ያስረዮዋሽ አኸረዳ ? እግዜር ተሁኖዋ አት ሁዳ ዳር አይተረሳኩዳ ። ⁷ አሁዋይ ኧጉንኧራሁዋ ድገር ዳር አአንዳ ኤኤድኋይ ሜዘሪ ፤አካ እፈኘሁዋ ተሮኦራ አፉ አሁዋ ትረኡዋ »ባረኖም። ⁸ ኢየሱስ ሃአቨ «ያቭ እቭሁዋ በሰቭ ኢፍቲ ኢኢድኒዳ እንእ ኢያ ኣሰቭ ትከ ብእግዜር መላአይካ ኢፍቲ ኢኢድነዴ። ⁹ በሰብ ኢፍቲ ኢኸዳይዳ ኢያቭ ብእግዜር መላአይካ ኢፍቲ ኸዳኩዴ»። ¹⁰ ኧሰቭ ትከ ኧቀነቨ ሰቭ አፉ ይቩሪ መንፈስ ቅዱስ ኧቀነቨ ጭን አፉ አዩሪዳ ። ¹¹ ኢፎርጅኮኩዋ አይሁድ ኢዶሞጅኮዳ ቢድ ፥ኧገኘ ባሪቂ፥ኧዳኘሜ ሻይተዉ ኢዎስጅኩዋቴ ህም ግዚየ ኧተኸ ንዝሬኲነዴ? ዌ ር ንቭርነዴ ዌ ምር ንዝሬኪነዴ ባይተሁዋ አትጠረቁዋ ። ¹² ህም ግዚየ መንፈስ ቅዱስ ትዝረኩታ አአር የአዉድሁዋሴ»ባረኖም። ¹³ ተትደመደ ሰብ ግት አት ምስ «አስተማሪዮ ኧሰምኛ ቲያ አነንዳ አአቦንራ ደረድ ኢትሻከደኸ ኧኧሰምኛ አዉድኩ»ባረን። ¹⁴ ኢየሱስቭ «አኸ ምሶ ኢያ አሁዋ ደረድ ኧሻክድመዪ በፎርማሁዋ ኧፈርዲ ማን ዳኘ ኤፐዪ »ባረኖም። ¹⁵ ኢየሱስቭ ሃአቨ ተጠፑዋ ሰቭ ኢረቭርካ ሁዳበዋጋ ኑኡነድ አኸረዳ ፤ዋጋቭ ተትሜኝት ሂናሁዋ ኧሮዋ »ባረኖም። ^{16 17} 6 -17 እእመዳቭ ሟማካ ዋኸባረ ኤኤደኖም «አት ደንገኘ ምስ ኧዘንአን ዝኝኧ ኖኦራ ሙርት አወንደነ ፤ሁድቭ «ዝኝኧኛ አወራወዳ ኤኤዲ በከርሁ ምር ነንአ?ባረ፤ በሂንኋይ አጫመጠ ። ¹⁸ እመኸቭ ነንአ ባረ ፤«ገየኛ እንእ ንቫርር ኤኛ በተድ ገየ ነረሽ በሁኖም ዝኝኧመኛ እም ግቭርኛ እንእ ቁጥቁጥ ነንአ። ¹⁹ ነብሲያመኛ ነብሲያኞ ኧሮኦራ ዘቨር ኢቨቃካ ንቭረድ ቁጥቁጥ ኤፐነከ ተቫቴ ኡፎይ ብርአ ስጤይቭ ኧሳርኸ እቭኩዴ ባረ አጫመጠ ። ²⁰ እግዜር ጭን «እኸ ጋዋ ኦኳ ኧዳር ትዎንድኬ እኩ ቁጥቁጥ ኤፐኸን ንቭረድ እንእ ኧቫን ኢኸርኬ?»ባረን። ²¹ ኢየሱስቭ ሟሟካ ሁዳ በጀፐረጋ «በዋ አፈር ኧገግኋ ዋጋ ያወራካ በጎይታይ ጭን አታአር ኤነነ ሰቭ እንእ ዋ ምስ ኢቨስር »ባረ ። ²² ተህም ቀጥወ ኢየሱስ ኧትማሪኋ ዋኸ ባረኖም«ኣነብሲያሁዋ ምር ንቨርአነዴ ዌ ምር ንትኸተርነዴ ባይተሁዋ አትጠረቁዋ ፤ ²³ ተሸረድ ነብስ ተሁጅርቭ ምሲየ ኢረእ ፤ ²⁴ እንዴ አፉ ኦዢዮዋ አይዘርኧታ አይፏጭታ ኧግቭርሁኖዋ ያዎሮኮዳ አአር ዌ ገየ ኤነኖታ እግዜርቭ እመኸ ያቨርአኮዋ እህ ባቴ አሁዋ ታአፉ ኖኦራ አአር አትሮኡዋታ ? ²⁵ ታሁዋ ተጠሬቅተታ ብእድሜኋ እማት ሳአት ኢደቭርካ አኔ ? ²⁶ እህ አካ ዋ እሲየ ዘንጋ ዳር አይኸነሁዋ በኸረ በኤኛ አአር ኧቭር ትትጨነቁዋ ። ²⁷ እንዴ ማማ ኧተኸ ኢትራኡዋኸ ኦዡዋ አይቂችታ ጥጣቭ አይረዱፉታ ፤ዘንጋኋ ጭን ኢያቭ ኢኢድሁዋ ንጕስ ሰለሞን ዳር በሃአጣካ ኑኡነድኋ ተሁኖዋ አአትሁኖዋኸ ኢኸርካ አአር አንትኸተረዳ ። ²⁸ ባቴ እግዜር ኦኳ አሸዊታ ነገ ብእእሳድ ኢረድድካ ኧጀፎረ ሳአር ዋኸ ኢስረኸ ያኸድር በኸረ።እህ አሁዋ ብእግዜር ኧትእሟሞርት ኤመናሁም ባኸሬ አሁሁ አያከድርሁዋታ ? ²⁹ አሁዋ ምር ኣቨርአኬ ዌ ምር ኧሰጭኬ ባይተሁዋ አትጠረቁዋ ፤ ³⁰ ዋዳ እንእ ኢረሁዉዋይ ባአለም አነዉዋታ ሰቭ [ኸልቅ] እንእ በሩእ ተመኛት ኢሱኡዋ አሁም አባሁዋ እግዜር ዋዳ እንእ ያትሲእሁዋኸ ኢሂር ። ³¹ ተህም ኢረእ እእግዜር መንግስት ሶኡዋ ዋዳ እንእ ኢዱዉርነኩዋሴ ። ³² አሁዋ ቀሪ ሰቭ ብትሆርሙ አትፉረዉዋ አባሁዋ እግዜር መንግስትኋ ኢሲእ ። ³³ አነንሁዋታ ሁዳ እንእ አሰሮሙታ ኧዚጋ አቩዋ ፈገያቭ ባይሰርእወ ንእስቭ ባይቨርአኩ በሳቫይ አያርእቭ አይገርዝቭ ዱኒያ አአርዋሁዋ አዉሮዋ ። ³⁴ ዱኒያሁዋ ባኖዳ ኤኤዲ ሂንማሁዋ በህሜ ይህርሴ »ባረኖም። ³⁵ ኢየሱስ ዠፐረ እንእ ግዚየ ወንዘቫሁዋ ታአጎጁም ተጥቫቨቁዋ መብራትማሁዋ ኧብራ፤ ³⁶ አሁም ያረቭርኮታ ምስ ታአዠቨኘቢድ ሜኤተታ ሳቃ ቲደርግካ ህመጋ ተሸተዉዋታ ኢኮፉቺ ዩኡሮታ ሜነኘ ሙሰሩዋ። ³⁷ ያረቭርኮታቭ ምስ ኧጠነቃር ቲዋአካ ተጬፖዉሙ ቲዩኡሬዳ ያዥኮታ ሃአሜነኘ ኧትዳርታኖዋ አአር። ኧዉረመኛ እቭሁዋያረቭርኮታ ምስ ይዎርኧታአአር ያቫአኖምታቸሮሙ ቡርኦዋ ባረ ወንዘቭኋ ታአከደ ኢኸድምኮዋ ³⁸ በግት ምሳአረቭ ኸረ በዞፉቶᎀ ሜኤተታ እመኸ በቃዢት ተቋጦዉም ቲዩኡሬዳ ቢረህቭኮዋ ኧትዳርታኖዋ አአር። ³⁹ አት ዘንጋ ጭን ኋሩዋ ኧቢድ አቨቃጥ ፈገያ በቭር ግዚየ ኢቫአኸ ቢሂር ዊኢንድ ባኔኧቭ ፈገያቭ ቢድኋ ህይተ ኢጋአይ ባናቨንዳ። ⁴⁰ አሁም እመኸቭ ተቃጦዉም ኦሮዋ ኧሰቭ ትከ ባናጫመጥኊ ግዝየ ኢቫአኬ ባረ። ⁴¹ ፔጥሮስቭ ኢኢየሱስ «ጎይታንሮ ዋ ሟሟካ ትዝሬካ ሁዳ እማት ኢናትኒዌ እእንምነኋ?ባረን። ⁴² ጌታ ኢየሱስ «እንዴ አአበሩስኋ ግዚየኋ ኧየተታ ሸረድሁኖዋ ኢኮኸ ባአበሩስኋ ፎር ዳኝነድ አቨን ሂን አነነዳቭ ኧታአመረቭ ማንደን? ⁴³ ያረቭርኩዳ ምስ በቫአ ግዚየ ህመኸ ቲዪንአካ ኢረሁኩዳ ሃአ ሜነኘ ኧትዳረዳን አአር ። ⁴⁴ ኣዉረመኛ እቭሁዋ ያረቭርኩዳ ምስ ባነንዳ አአር እንእ ዳኝነድ ዪቭኩ ። ⁴⁵ ዘንጋኋ ጭን ዋ ሜነኘ ያረቭሬዳ ምስ በፈኧረቭ አይቫአካ ያቲርኬ ባይተ ቢያጫምጥኧቪድ ዴንጋዪ ግርኤድቭ ኧድርጉት ቢቀርስ ኧሳረነኸ ቢቨርአዪ ስጤይተታ ቢሰህር ፤ ⁴⁶ ኧሃአ ሜነኘ ያረቭርኩዳ ምስ ባንእየን ቀረ ባናጫመጠን ወቅት ኢቫአ ።ኑእ ቅጣት ኢቀጣኩሟርሞኋ ታያአቡሩዋ ሰቭ ኢይንአኩ ። ⁴⁷ ያረቭርኩዳ ምስ ፍቃድምር ኧኸረኸ ሃይተ አንትጬፐ ኤኤዘዘንቭ ሁዳ ሃይት አኔፐ ሃአ ሜነኘ ቅጣትኅ ኑኡን አአር። ⁴⁸ ዘንጋኋ ጭን አንሃረ ሁዳ ባአፋን ኢፋድኋ ቅጣትኋ ቀሪን አአር ።ንኖኦራ አአር ታዊ ሰቭ እንእ ተሁዳ ኖኦራ አአር ኢሱኡኰ ፤ኑእ አደራ ታዊ ሰቭ ተሁድቭ ኑእ ዘንጋ ኢሱኡኰ ባረኖም። ⁴⁹ ኢያ ኧቫአሁ ሁዳ በዋ አርዳ እሳድ አጣብጥኔን በፈኧረቭ ተረተደኒ ምርኟ ኢሳሬ ባንደ ። ⁵⁰ ዘንጋኋ ጭን ኧትጠመቅኩዳ ጥምቀት አነኒ ፤ትንጀፕርኩቭ ስን ኧተኸ ጨነቀዪ ? ⁵¹ ኢያ በዋ አፈር ሽኛት አቫአይ ኧቫአሁ አአር መሰረናሁሚ?አኸረዳ ኢያ ኧቫአሁ ኧቫይትርኔን እቭሁዋ ። ⁵² ተዋአክ ቅርሽተዊታ ባአት ቢድ ኢረቩርታ አምእስት ሰቭ ኢትቫይተርቴ ተሁኖም ሶኦስትሁኖዋ በዉርኤትሁኖዋ ኤኡርኤትሞሁኖዋ በሶኦስትሁኖዋ ፎር ተሸተዉዋታ ኢትራኮሽቴ። ⁵³ አቭ ተኧችኋ ኣችቭ ታአባኋ ኢትራኮሽቴ ፤አዶድ ትገረድሻ ገረድቭ ታአዶድሻ አቫት ተቨራታሻ መራትቭ ታአቫትሻ ኢትራኮሽቴ» ባረኖም ። ⁵⁴ ዠፐረታ ኢየሱስ ኧትደሞጁዋ ሰቭ «ዳቨራ ተራአኘ ቲቫአካ ትታዥታ ዲየ ህመጋ ያድግኬ ቱዉሩዋ ኧዉረቭ ያድግ። ⁵⁵ ኧጉራንፋስ ቲረፍስካቭ አፈር ቃዉነ ኢኸርኬ ቱዉሩዋ ኧዉረቭ ቃዉነ ኢኸር ። ⁵⁶ አሁዋ ኸጣ አአፈርቪ ኧሳቫይቭ መርክ አሸሁም ኧዋአካ አአር አጬግሁም ቲሂሩዋ ይ ኢኸነሁዋ ፤በዋ ዘቨር ኢኸርካ አአር ኧቭር አጪግተሁዋ አቲሂርታ »ባረኖም። ⁵⁷ ኢየሱስ ዠፐረታ «እህ አሁዋ ቂጥየ ፍርድ ኧቭር አትፎርጅታ ? ⁵⁸ ባራጋራኸ ከሰሰናኸታ ፍርድ ቢድ ቲዎስድኸዳበቨያ ታነኸ ተቫራ ጋራኸ ትትቂያመጢ አትቫቅር፤ባንቂያመጥኸ ጭን ኧዳኜ ሻቨ ኢዎስድኸ ዳኘቭ ኧፎሊስ አዋአ ያአይፒርኸ ፎሊስቭ ኦሁኔ ያጋአኸ ። ⁵⁹ ኢያቭ እቭኸ አት ሜዞ ታይተርፍ ከሳኸ ጃቪተከ ታትከስ ስርም ተኦሁኔ አትዋአካ»ባረ።